Exodo 2

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang Pagkatawo kag ang Pagluwas kay Moises

1 May isa ka tawo sa tribo ni Levi nga nagpangasawa sa isa ka babayi sa amo man nga tribo.

2 Nagbusong ang iya asawa kag nagbata sing lalaki. Sang makita niya nga ang bata guwapo, gintago niya ang bata sa sulod sang tatlo ka bulan.

3 Sang indi na niya matago ang bata, nagkuha sia sang isa ka basket nga nahimo sa tabun-ak, kag iya ini ginbalaw. Ginsulod niya ang bata sa sini nga basket kag ginbutang niya sa bibi sang suba nga may matag-as nga hilamon.

4 Ang iya utod nga babayi nagtindog sa uloonhan sa pagbantay kon ano ang mahanabo sa iya.

5 Karon ang anak nga babayi ni Paraon nagkadto sa suba sa pagpaligo, samtang ang iya manug-atipan nga mga babayi nagdayan-dayan sa pangpang sang suba. Nakita niya ang basket sa mga hilamon, kag ginsugo niya ang iya ulipon nga babayi sa pagkuha sini.

6 Ginbuksan ini sang anak nga babayi ni Paraon kag iya nakita ang lapsag nga lalaki nga nagahibi. Naluoy sia sa bata kag nagsiling, "Isa ini sang mga bata sang mga Hebreo."

7 Ang utod nga babayi sang lapsag nagpamangkot sa iya, "Luyag mo bala nga malakat ako sa pagpangita sang isa ka babayi nga Hebreo nga magaatipan sa sining bata para sa imo?"

8 Nagsabat sia, "Lakat ka." Naglakat ang bata nga babayi kag gintawag ang iloy sang bata.

9 Ang anak nga babayi ni Paraon nagsiling sa iya, "Dalha ini nga bata kag saguron mo sia para sa akon, kay suholan ko ikaw." Gani ginkuha sang babayi ang bata kag ginsagod.

10 Sang magdakudaku na ang bata, gindala niya ini sa anak nga babayi ni Paraon kag gin-ayop niya ini subong nga iya anak. Nagsiling ang anak ni Paraon, "Ginkuha ko ini sa tubig," gani hingalanan niya sia kay Moises.

Nagpalagyo si Moises sa Midian

11 Isa sadto ka adlaw, sang daku na si Moises, nagduaw sia sa iya kasimanwa nga mga Israelinhon, kag iya nakita kon daw ano ang pagpilit sa ila sa mabug-at nga mga obra. nakita niya ang isa ka Egiptohanon nga nagpatay sang isa ka Hebreo, isa sang iya mga kasimanwa.

12 Nagpanghulonghulong sia, kag sang wala sia sing may nakita, ginpatay niya ang Egiptohanon kag iya ginlubong ang bangkay sa balas.

13 Sang madason nga adlaw nagbalik sia, kag iya na man nakita ang duha ka Hebreo nga naga-away. Nagsiling sia sa isa nga nakahimo sing sayop, "Ngaa bala ginasakit mo ang kapareho mo nga Hebreo?"

14 Nagsabat sia, "Sin-o bala ang naghimo sa imo nga pangulo kag manughukom sa amon? Patyon mo man bala ako subong sang pagpatay mo sa isa ka Egiptohanon?" Kinulbaan si Moises kag nagpanghunahona, "Nahibal-an gali sang mga tawo ang akon ginhimo."

15 Sang mabatian ini ni Paraon, gintinguhaan niya nga patyon si Moises, pero nagpalagyo si Moises, kag nagkadto sa Midian, sa diin sia nagpuyo. Sang pag-abot niya didto, nagpungko sia sa luyo sang bubon.

16 Karon ang pari sa Midian may pito ka mga anak nga babayi. Nag-abot sila, nagtimba sing tubig kag nagpuno sang palaimnan sang mga karnero kag mga kanding sang ila amay.

17 Pero nag-abot ang mga manugbantay sang mga karnero kag gintabog sila palayo. Gintabangan sila ni Moises, kag ginpainom niya ang ila mga kahayupan.

18 Sang pagpauli nila sa ila amay nga si Jetro, nagpamangkot sia, "Ngaa temprano pa kamo makapauli karon nga adlaw?"

19 Nagsabat sila, "Ang isa ka Egiptohanon nagluwas sa amon sa mga manugbantay sang karnero kag gintimbaan pa niya kag ginpainom ang amon mga kahayupan."

20 Ginpamangkot niya ang iya mga anak na babayi, "Diin na sia? Ngaa ginbayaan ninyo sia didto? Lakat kag tawga ninyo sia agod makakaon upod sa aton."

21 Ginpakamaayo ni Moises ang pagpuyo didto, kag ginpaasawa ni Reuel sa iya ni Sipora nga iya anak nga babayi.

22 Nagbata sia sing lalaki kag ginhingalanan niya ang bata kay Gersom, kay nagsiling si Moises sa iya kaugalingon, "Dumoluong ako diri sa sini nga duta."

23 Sa makaligad sang malawig nga panahon, ang hari sang Egipto napatay. Ang mga Israelinhon nag-antos tungod sang pag-ulipon sa ila kag nagpangayo sila sing bulig. Ang ila pagpangayo sing bulig nakalambot sa Dios,

24 kag nabatian niya ang ila pagpanghakroy. Dayon nadumdoman sang Dios ang iya kasugtanan kay Abraham, kay Isaac kag kay Jacob.

25 Nakita sang Dios ang pag-ulipon sa mga Israelinhon, kag ginpakilala niya ang iya kaugalingon sa ila.

Exodo 1 | Exodo 3