Exodo 9

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang Pagkapatay sang mga Kahayupan

1 Ang Ginoo nagsiling kay Moises, "Kadtoi si Paraon kag singgana sia, 'Amo ini ang ginsiling sang Ginoo, ang Dios sang mga Hebreo: Palakta ang akon mga tawo, agod makasimba sila sa akon.

2 Kon indi mo liwat pagpalakton ang akon mga tawo kag magpadayon ka sa pagpugong sa ila,

3 padalhan ko sing makakulogmat nga balatian ang imo mga kahayupan: mga kabayo, mga asno, mga kamelyo, mga baka, mga karnero kag mga kanding.

4 Butangan ko sing kinatuhay ang mga kahayupan sang mga Israelinhon sa kahayupan sang mga Egiptohanon, kag wala sing hayop nga iya sang mga Israelinhon nga mapatay.

5 Ako, ang Ginoo nagtalana nga buas amo ang tion nga pagahimuon ko ini.' ''

6 Sang madason nga adlaw ang GINOO naghimo suno sa iya ginsiling, kag ang tanan nga mga kahayupan sang mga Egiptohanon nagkalamatay, pero wala sing bisan isa ka bilog nga hayop nga iya sang mga Israelinhon nga napatay.

7 Nagpamangkot si Paraon kon ano ang nahanabo, kag nakahibalo sia nga wala sing bisan isa ka hayop nga iya sang mga Israelinhon nga napatay. Pero si Paraon nagpatig-a sang iya tagipusoon kag wala niya pagpalakta ang mga tawo.

Ang mga Hubag

8 Ang Ginoo nagsiling kay Moises kag kay Aaron, "Dala kamo sing tag-isa ka hakop nga abo halin sa dapog. Isabwag ini ni Moises sa hangin sa atubangan ni Paraon.

9 Magalapta ini subong sang yab-ok sa bug-os nga duta sang Egipto, kag mahimo ini nga nagabuswang nga mga hubag sa mga tawo kag sa mga kahayupan."

10 Gani nagkuha sila sing abo gikan sa dapog kag nagtindog sa atubangan ni Paraon. Ginsabwag ni Moises ang abo sa hangin, kag nahimo ini nga mga hubag nga nagabuswang sa mga tawo kag sa mga kahayupan.

11 Ang mga salamangkero wala makapalapit sa atubangan ni Moises, kay puno sila sang mga hubag subong sang iban nga mga Egiptohanon.

12 Pero ang Ginoo nagpatig-a sang tagipusoon ni Paraon, kag wala niya pagtugoti ang mga tawo sa paglakat, subong sang ginsiling sang GINOO kay Moises.

Ang Ulan nga Yelo

13 Ang Ginoo nagsiling kay Moises, “Lakat ka sing aga pa gid kag pakigkitai si Paraon kag singgana sia, 'Amo ini ang ginasiling sang Ginoo, ang Dios sang mga Hebreo: Palakta ang akon mga tawo, agod makasimba sila sa akon.

14 Sa sini nga tion magapadala ako sang tanan nga silot sa imo kaugalingon, sa imo mga opisyales, kag sa imo mga tawo, agod imo mahibaluan nga wala sing isa nga kaangay sa akon sa bug-os nga kalibutan.

15 Kon ginbayaw ko ang akon kamot sa paghalit sa imo kag sa imo mga tawo paagi sa balatian, kuntani napapas na kamo.

16 Pero gintugotan ko kamo nga mabuhi sa pagpakita sa inyo sang akon gahom, agod nga ang akon pagkabantog maglapnag sa bug-os nga kalibutan.

17 Pero nagapabugal pa ikaw sa akon nga tawo, kag indi mo sila pagpalakton.

18 Pamati ka, buas sa amo man sini nga tion, paulanon ko sing mabunok ang yelo, nga wala pa gid mahanabo sa Egipto halin sang pagsugod sini nga pungsod.

19 Karon magsugo ka nga pasilungan mo ang tanan mo nga mga kahayupan, kag ang tanan mo nga mga pagkabutang sa gwa kay ang ulan nga yelo magatupa sa mga tawo kag sa mga hayop sa gwa nga wala mapasilungi, kag magkalamatay sila tanan.' "

20 Ang iban sang mga opisyales ni Paraon hinadlukan tungod sang ginsiling sang Ginoo. Gani gindala nila ang ila mga ulipon kag mga kahayupan agod nga mapasilungan.

21 Pero ang iban wala magsapak sang ginsiling sang Ginoo, kag ila lang ginpabay-an ang ila mga ulipon kag mga kahayupan sa gwa.

22 Dayon ang Ginoo nagsiling kay Moises, "Bayawa ang imo kamot sa langit, kag ang ulan nga yelo matupa sa bug-os nga duta sang Egipto, sa mga tawo, sa mga kahayupan, kag sa tanan nga mga tanom sa uma.”

23 Gani ginbayaw ni Moises ang iya sungkod sa langit, kag ang Ginoo nagpadala sing daguob kag sang ulan nga yelo, kag ang kilat nag-igo sang duta. Ang Ginoo nagpaulan sang mga yelo sa bug-os nga duta sang Egipto.

24 Nagbunok ang ulan nga yelo kag nagpangilat. Amo ini ang labing makahalalit nga ulan sang yelo nga nahanabo sa Egipto halin sang pagpasad sini nga pungsod.

25 Ang tanan nga yara sa gwa nga wala mapasilungi sa bug-os nga Egipto, ang tanan nga mga tawo, kag ang tanan nga mga kahayupan ginlaglag sang ulan nga yelo. Ang tanan nga mga tanom sa latagon nagkalatumba, kag ang mga kakahuyan nagkalaluka.

26 Ang duta sang Gosen, sa diin ang mga Israelinhon nagapuyo, amo lang ang duog nga wala mag-ulan sing yelo.

27 Ginpatawag ni Paraon si Moises kag si Aaron kag nagsiling sa ila, "Nakasala ako sa sini nga tion! Ang Ginoo matarong, ako kag ang akon mga tawo nagsayop.

28 Magpangamuyo kamo sa Ginoo; tuman na ang mabaskog nga daguob kag mabunok nga ulan nga yelo. Nagasaad ako nga palakton na kamo, kag indi na dapat magpabilin pa kamo diri.”

29 Si Moises nagsiling sa iya, "Sa pagkagwa ko sa siyudad, sa gilayon bayawon ko ang akon mga kamot sa Ginoo. Ang daguob magauntat, kag indi na mag-ulan sing yelo, agod nga makilala mo nga ang duta iya sang Ginoo.

30 Pero nakahibalo ako nga ikaw kag ang imo mga opisyales wala gihapon nagakahadlok sa Ginoong Dios.”

31 Ang tanan nga lino kag ang sebada nalaglag, kay ang sebada gulang na kag ang tanan nga lino nagapamulak.

32 Pero ang trigo kag ang espelta wala malaglag kay linghod pa ini.

33 Ginbayaan ni Moises si Paraon kag naggwa sa siyudad. Ginbayaw niya ang iya mga kamot sa pagpangamuyo sa Ginoo, kag ang daguob kag ang ulan nga yelo nag-untat, kag ang ulan nag-untat man.

34 Sang makita ni Paraon nga nag-untat ang ulan, ang ulan nga yelo, kag ang daguob, nagpakasala sia liwat kag nagpakatig-a upod sa iya mga opisyales.

35 Sa katig-a sang iya tagipusoon, wala niya pagpalakta ang mga Israelinhon, subong sang ginsiling sang Ginoo paagi kay Moises. 

Exodo 8 | Exodo 10