Exodo 1

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang mga Israelinhon Ginpintasan sa Egipto

1 Amo ini ang mga ngalan sang mga anak nga lalaki ni Jacob nga nagkadto sa Egipto upod sa iya, ang tagsa-tagsa upod sa iya panimalay. Sila amo sanday

2 Ruben, Simeon, Levi, Juda,

3 Isakar, Sabulon, Benjamin,

4 Dan, Neftali, Gad, kag Aser.

5 Ang kadamuon sang mga kaliwat ni Jacob 70 tanan. Si Jose didto na nga daan sa Egipto.

6 Sia kag ang iya mga utod nga lalaki nagkalamatay, subong man yadtong bug-os nga kaliwatan.

7 Pero Ang mga Israelinhon may madamo nga mga kaanakan, nagmuad gid sila kag nagmabakod, sa bagay nga napuno nila ang duta.

8 Karon may isa ka bag-o nga hari nga naggahom sa Egipto. Wala sia makakilala kay Jose.

9 Ang hari nagsiling sa iya mga ginsakpan, “Tan-awa ninyo, ini nga mga tawo nga Israelinhon nagadamo kag nagabakod, kag nabutang kita sa katalagman.

10 Karon pamatii ninyo! Andaman naton nga indi na gid sila magdamo. Kay kon may inaway, basi magdampig sila sa aton mga kaaway sa pag-away batok sa aton, kag magpalagyo sila sa aton pungsod.”

11 Gani ginbutangan sila sing mga mapintas nga mga kabo sa pagpaobra sa ila sing pataypatay agod magluya sila. Ang mga Israelinhon nagpatindog sang mga siyudad sang Pitom kag Raamses para kay Paraon nga pagatipunan nila sing mga pagkaon.

12 Pero sa nagadugang ang pagpigos sang mga Egiptohanon sa mga Israelinhon, tapat pa gani nga nagadamo kag nagalapnag sila. Ang mga Egiptohanon nagdumot kag nagkahadlok sa mga Israelinhon.

13 Gin-ulipon nila sing mapintas ang mga Israelinhon,

14 kag ginpapiot ang ila pagkabuhi paagi sa pagpaobra sa ila sa lunang kag sa tisa, kag sa tanan nga mabug-at nga mga obra sa uma. Ginpilit nila sila sa paghimo sang tanan nga mabug-at nga mga obra.

15 Dayon ang hari sang Egipto maghmbal sa mga partera nga nagabulig sa Hebreo nga mga babayi. Ang isa ginhingalanan kay Sipra kag ang isa kay Pua.

16 Nagsiling ang hari, “Kon nagapabata kamo sang Hebreo nga mga babayi, kag kon ang lapsag lalaki, patyon ninyo, pero kon babayi, pabayai lang nga mabuhi.”

17 Pero ang mga partera wala magtuman sa hari kay nahadlok sila sa Dios. Sa baylo ginpabay-an nila nga mabuhi ang mga lapsag nga lalaki.

18 Ginpatawag sang hari ang mga partera kag ginpamangkot, “Ngaa bala nga ginhimo ninyo ini kag ginpabay-an nga mabuhi ang mga lapsag nga lalaki?”

19 Nagsabat sila, “Ang Hebreo nga mgababayi indi pareho sang Egiptohanon nga mga babayi, mahapos sila magbata kag sa wala pa makaabot ang partera nagabata na sila.”

20 Ang Dios nagmaayo sa mga partera, kag nagdamo nga nagdamo ang mga Israelinhon, kag nangingamhanan sila.

21 Bangod kay nagakahadlok ang mga partera sa Dios, ginhatagan sila sang mga kaliwat.

22 Dayon si Paraon nagmando sa tanan niya nga mga ginsakpan, “Ihaboy ninyo sa Suba ang tagsa ka bata nga lalaki nga matawo sa mga Hebreo, pero pabay-i ninyo ang mga bata nga babayi nga mabuhi."

Genesis 50 | Exodo 2