Exodo 32

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang Tinday nga Baka nga Bulawan

(Deut. 9:6-29)

1 Sang matalupangdan sang mga tawo nga si Moises nagdugay sa ibabaw sang bukid, kag wala magdulhog, nagtipon sila sa palibot ni Aaron kag nagsiling sa iya, “Dali, himoi kami sing dios nga magapangulo sa amon, kay wala namon mahibal-i kon ano ang natabo sining tawo nga si Moises, nga nagpagwa sa amon gikan sa Egipto."

2 Nagsiling si Aaron sa ila, "Panguhaa ninyo ang bulawan nga mga aritos nga ginagamit sang inyo mga asawa, sang inyo mga anak nga lalaki, kag sang inyo mga anak nga babayi, kag dalha ninyo diri sa akon.”

3 Gani ginkuha sang mga tawo ang ila mga aritos nga bulawan, kag gindala nila kay Aaron.

4 Gintipon niya ang mga aritos, gintunaw kag ginbubo sa hormahan, kag sa sini naghimo sila sing tinday nga baka. Ang mga tawo nagsiling, "O Israel, amo ini ang aton dios, nga nagpagwa sa aton gikan sa Egipto.”

5 Sang pagkakita sini ni Aaron, nagpatindog sia sing altar sa atubangan sang tinday nga bulawan. Dayon nagpahibalo sia nga nagasiling, "Buas magasaulog kita sing piesta sa kadungganan sang GINOO."

6 Aga pa sa madason nga adlaw naghalad sila sang mga sapat nga ila ginsunog, kag mga sapat nga halad nga paghiusa. Ang mga tawo naglingkod sa pagkaon kag sa pag-inom, kag dayon nagkinalipay sila.

7 Ang GINOO nagsiling kay Moises, “Dalidali ka kag magdulhog, kay ang imo mga tawo, nga ginpagwa gikan sa Egipto naghimo sing malaut nga butang.

8 Madali lang nila ginbayaan ang mga pagsulondan nga akon gintudlo sa ila: naghimo sila sing isa ka tinday nga baka gikan sa tinunaw nga bulawan, kag ginsimba nila ini, kag nagdulot sing mga halad sa sini. Nagsiling sila, ‘O Israel, ini amo ang imo dios nga nagpagwa sa imo gikan sa Egipto.’”

9 Ang GINOO nagsiling kay Moises, “Nakilala ko nga ini nga mga tawo matig-a sing ulo.

10 Karon, sa imo pahanugot, papason ko sila sa akon nagabalingaso nga kaakig. Dayon ako magahimo sa imo kag sa imo mga kaliwat nga mangin-isa ka daku nga pungsod.”

11 Pero si Moises nagpakiluoy sa GINOO nga iya Dios, nga nagasiling, “O GINOO, ngaa bala magsilabo ang imo kaakig sa sini nga mga tawo, nga imo ginpagwa gikan sa Egipto sa daku nga kusog kag gahom?

12 Ngaa bala nga hatagan mo sing kahigayunan ang mga Egiptohanon sa pagsiling, ‘Ginpagwa niya sila sa Egipto nga may malain nga tinutoyo sa pagpatay sa ila sa mga kabukiran kag sa paglaglag sa ila sing bug-os?’ Indi pagpadayuna ang imo nagabalingaso nga kaakig, magbaylo ka sing hunahona, kag indi paglaglaga ang imo mga tawo.

13 Dumdoma ang imo mga alagad nga si Abraham, si Isaac, kag si Israel kag kon ano ang imo ginsaad sa ila, nga nagpanumpa sa imo kaugalingon nga ngalan, kag nagsiling sa kadaisa sa ila, ‘Hatagan ko ikaw sing mga kaliwat subong kadamo sang bituon sa langit. Ihatag ko sa imo kaliwat ang bug-os nga duta nga akon ginsaad sa ila kag mangin-ila ini sing dayon.’ ”

14 Gani ang GINOO nagbaylo sang iya hunahona, kag wala niya gin-ula ang kalaglagan nga iya ginsiling sa iya mga tawo.

15 Si Moises nagbalik kag nagdulhog sa bukid, nga nagadala sang duha ka malapadlapad nga bato sang kasugtanan, nga nasulatan sa pihak kag pihak.

16 Ini ginhimo sang Dios, kag ang mga sulat sinulat sang Dios, nga ginsinsil sa mga malapadlapad nga bato.

17 Nakabati si Josue sang pagsininggit sang mga tawo, kag nagsiling sia kay Moises, "Nabatian ko ang kinagahod sang inaway sa kampamento.”

18 Si Moises nagsiling, "Ina nga ginahod indi singgit sang pagdaog, ukon ginahod sang paglalaw tungod sang pagkalutos. Ang akon nabatian amo ang gahod sang mga pagkinanta."

19 Sang malapit na si Moises sa kampamento kag nakita niya ang tinday nga baka kag ang mga tawo nga nagasinaot, naakig gid sia. Ginpusdak niya ang mga malapadlapad nga bato nga iya ginadala kag nabuka ini sa kunsaran sang bukid.

20 Ginkuha niya ang tinday sang baka nga ila ginhimo, ginsunog ini, ginbukbok ini subong sang pulbos, kag ginsabwag niya sa tubig. Dayon ginpainom niya ini sa mga tawo sang Israel.

21 Nagsiling sia kay Aaron, "Ano bala ang ginhimo sini nga mga tawo sa imo, nga imo sila ginpahimo sining daku nga sala?"

22 Nagsabat si Aaron, "Sir, indi ka magkaakig sa akon, nahibal-an mo kon daw ano ang huyog sini nga mga tawo sa paghimo sing malaut.

23 Nagsiling sila sa akon, 'Himoi kami sing isa ka dios nga magapangulo sa amon, kay wala kami makahibalo kon ano na ang natabo sa sini nga tawo nga si Moises nga nagpagwa sa amon gikan sa Egipto.'

24 Ginpamangkot ko sila, 'Sin-o bala sa inyo ang may bulawan?’ Ginpanguha nila ang ila alahas nga bulawan kag ginhatag sa akon. Ginhaboy ko ini sa kalayo kag nahimo ini nga tinday sang baka."

25 Nakita ni Moises nga ang mga tawo nagapinatuyang, kay ginpabay-an sila ni Aaron sa pagsimba sa diosdios, walay sapayan sang katalagman gikan sa ila mga kaaway sa ila palibot.

26 Gani si Moises nagtindog sa puwertahan sang kampamento kag nagsinggit, "Ang bisan sin-o nga luyag magbuylog sa Ginoo, magkari sia sa akon!" Ang tanan nga mga Levinhon nagtipon sa palibot niya,

27 kag nagsiling sia sa ila, "Amo ini ang ginasiling sang Ginoong Dios sang Israel, 'Ang tagsatagsa sa inyo magtaklos sang iya espada kag libuta ninyo ang bug-os nga kampamento halin sa sini nga puwerta pakadto sa isa, kag pamatya ninyo ang inyo mga utod nga lalaki, ang inyo mga abyan, kag ang inyo mga kasilingan.' ''

28 Gintuman sang mga Levinhon ang ginsugo ni Moises sa ila, kag sa sina nga adlaw 3,000 ka mga tawo ang nagkalamatay.

29 Si Moises nagsiling sa mga Levinhon, "Karon nga adlaw ginhalad ninyo ang inyo kaugalingon subong mga pari sa pag-alagad sa GINOO, paagi sa pagpatay sang inyo mga anak nga lalaki kag mga utod nga lalaki, gani ang GINOO nagbendisyon sa inyo karon nga adlaw."

30 Sa madason nga adlaw si Moises nagsiling sa mga tawo, "Nakahimo kamo sing daku nga sala. Pero karon, matukad ako sa bukid pakadto sa Ginoo, ayhan matigayon ko ang kapatawaran sang inyo mga sala."

31 Nagbalik si Moises sa Ginoo kag nagsiling, "Abaw, daku gid nga sala ang nahimo sini nga mga tawo! Naghimo sila sing isa ka dios nga bulawan para sa ila kaugalingon.

32 Pero karon, kon mahimo patawara ang ila sala. Kon indi, ginaampo ko nga panasa ang akon ngalan sa libro nga imo nasulat."

33 Ang Ginoo nagsiling kay Moises, "Ang ngalan sang nakasala batok sa akon amo ang panason ko sa akon libro.

34 Karon Iakat ka, pangulohi ang mga tawo pakadto sa duog nga ginsiling ko sa imo. Dumdoma nga ang akon anghel magtuytoy sa imo, pero kon ako magsilot, silutan ko sila tungod sang ila mga sala.”

35 Ang Ginoo nagpadala sing balatian sa mga tawo, tungod kay nagpilit sila kay Aaron sa paghimo sang tinday nga baka.

Exodo 31 | Exodo 33