Exodo 20

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang Napulo ka mga Sugo

(Deut. 5:1-11)

1 Ang Dios naghambal sini nga mga pulong,

2 “Ako amo ang GINOO nga imo Dios, nga nagdala sa imo sa pagwa sa Egipto, sa diin gin-ulipon ka.

3 “Indi ka maghupot sang iban nga dios, luas sa akon.

4 “Indi ka maghimo para sa imo kaugalingon sang isa ka diosdios ukon isa ka larawan sang bisan ano nga tinuga sa langit, ukon sa duta, ukon sa tubig nga yara sa idalom sang duta.

5 Indi ka magluhod ukon magsimba sa bisan ano nga diosdios, kay ako ang GINOO nga imo Dios, kag maimon ako nga Dios. Sa mga nagadumot sa akon silutan ko ang ila mga kaanakan tubtob sa ikatlo kag ikaapat ka kaliwatan.

6 Pero sa mga nagahigugma sa akon kag nagabantay sang akon mga sugo, ipakita ko sa ila ang akon malig-on nga paghigugma sa linibo nga mga kaliwatan.

7 “Indi mo paggamiton sa wala sing pulos ang ngalan sang GINOO nga imo Dios, kay ako magasilot sang bisan sin-o nga maggamit sang akon ngalan sa wala sing kapuslanan.

8 “Dumdoma ang adlaw nga inugpahuway, kag pakabalaana ini sa GINOO.

9 Mag-obra ka sa sulod sang anom ka adlaw,

10 pero ang ikapito nga adlaw amo ang adlaw nga inugpahuway nga imo pakabalaanon sa GINOO nga imo Dios. Indi ka mag-obra sa sina nga adlaw, ikaw, ukon ang imo mga kaanakan, ukon imo mga ulipon, ukon imo mga kahayupan, ukon ang dumoluong nga nagapuyo sa imo mga banwa.

11 Sa sulod sang anom ka adlaw ang GINOO nagtuga sang langit kag duta, sang dagat, kag sang tanan nga yara sa ila, pero sa ikapito nga adlaw nagpahuway sia. Gani ako, ang GINOO, nagbendisyon sang adlaw nga inugpahuway kag ginpakabalaan ini para sa akon kaugalingon.

12 “Tahura ang imo amay kag iloy, agod nga magkabuhi ka sing malawig sa duta nga ginhatag sang GINOO nga imo Dios.

13 “Indi ka magpatay.

14 “Indi ka magpanginbabayi ukon magpanginlalaki.

15 “Indi ka magpangawat.

16 “Indi ka magsaksi sing binutig sa imo isigkatawo.

17 “Indi ka magkaibog sang balay sang imo isigkatawo. Indi ka magkaibog sang iya asawa, ukon sang iya mga ulipon, sang iya baka, ukon sang iya asno, ukon sang bisan ano niya nga butang!”

Ang Kahadlok sang mga Tawo

(Deut. 5:2-33)

18 Sang mabatian sang mga tawo ang daguob kag ang tunog sang budyong, kag makita ang kilat kag ang bukid nga nagaaso, nagkurog sila sa kahadlok kag nagtindog sa malayo.

19 Nagsiling sila kay Moises, "Ikaw ang maghambal sa amon kag mamati kami, kay kon ang Dios ang maghambal mapatay kami."

20 Nagsiling si Moises sa mga tawo, "Indi kamo magkahadlok, ang Dios nagkari sa pagtilaw sa inyo, agod magpadayon kamo sa pagkahadlok sa iya, kag indi magpakasala."

21 Pero ang mga tawo nagtindog gihapon sa malayo, kag si Moises lamang ang nagpalapit sa maitom nga gal-om sa diin yara ang Dios.

Mga Kasugoan nahanungod sa Altar

22 Ang Ginoo nagsiling kay Moises, "Amo ini ang dapat mo isiling sa mga Israelinhon: Nakita ninyo nga ako nagpakighambal sa inyo gikan sa langit.

23 Indi kamo maghimo para sa inyo kaugalingon sing mga dios nga pilak ukon bulawan nga simbahon ninyo subong sang inyo pagsimba sa akon.

24 Maghimo ka sing altar nga duta para sa akon, kag sa sini magdulot ka sing mga halad nga sinunog kag sang halad sa paghiambit, ang imo mga karnero kag ang imo mga baka. Sa tagsa ka duog nga ginasiling ko sa imo nga magsimba ka sa akon, magaduaw ako sa imo kag pagabendisyunan kamo.

25 Kon maghimo ka sing altar nga bato sa akon, indi mo paghimuon ini sa binasbasan nga mga bato, kay kon gamitan mo ini sang imo mga sinsil ginadagtaan mo ini.

26 Indi ka magsaka sa akon altar paagi sa mga halintang, agod indi ka diri mabihangan. 

Exodo 19 | Exodo 21