Exodo 24

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang Kasugtanan Ginsilyuhan

1 Ang Ginoo nagsiling kay Moises, "Taklad ka sa bukid pakadto diri sa akon upod kay Aaron, Nadab, kag kay Abiu, kag ang 70 ka mga pangulo sang Israel, kag magluhod kamo sa pagsimba sa akon sa malayo.

2 Ikaw lamang ang magpalapit sa akon. Ang iban indi magpalapit, kag ang mga tawo indi mag-upod sa imo.”

3 Naglakat si Moises, kag ginsugiran ang mga tawo sang tanan nga ginsugo sang GINOO, kag sang iya mga pagsulondan. Ang tanan nga mga tawo nagsabat sing dungan, “Tumanon namon ang tanan nga ginsiling sang GINOO.”

4 Ginsulat ni Moises ang tanan nga mga sugo sang GINOO. Aga pa sang madason nga adlaw nagpatindog sia sa kunsaran sang bukid sing altar, kag sang 12 ka monumento nga mga bato para sa 12 ka tribo sang Israel.

5 Dayon nagpadala sia sing pamatan-on nga mga lalaki sang Israel, nga nagdulot sang mga halad nga sinunog kag nag-ihaw man sang mga toro nga baka agod ihalad sa GINOO, subong halad sa paghiambit.

6 Ginkuha ni Moises ang katunga sang dugo kag ginbutang ini sa mga yahong, kag ang katunga ginwisik sa altar.

7 Dayon ginkuha niya ang libro sang kasugtanan kag ginbasa ini sing mabaskog sa mga tawo, kag nagsiling sila, “Himuon namon ang tanan nga mga sugo sang GINOO. Tumanon namon sia.”

8 Dayon ginkuha ni Moises ang dugo sa mga yahong kag ginwisik sa mga tawo. Nagsiling sia, “Ini amo ang dugo nga nagasilyo sang kasugtanan nga ginhimo sang GINOO sa inyo sa paghatag niya sining tanan nga mga sugo.”

9 Sanday Moises, Aaron, Nadab, Abiu, kag ang 70 ka mga pangulo sang Israel nagtaklad sa bukid

10 kag nakita nila ang Dios sang Israel. Sa idalom sang iya mga tiil daw may matapan nga dalan sang sapiro nga asol, nga subong katin-aw sang langit.

11 Wala niya pag-anha ang pangulo nga mga tawo sang Israel. Nakita nila ang Dios, kag nagkaon kag nag-inom sila.

Si Moises sa Bukid sang Sinai

12 Ang Ginoo nagsiling kay Moises, “Taklad ka sa bukid pakadto sa akon, kag magpabilin diri. Ihatag ko sa imo ang malapadlapad nga mga bato, nga nasulatan sang mga kasugoan kag mga sugo, agod itudlo sa mga tawo."

13 Nag-aman si Moises, upod kay Josue nga iya alagad, kag nagtaklad sila sa bukid sang Dios.

14 Si Moises nagsiling sa mga pangulo, "Hulata ninyo kami diri tubtob nga magbalik kami. Si Aaron kag si Hur-ari upod sa inyo, kag kon may kasuayon kamo, kadto lang kamo sa 

Ila.”

15 Nagtaklad si Moises sa bukid, kag gintabunan ini sang panganod.

16 Ang himaya sang Ginoo nagpanaog sa Bukid sang Sinai, kag sa sulod sang anom ka adlaw gintabunan ini sang panganod. Sa ikapito ka adlaw, gintawag sang Ginoo si Moises gikan sa tunga sang panganod.

17 (Sa mga Israelinhon, ang himaya sang GINOO daw kaangay sang nagadabdab nga kalayo sa putokputokan sang bukid.)

18 Si Moises nagsulod sa panganod, kag nagtaklad sa bukid. Nagpabilin sia didto sa sulod sang 40 ka adlaw kag gab-i.

Exodo 23 | Exodo 25