Exodo 23

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Pagkamatarong kag wala sing Pinasulabi

1 “Indi ikaw magsugid sang indi matuod. Indi ka mag-apin sa tawo nga nakasala paagi sa paghatag sing binutig nga panaksi.

2 Indi ka magbuylog sa madamo sa paghimo sing malaut. Sa hukmanan indi ka magpanaksi sa pagpatiko sang katarungan agod lamang mapahamuot mo ang madamo. 3 lndi mo pagpaburan ang imol sa iya asunto.

4 "Kon makita mo ang baka ukon asno sang imo kaaway nga nagakabuhi, dalhon mo ini kag iuli sa iya.

5 Kon ang iya asno naglup-og tungod sang iya mabug-at nga karga, indi mo sia pagligaran kundi buligan mo agod makatindog sia.

6 “Kon ang isa sang imo mga tawo nga imol ginahukman, indi mo sia pagdumilian sang iya kinamatarong.

7 Maglikaw ka sa paghimo sang binutig nga panumbongon. Indi mo pag-ipapatay ang tawo nga wala sing sala, kay silutan ko ang tawo nga nagahimo sing malaut nga butang.

8 Indi ka magbaton sing hamham, kay ang hamham nagabulag sa tawo nahanungod sang matarong kag nagapatiko sang katarungan sang mga wala sing sala.

9 "Indi mo paghimuan sing malain ang dumoluong. Nahibaluan mo ang iya balatyagon, kay kamo anay dumoluong man sa Egipto."

Ang Ikapito ka Tuig kag ang Ikapito ka Adlaw 

10 “Sa sulod sang anom ka tuig tamnan mo ang imo duta kag imo tipunon ang patubas sini.

11 Pero sa ikapito nga tuig pahuwayan mo ini, kag indi mo pag-anihon ang bisan ano nga magatubo sa sini. Ang mga imol nga kaupod ninyomagakaon sang nagatubo sa duta, kag ang mga hayop nga talunon makakaon sang nabilin sini. Amo man ini ang himuon mo sa imo talamnan sang ubas kag sa imo katamnan sang olibo.

12 “Mag-obra ka sa sulod sang anom ka adlaw, pero sa ikapito nga adlaw indi ka mag-obra, agod ang imo mga baka kag ang imo mga asno makapahuway, kag ang imo mga ulipon kag ang mga dumoluong maulian sing ila kusog.

13 Pamatii ninyo ang tanan nga akon ginsiling sa inyo. Indi kamo magpangamuyo sa iban nga mga dios, ukon bisan magsambit sang ila ngalan.”

Ang Tatlo ka Dalagku nga mga Piesta

(Ex. 34:18-26; Dent. 16:1-17)

14 "Maghiwat kamo sing tatlo ka piesta tuigtuig sa akon kadungganan.

15 Saulogon mo ang Piesta sang Tinapay nga wala sing Lebadora. Suno sa ginsugo ko sa imo, magkaon ka sang tinapay nga wala sing lebadora sa sulod sang pito ka adlaw, sa ginpat-od nga tion sa bulan sang Abib, kay sa sini nga bulan naggwa kamo sa Egipto. Wala sing isa nga mag-abutang sa akon nga wala sing halad.

16 Saulogon mo ang Piesta sang Ani, kon mag-ani ka sang nahauna nga bunga sang imo uma. Saulogon mo ang Piesta sang Pagtipon sang mga Patubas sa katapusan sang tuig, kon magtipon ka sang mga bunga sang imo talamnan sang mga ubas kag sang mga olibo.

17 Makatlo sa isa ka tuig, ang inyo mga lalaki magaatubang sa akon, ang Ginoong Dios.

18 "Indi ka maggamit sang tinapay nga may lebadora kon maghalad ka sing hayop sa akon. Ang sapay sang hayop nga gingamit sa akon piesta indi pag-ibilin tubtob sa aga.

19 "Dalhon mo sa balay sang Ginoo nga imo Dios ang pinakamaayo sang nahauna nga patubas sang imo uma. "Indi mo paglutoon ang tinday sang imo karnero sa gatas sang iya inang."

Mga Saad kag mga Pagsulondan

20 "Magapadala ako sing anghel sa pag-una kag sa pagbantay sa imo sa dalanon mo, kag sa pagdala sa imo sa duog nga gin-aman ko.

21 Pamati sa iya, kag tumana ang iya ginasiling. Indi ka magpamatok sa iya, kay ang ginahimo niya para sa akon. Indi niya patawaron ini nga sala.

22 Pero kon magpamati ka sa iya, kag magtuman sang tanan nga ginasiling ko, awayon ko ang imo mga kaaway, kag sumpongon ang mga nagapamatok sa imo.

23 Ang akon anghel magauna sa imo, kag magadala sa imo sa duta sang mga Amornon, Hethanon, Peresnon, Canaanhon, Hebhanon, kag Jebusnon, kag ako magalaglag sa ila.

24 Indi ka magluhod sa ila mga dios ukon magsimba sa ila. Indi ka magsunod sang ginahimo sini nga mga tawo. Laglagon mo sing bug-os ang ila mga dios, kag rumpagon mo ang ila mga halaran nga bato.

25 Magsimba kamo sa Ginoo nga inyo Dios, kag ako magahatag sa inyo sang kalan-on kag tubig, kag kuhaon ko ang inyo mga balatian.

26 Wala na sing babayi nga mahulogan ukon manginbaw-as sa imo duta. Hatagan ko kamo sing malawig nga kabuhi.

27 "Himuon ko nga magkahadlok sa akon ang mga tawo nga nagapamatok sa imo. Himuon ko nga magsalangisag ang mga tawo nga imo mga kaaway, kag pabalikon ko kag papalagyuhon ang imo mga kaaway.

28 Ipadala ko ang akon kakugmat sa pag-una sa imo, kag ini magatabog sang mga Hebhanon, Canaanhon, kag sang mga Hethanon sa atubangan nimo.

29 Indi ko sila pagtabugon sa sulod sang isa ka tuig, agod indi mabayaan ang duta kag ang mga hayop nga talunon indi magdamo para sa imo.

30 Tabugon ko sila sing amat-amat tubtob nga magdamo ang imo mga kaanakan, kag makapanag-iya sang duta.

31 Pasangkaron ko ang mga dulonan sang imo duta halin sa Mapula nga Dagat tubtob sa Dagat sang Mediteraneo, kag halin sa desierto, tubtob sa Suba sang Eufrates. Itugyan ko sa imo paggahom ang mga pumoluyo sang duta, kag tabugon mo sila sa imo atubangan.

32 Indi ka maghimo sing kasugtanan sa ila ukon sa ila mga dios.

33 Indi sila dapat magpuyo sa imo pungsod, agod nga indi nila ikaw matulod sa pagpakasala batok sa akon. Kon magsimba ka sa ila mga dios, ini manginkabangdanan sang imo kalaglagan. 

Exodo 22 | Exodo 24