Exodo 8

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang mga Paka

1 Karon ang Ginoo nagsiling kay Moises, “Kadtoi si Paraon kag singgana sia, 'Amo ini ang ginasiling sang Ginoo: Palakta ang akon mga tawo, agod makasimba sila sa akon.

2 Pamati ka, kon indi mo sila pagpalakton, halitan ko ang bug-os mo nga pungsod sing mga paka.

3 Ang suba mapuno sing mga paka, magahalin sila sa suba kag magasulod sa imo palasyo, sa imo kuwarto, sa imo katre, sa mga balay sang imo mga opisyales kag sang imo mga tawo, sa imo mga dapog kag sa imo mga lamasan sang Arina.

4 Magalumpat sila sa imo, sa imo mga tawo, kag sa imo mga opisyales.'"

"Magalumpat sila sa imo." (8:4)

5 Ang Ginoo nagsiling kay Moises, "Singgani si Aaron, 'Ibayaw ang imo sungkod sa mga suba, sa mga kanal, sa mga punong, kag patakasa ang mga paka sa duta sang Egipto.' "

6 Gani ginbayaw ni Aaron ang iya kamot sa ibabaw sang tanan nga tubig, kag ang mga paka nagtakas kag nagpuno sang bug-os nga duta.

7 Pero ang mga salamangkero paagi sa ila mga madyik nagpatakas man sang mga paka sa duta.

8 Si Paraon nagtawag kay Moises kag kay Aaron nga nagasiling, "Pangmuyo kamo sa Ginoo nga iya kuhaon ang mga paka sa akon, kag sa akon mga tawo, kag akon sila palakton, agod makadulot sing halad sa Ginoo.”

9 Nagsiling si Moises kay Paraon, “Suno sa tion nga luyag mo singgana lang ako, kon san-o ako mangamuyo tungod sa imo, sa imo mga opisyales, kag sa imo mga tawo, agod ang mga paka magahalin sa imo kag sa imo mga balay kag didto lamang sila makita sa suba.”

10 Nagsabat si Paraon, “Buas.” Si Moises nagsiling,"Matuman suno sa imo ginsiling, agod imo mahibaluan nga wala na sing iban nga dios, kaangay sa Ginoo nga amon Dios.

11 Ang mga paka magahalin sa imo, sa imo mga balay, sa imo nga opisyales, kag sa imo mga tawo, kag didto lamang makita sila sa suba."

12 Dayon ginbayaan ni Moises kag ni Aaron si Paraon, kag nagpangamuyo si Moises sing hanuot gid sa Ginoo nahanungod sa mga paka nga iya ginpadala kay Paraon.

13 Ang Ginoo naghimo suno sa ginpangayo ni Moises, kag ang mga paka sa sulod sang mga puloy-an, sa mga ugsaran, kag sa mga latagon nagkalamatay.

14 Gintipon ini sang mga Egiptohanon sa dalagku nga mga tinumpokan, kag ang bug-os nga duta nagbaho tungod sa mga paka.

15 Sang makita ni Paraon nga maayo na ang kahimtangan, nagpatig-a sia liwat sang iya tagipusoon, kag indi sia magpati kay Moises kag kay Aaron, subong sang ginsiling sang Ginoo.

Ang mga Lamok

16 Ang Ginoo nagsiling kay Moises, “Singgana si Aaron, 'Hampaka sang imo sungkod ang duta, kag ang yab-ok mahimo nga mga lamok sa bug-os nga duta sang Egipto.’”

17 Gintuman nila ini. Ginbayaw ni Aaron ang iya sungkod, kag ginhampak ang duta. Ang yab-ok nahimo nga mga lamok kag nagpangutot sa mga tawo kag sa mga kahayupan. Ang tanan nga mga yab-ok sa Egipto nahimo nga mga lamok.

18 Sa amo man nga bagay ang mga salamangkero nagtinguha sa paghimo sini paagi sa ila mga madyik sa pagpagwa sang mga lamok, pero indi sila makahimo. Gani may mga lamok nga nagapangutot sa mga tawo kag sa mga kahayupan.

19 Ang mga salamangkero nagsiling kay Paraon, "Ginhimo ini sang Dios." Pero nagpatig-a si Paraon sang iya tagipusoon, kag indi magpati kay Moises kag kay Aaron, subong sang ginsiling sang Ginoo.

Ang mga Langaw

20 Ang Ginoo nagsiling kay Moises, "Lakat ka sing aga pa gid kag pakigkitai si Paraon samtamg nagapakadto sia sa suba kag singgana sia, 'Amo ini ang ginsiling sang Ginoo: Palakta ang akon mga tawo, agod makasimba sila sa akon.

21 Kon indi mo sila pagpalakton, ginapaandaman ko ikaw nga magapadala ako sing mga langaw sa imo, sa imo mga opisyales, sa imo mga tawo, kag sa imo mga balay. Mapuno sing mga Iangaw ang mga balay sang mga Egiptohanon, kag bisan pa ang duta nga iia ginatindugan.

22 Pero sa sina nga adlaw, indi ko pagpadalhan sing mga langaw ang duta sang Gosen, sa diin didto nagapuyo ang akon mga tawo, agod nga imo mahibaluan nga ako, ang Ginoo nga nagagahom sa sini nga duta.

23 Butangan ko sing kinatuhay sa tunga sang akon mga tawo, kag sa imo mga tawo. Ini nga milagro mahanabo buas.’”

24 Ginhimo ini sang Ginoo, kag ang nagadulom lang nga mga langaw nag-abot sa palasyo ni Paraon, sa mga balay sang iya mga opisyales, kag sa bug-os nga duta sang Egipto. Ang pungsod ginhalitan sang mga langaw.

25 Dayon ginpatawag ni Paraon si Moises kag si Aaron, kag nagsiling sa ila, "Lakat kamo sa pagdulot sing halad sa inyo Dios sa sini nga duta.”

26 Nagsabat si Moises, "Indi nagakaigo nga himuon ina diri, kay ang mga Egiptohanon magakaakig gid sa amon tungod sang amon paghalad sing mga hayop sa Ginoo nga amon Dios. Kon maghalad kami sing mga hayop nga ginakangil-aran nila, kag makita nila kami, batuhon nila kami tubtob mapatay.

27 Malakat kami sing tatlo ka adlaw sa desierto sa pagdulot sing halad sa Ginoo nga amon Dios, subong sang iya ginsugo sa amon.”

28 Si Paraon nagsiling, "Tugotan ko kamo sa paglakat agod maghalad sa Ginoo nga inyo Dios didto sa desierto, pero indi gid kamo magpalayo. Pangamuyo kamo tungod sa akon.”

29 Si Moises nagsiling, "Kon makalakat na ako, magapangamuyo ako sa Ginoo nga buas gid nga daan ang mga langaw magahalin sa imo palasyo, sa mga balay sang imo mga opisyales, kag sang imo mga tawo. Pero indi mo kami paglimbungan liwat, kag indi mo pagpunggan ang mga tawo sa paglakat agod magdulot sing halad sa Ginoo.”

30 Ginbayaan ni Moises si Paraon, kag nagpangamuyo sa Ginoo,

31 kag ang Ginoo naghimo suno sa ginpangayo ni Moises. Ginkuha niya ang mga langaw sa kay Paraon, sa iya mga opisyales, sa iya nga tawo kag wala gid bisan isa nga nabilin.

32 Pero bisan sa sini nga tion, si Paraon nagpatig-a liwat sang iya tagipusoon, kag wala magtugot sa mga tawo sa paglakat. 

Exodo 7 | Exodo 9