1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
☆☆☆
Ginpahibalo ni Moises ang Pagpatay sang mga Panganay
1 Ang Ginoo nagsiling kay Moises, “Hatagan ko sing isa na lang ka silot si Paraon kag ang mga Egiptohanon. Tapos sina, palakton na niya kamo. Kon sa bagay, kon palakton na niya kamo pagatabugon niya kamo tanan pa gwa.
2 Karon hambala ang mga tawo, kag singgana ang tagsa ka lalaki kag babayi sa pagpangayo sa iya kasilingan sing alahas nga pilak kag bulawan.”
3 Ginhimo sang Ginoo nga ang mga Egiptohanon magtahod sa mga Israelinhon. Matuod gid nga ang mga opisyales kag ang mga tawo nagkilala kay Moises nga isa ka gamhanan nga tawo.
4 Si Moises nagsiling kay Paraon, "Amo ini ang ginasiling sang Ginoo: ‘Sa mga tungang gab-i kadtuan ko ang mga Egiptohanon,
5 kag ang tanan nga mga panganay nga lalaki sa Egipto mapatay, halin sa panganay nga lalaki ni Paraon nga amo ang manunobli sang trono, tubtob sa panganay nga lalaki sang ulipon nga babayi nga nagagaling sing mais didto sa galingan. Ang tanan nga panganay sang kahayupan mapatay man.
6 May tudo nga paghinibi sa bug-os nga duta sang Egipto nga wala pa gid matabo halin sang una, ukon mahanabo pa liwat.
7 Pero sa mga Israelinhon bisan pa ang ido indi magtaghol sa mga tawo ukon sa mga kahayupan, agod imo mahibaluan nga ang Ginoo nagbutang sing kinatuhay sa mga Egiptohanon kag sa mga Israelinhon.'
8 Dayon ining tanan mo nga mga opisyales magapalapit sa akon kag magaluhod sa akon atubangan nga nagasiling, ‘Lakat ka, ikaw kag ang tanan mo nga mga tawo!' Sa tapos sina, malakat ako." Dayon si Moises naakig gid kag ginbayaan niya si Paraon.
9 Ang Ginoo nagsiling kay Moises, “Indi magpamati si Paraon sa imo, agod maghimo ako sing madamo pa nga mga milagro sa duta sang Egipto."
10 Ginhimo ni Moises kag ni Aaron ini tanan nga mga milagro sa atubangan ni Paraon, pero ang Ginoo nagpatig-a sang tagipusoon ni Paraon, kag wala niya pagtugoti ang mga Israelinhon sa paghalin sa iya pungsod.
No comments:
Post a Comment