Exodo 35

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Mga Pagsulondan para sa Adlaw nga Inugpahuway

1 Ginpatawag ni Moises sing tingob ang bug-os nga katilingban sang mga tawo sang Israel, kag nagsiling sa ila, "Amo ini ang ginsugo sang Ginoo nga inyo himuon:

2 Mag-obra kamo sa sulod sang anom ka adlaw, pero ang ikapito nga adlaw manginbalaan para sa inyo, isa ka adlaw sang bug-os nga pagpahuway nga nahalad sa Ginoo. Ang bisan sin-o nga mag-obra sa amo nga adlaw pagapatyon.

3 Indi kamo magdabok bisan sang kalayo sa inyo mga puloy-an sa adlaw sang inugpahuway.”

Mga Halad para sa Santuaryo

(Ex. 25:1-9)

4 Si Moises nagsiling sa bug-os nga katilingban sang mga tawo sang Israel, “Amo ini ang ginsugo sang Ginoo:

5 Maghalad kamo sing dulot sa Ginoo. Ang tagsatagsa nga luyag maghalad magdala sing dulot nga amo ang masunod: bulawan, pilak kag saway;

6 delana nga asol, granate, kag pula; mapino nga lino, tela nga nahimo sa bulbol sang kanding,

7 panit sang karnero nga lalaki nga nalugom sa pula, maayo nga panit, kahoy nga akasya,

8 lana para sa mga suga, mga pahumot para sa lana nga inughaplas, kag para sa insyenso nga mahumot,

9 mga malahalon nga bato nga kornalina, kag mga malahalon nga bato nga inugtampok sa bestidora kag sa hapin sa dughan sang pinakamataas nga pari.

Ang mga Gamit para sa Tolda nga Tilipunan sang GINOO

(Ex. 39:32-43)

10 "Ang tanan nga maayo nga manug-obra magkari kag maghimo sang tanan nga ginsugo sang Ginoo:

11 ang Tolda nga Tilipunan, ang iya bungbong kag ang iya tabon, ang iya mga kaw-it kag ang iya dingding nga mga tapi, ang iya mga baral, ang iya mga haligi kag ang mga sadsaran,

12 ang kaban kag ang iya mga yayungan, ang tabon sang kaban, kag ang kurtina nga nagalipon sini,

13 ang lamisa, ang iya sini mga yayungan kag ang tanan nga iya sini kasangkapan, kag ang tinapay nga nahalad sa Dios,

14 ang kandilerohan para sa suga kag sang iya mga kasangkapan, ang iya mga suga, kag ang lana para sa mga suga,

15 ang altar nga ginasunogan sang insyenso kag ang iya mga yayungan, ang lana nga inughaplas, ang insyenso nga mahamot, kag ang kurtina para sa puwertahan pakadto sa Tolda nga Tilipunan,

16 ang altar para sa mga halad nga ginasunog, lakip ang iya parilyahan nga saway nga naangot, ang iya mga yayungan kag ang tanan nga mga kasangkapan sini, ang labador kag ang iya tulongtongan,

17 ang mga kurtina nga ginabungbong, kag ang iya mga haligi kag mga sadsaran, ang kurtina para sa puwertahan pakadto sa ginabungbongan,

18 ang napulo ka mga palpal kag mga banting sang Tolda nga Tilipunan kag sang ginabungbongan,

19 ang malahalon nga mga bayu para sa pag-alagad sang mga pari sa balaan nga duog, ang balaan nga mga bayu para kay Aaron nga pari kag para sa iya mga anak nga lalaki sa ila pag-alagad subong mga pari.”

Ang mga Tawo Nagdala sang Halad

20 Ang bug-os nga katilingban sang mga tawo sang Israel nagbiya kay Moises.

21 Ang tagsatagsa nga may luyag maghatag nagdala sang ila dulot sa Ginoo, para sa paghimo sang Tolda nga Tilipunan, sang tanan nga mga butang nga kinahanglanon para sa pag-alagad sa Tolda nga Tilipunan, kag ang para sa paghimo sang balaan nga mga bayu.

22 Nag-abot ang mga lalaki kag mga babayi ang tagsatagsa nagdala sang ila luyag ihalad: mga sibit, mga aritos, mga singsing, mga kulintas, kag ang tanan nga sahi sing alahas nga bulawan. Ang tagsatagsa nagdala sang alahas nga bulawan nga iya ginhalad para sa Ginoo.

23 Ang tagsatagsa nga may delana nga asol, granate, ukon pula, mapino nga lino, tela nga nahimo sa bulbol sang kanding, sa panit sang karnero, nga nalu-gom sa pula, ukon maayo nga panit, nagdala sini.

24 Ang tanan nga makasarang maghatag sing pilak ukon saway nagdala sini subong ila halad para sa Ginoo, kag ang tanan nga may kahoy nga akasya nga magamit sa bisan ano nga bahin sang Tolda nga Tilipunan nagdala sini.

25 Ang tanan nga mga babayi nga sampaton sa paghimo sang hilo nga asol, granate, kag delana nga pula, kag mapino nga lino, naghimo sini kag ila gindala.

26 Ang tanan nga mga babayi nga sampaton naghimo sing hilo gikan sa bulbol sang kanding.

27 Ang mga pangulo nagdala sang malahalon nga mga bato nga kornalina, kag malahalon nga mga bato nga inugtampok sa bestidora kag sa hapin sa dughan,

28 mga pahamot kag lana para sa mga suga, para sa lana nga inughaplas, kag para sa mahamot nga insyenso.

29 Ang tanan nga mga lalaki kag mga babayi sang mga tawo sang Israel nga luyag maghatag sa tanan nga mga bulohaton nga ginsugo sang Ginoo, paagi kay Moises nga himuon nagdala sang ila mga halad sa Ginoo.

Ang mga Manub-obra sang Tolda nga Tilipunan

(Ex. 31:1-11)

30 Si Moises nagsiling sa mga Israelinhon, "Ang Ginoo nagpili kay Besalel nga anak nga lalaki ni Uri, nga anak ni Hur sa tribo ni Juda.

31 Ginpuno sia sang Dios sang iya gahom, agod nga manginsampaton sia, may abilidad, kag makahibalo sang tanan nga sari sang bulohaton,

32 sa pagplano sing matahom nga desinyo nga himo sa bulawan, pilak, kag saway,

33 sa paglagari sang malahalon nga mga bato nga inugtampok sa paggutib sang kahoy, kag sang tanan nga sari sang matahom nga bulohaton.

34 Ang Ginoo naghatag kay Besalel kag kay Oholiab nga anak ini Ahisamak sang tribo ni Dan sang abilidad sa pagtudlo sang ila nahibaluan.

35 Ang Ginoo naghatag sa ila sing pagkasampaton sa paghimo sang tanan nga bulohaton sang mga manuggrabar, mga manugborda, mga manughabol sang delana nga asol, granate, kag pula, kag sang mapino nga lino, kag mga ordinaryo nga mga manughabol. Makasarang sila sa paghimo sang tanan nga mga bulohaton kag mga sampaton sila nga manugborda.

Exodo 34 | Exodo 36