Exodo 26

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang Tolda nga Tilipunan sang Ginoo

(Ex. 36:8-38)

1 "Maghimo ka sing Tolda nga Tilipunan nga may napulo ka panid nga tela nga nahimo sa mapino kag nagakunotkunot nga lino, kag sang asol, granate, kag mapula nga delana. Bordahan mo sing maayo ini nga tela sing larawan sang mga kerubin.

2 Ang tagsa ka tela may kalabaon nga 14 ka yarda kag may duha ka yarda ang kasangkaron, ang tanan nga tela pareho sing takos.

3 Tambihon mo ang lima sa ila, kag amo man ang lima.

4 Himuan mo sing sulosingsing nga asol nga tela sa kilid sang nagwa nga bahin sang kurtina sa tagsa ka tinambitambi.

5 Butangan mo man sing 50 ka mga sulosingsing ang nahauna nga tela sang nahauna nga tinambitambi, kag 50 man ka sulosingsing nga nagakitaay sa katapusan nga kurtina sang ikaduha ka tinambitambi.

6 Himuan mo sing 50 ka kaw-it nga bulawan, nga nagatabid sang duha ka tinambitambi, agod mahimo ang isa ka Tolda nga Tilipunan.

7 "Maghimo ka sing onse ka panid nga tela nga nahimo sa bulbol sang kanding nga mangin-atop sang Tolda nga Tilipunan.

8 Ang kada isa may kinse ka yarda ang kalabaon kag duha ka yarda ang kasangkaron, ang tanan pareho sing takos.

9 Tambihon mo ang lima ka panid nga tela agod mangin-isa, kag ang nabilin nga anom imo man tambitambihon. Piluon mo ang ikan-om nga tela sa atubangan sang tolda.

10 Butangan mo sing 50 ka sulosingsing ang kilid sang katapusan sang nahauna nga tambitambi, kag 50 man ka sulosingsing sa kilid sang ikaduha nga tambitambi.

11 Maghimo ka sing 50 ka kaw-it nga saway kag iangot sa mga sulosingsing sang duha ka tambitambi agod nga mahimo ang isa ka tolda nga puloy-an.

12 Ang katunga sang tela nga nagakabit sa ibabaw sang Tolda, paluyloyon sa likod sang Tolda.

13 Ang sobra nga tunga sa yarda sa tagsa ka kilid sang Tolda pakabiton sa kilid sang Tolda sa pagtabon sini.

14 Maghimo ka sing inugtaklap sa Tolda nga panit sang karnero nga lalaki nga nalugom sa pula, kag ang inugtaklap nga nahimo sa maayo nga panit sang kanding nga itabon sa ibabaw sini.

15 "Maghimo ka sing dingding nga mga tapi nga akasya para sa Tolda.

16 Ang tagsa ka tapi may kalabaon nga 15 ka tapak kag 27 ka pulgada ka sangkad,

17 kag may duha ka diladila ang tapi agod nga ang duha ka tapi maangot sa isa kag isa. Himuan mo sing diladila ang tanan nga mga tapi sang Tolda.

18 Kon maghimo ka sining mga tapi, maghimo ka sing 20 sa nabagatnan nga kilid,

19 kag maghimo ka sing 40 ka mga sadsaran nga pilak nga tungtongan sini, duha ka sadsaran sa idalom sang tagsa ka tapi nga maangtan sang duha ka diladila.

20 Sa naaminhan nga kilid sang Tolda maghimo ka sing 20 ka mga tapi,

21 kag 40 ka sadsaran nga pilak, duha ka sadsaran tagsa ka tapi.

22 Sa likod sang Tolda sa nakatundan, maghimo ka sing anom ka tapi,

23 kag duha ka tapi sa mga pamusod sa likod sang Tolda.

24 Ining mga tapi sa mga pamusod paanguton halin sa idalom tubtob sa ibabaw sa nahauna nga singsing. Ang duha ka tapi sa duha ka pamusod pagahimuon sa sini nga paagi.

25 Gani may walo ka tapi upod sa ila 16 ka sadsaran nga pilak, duha sa tagsa ka tapi.

26 "Maghimo ka sing mga baral nga kahoy nga akasya, lima para sa dingding nga tapi sa isa ka kilid sang tolda,

27 kag lima para sa dingding nga tapi sa pihak nga kilid, kag lima para sa dingding nga tapi sa nakatundan nayon sa likod.

28 Ang baral sa tungatonga sang mga dingding nga tapi, magahalin sa isa ka pamusod tubtob sa isa.

29 Haklapan mo ang mga tapi sing bulawan, kag takdan mo sing singsing nga bulawan nga naguloan sang mga baral, kag ini nga mga baral haklapan man sing bulawan.

30 Gani patindugon mo ang Tolda suno sa plano nga ginpakita sa imo sa bukid.

31 "Maghimo ka sing kurtina nga asol, granate, kag mapula nga delana, nga mapino kag nagakunotkunot nga lino. Pabordahan mo ini sing maayo sang laragway sang mga kerubin.

32 Pakabiton mo ini sa apat ka haligi nga akasya nga nahaklapan sing bulawan, nga may mga kaw-it, kag iangot mo sa apat ka sadsaran nga pilak.

33 Pakabiton mo ang kurtina sa mga kaw-it sa atop sang tolda, kag ibutang mo ang kaban nga ginasudlan sang malapadlapad nga bato sang kasugtanan sa sulod sang kurtina. Ang kurtina magaulot sang balaan nga duog sa labing balaan nga duog.

34 Ibutang mo ang takop sa ibabaw sang kaban sa labing balaan nga duog.

35 Ibutang mo ang lamisa sa gwa sang kurtina, kag ibutang mo ang kandilerohan sa bagatnan nga bahin sang Tolda, nga nagaatubang sa lamisa sa naaminhan nga bahin.

36 "Ang puwertahan sang tolda himuan mo sing kurtina nga asol, granate, pula nga delana, kag mapino nga nagakunotkunot nga lino, nga nabordahan.

37 Himuan mo ini nga kurtina sing lima ka haligi nga kahoy nga akasya nga nahaklapan sing bulawan, kag nabutangan sang mga kaw-it nga bulawan, kag maghimo ka sing lima ka sadsaran nga saway para sa sini nga mga haligi. 

Exodo 25 | Exodo 27