Exodo 5

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Si Moises kag si Aaron sa atubangan ni Paraon

1 Karon si Moises kag si Aaron nagkadto kay Paraon kag nagsiling, "Amo ini ang ginsiling sang Ginoo, ang Dios sang Israel, 'Tugoti sa paglakat ang akon mga tawo, agod nga maghiwat sila sa akon sing piesta sa desierto.' "

2 Nagsabat si Paraon, "Sin-o bala ang Ginoo? Ngaa bala magpamati ako sa iya, kag palakton ko ang mga Israelinhon? Wala ako makakilala sa Ginoo. Indi ko gid pagtugotan nga maglakat ang mga Israelinhon."

3 Nagsiling sila, "Ang Dios sang mga Hebreo nagpakigkita sa amon. Kon mahimo tugoti kami sa paglakat sing tatlo ka adlaw sa desierto agod magdulot sing halad sa Ginoo nga amon Dios. Kon indi kami maghalad, pamatyon niya kami paagi sa balatian ukon sa inaway.”

4 Ang hari sang Egipto nagsiling kay Moises kag kay Aaron, "Ano ang buot ninyo silingon sa pag-awat sang mga tawo sa ila pagtrabaho? Balik kamo sa inyo mga obra, kamo nga mga ulipon.

5 Ini nga mga tawo nagadamo nga nagadamo pa gid sang sa tumandok nga mga Egiptohanon. Karon, inyo bala sila pauntaton sa pag-obra?"

6 Sa amo man nga adlaw si Paraon nagmando sa mga kabo nga Egiptohanon kag sa mga manugdumala nga Israelinhon,

7 "Indi na kamo maghatag sing mga dagami nga himuon nga tisa, subong sang inyo ginhimo; palakta sila kag sila ang pakuhaa sing dagami.

8 Pero pahimuon ninyo sila sing amo man gihapon kadamo nga mga tisa nga ila sadto ginhimo. Indi ninyo pagbuhini ang kadamo. Mga matamad sila, kag amo ina nga nagareklamo sila kag nagasiling, ‘Palakta kami agod magdulot sing halad sa amon Dios!'

9 Paobraha pa gid ini nga mga tawo sing tudotudo, agod magadamo pa gid ang ila maobra, sa baylo nga magpamati sa mga hambal nga binutig.”

10 Ang mga kabo kag ang mga manugdumala sang mga tawo naggwa kag nagsiling sa ila, "Amo ini ang ginsiling ni Paraon, 'Indi na ako maghatag sa inyo sing mga dagami.

11 Maglakat kamo kag kamo ang magpangita sini bisan diin, pero maghimo kamo sing amo man gihapon kadamo nga mga tisa.'"

12 Gani ang mga tawo naglalapta sa bug-os nga duta sang Egipto sa pagpanguha sing dagami.

13 Ang mga kabo nag-apura sa ila nga nagasiling, "Maghimo kamo sing amo man gihapon kadamo nga mga tisa kadamo nga mga tisa kada adlaw, subong sang inyo ginhimo anay sang ginahatagan pa kamo sing dagami."

14 Ang mga kabo ni Paraon nagkastigo sang mga manugdumala nga Israelinhon, nga ila ginpadumala sa pag obra, kag nagpamangkot sa ila, “Ngaa nga wala kamo maghimo sing amo man kadamo nga mga tisa karon, subong sang inyo ginhimo sang una?"

15 Ang mga manugdumala nga Israelinhon nagkadto kay Paraon, kag nagreklamo nga nagasiling, "Mahal nga Hari, ngaa bala ginahimo nimo ini sa amon?

16 Wala man sing ginhatag sa amon nga mga dagami, pero ginapahimo kami sang tisa! Kag karon, Mahal nga Hari, ginakastigo kami. Imo ini sala.”

17 Nagsabat si Paraon, "Mga matamad gid kamo, amo ina nga nagasiling kamo, ‘Palakta kami sa pagdulot sang halad sa Ginoo.'

18 Karon balik kamo sa inyo obra. Wala sing dagami nga ihatag sa inyo, pero kinahanglan nga amo man gihapon kadamo nga mga tisa ang inyo himuon."

19 Ang mga manugdumala nga Israelinhon nabutang sa ital-ital nga kahimtangan sang ginsilingan sila, "Dapat kamo maghimo sing amo man gihapon kadamo nga mga tisa kada adlaw."

20 Sang paghalin nila kay Paraon, nasugata nila si Moises kag si Aaron, nga nagahulat sa ila,

21 kag nagsiling sila kay Moises kag kay Aaron, "Kabay nga matalupangdan sang Ginoo ang inyo ginhimo kag magsilot sa inyo, kay tungod sa inyo ginadumtan kami ni Paraon kag sang iya mga opisyales. Kamo ang naghatag sa ila sing espada sa pagpatay sa amon.”

Ang Pangamuyo ni Moises

22 Gani nagbalik si Moises sa Ginoo kag nagsiling, “Ginoo, ngaa bala ginapintasan mo ini nga mga tawo? Ngaa bala ginpadala mo ako?

23 Sugod sang akon pagkadto kay Paraon sa paghambal tungod sa imo, ginpintasan niya ang imo mga tawo kag wala gid ikaw magbulig sa ila!" 

Exodo 4 | Exodo 6