1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
☆☆☆
Ang Pascua
1 Amo ini ang ginhambal sang GINOO kay Moises kag kay Aaron sa duta sang Egipto,
2 “Ini nga bulan amo ang manginnahauna nga bulan sang tuig para sa inyo.
3 Ipahibalo ninyo sa bug-os nga katilingban sang Israel nga sa ikanapulo nga adlaw sini nga bulan, ang tagsa ka tawo magpili sang isa ka cordero ukon tinday nga kanding para sa iya panimalay, isa ka sapat para sa isa ka panimalay.
4 Kon ang isa ka panimalay tama ka diutay nga indi makaurot sang isa ka bilog, sia kag ang iya kaingod suno sa ila kadamuon, magtingob kag magkuha sang isa ka cordero ukon tinday nga kanding. Pat-uron ninyo kon pila ka tawo ang makakaon sang isa ka bilog, suno sa pagbanabana ninyo nga makaon sang isa ka tawo.
5 Kinahanglan ang cordero ukon kanding wala wala sing depekto, isa ka lalaki nga isa pa lang ka tuig; magpili kamo sa karnero ukon sa kanding.
6 Bukoton ninyo ini tubtob sa ika-14 nga adlaw sang bulan kag sa sini nga adlaw ang bug-os nga Israel mag-ihaw sini sa kahapunanon.
7 Dayon magakuha sila sing dugo kag ila ipalhit ini sa mga bakalan sang puwerta kag sa ibabaw sang puwertahan sang mga balay sa diin pagakaunon nila ang kordero ukon kanding.
8 Sa sina nga gab-i litsunon nila ini, kag kaunon nila upod sa tinapay nga wala sing lebadora, kag sa mapait nga mga tanom.
9 Indi ninyo pagkaunon ini nga hilaw ukon linaga, kundi litsunon ini nga bilog upod ang iya ulo, mga tiil kag mga kasudlan.
10 Uroton ninyo ini sing kaon kag kon may mabilin gid man sa aga, sunogon ninyo ini.
11 Sa inyo pagkaon sini magwagkos kamo sang inyo mga hawak, kag magsuksok sang inyo mga sandalyas, kag mag-uyat kamo sang inyo mga sungkod, kag kauna ninyo ini sing dalidali. Amo ini ang Piesta sang Pascua sang GINOO.
12 Sa sina gid nga gab-i magaagi ako sa duta sang Egipto, kag pamatyon ko ang tagsa ka lalaki nga panganay sa duta, sang mga tawo kag sang mga kahayupan. Silutan ko ang tanan nga diosdios sang Egipto. Ako amo ang GINOO.
13 Ang dugo amo ang tanda sa mga balay nga inyo ginpuy-an. Kon makita ko ang dugo sa inyo mga balay magaligad lang ako sa inyo, kag ang kalaglagan tungod sang akon pagsilot sa duta sang Egipto indi makalambot sa inyo.
14 Ini nga adlaw inyo gid pagadumdomon. Dapat ninyo ini saulogon subong isa ka piesta sa GINOO. Dapat ninyo ini saulogon tuigtuig subong piesta sa tanan nga mga kaliwatan nga palaabuton.”
15 "Sa sulod sang pito ka adlaw dapat kamo magkaon sing tinapay nga wala sing lebadora. Sa nahauna nga adlaw kuhaa ninyo tanan nga mga lebadora sa inyo mga balay, kay ang magkaon sang tinapay nga may lebadora halin sa nahauna nga adlaw tubtob sa ikapito nga adlaw, pagaseparahon sia sa Israel.
16 Sa nahauna nga adlaw, kag sa ikapito nga adlaw, dapat kamo maghiwat sing balaan nga pagtililipon. Wala sing may mag-obra sa sina nga mga adlaw, pero sarang kamo makaaman sing pagkaon para sa tagsa ka tawo.
17 Saulogon ninyo ining piesta sang tinapay nga wala sing lebadora, kay sa sini nga adlaw ginpagwa ko ang inyo mga soldado halin sa duta sang Egipto. Saulogon ninyo ini nga adlaw subong piesta tuigtuig sa tanan nga kaliwatan.
18 Halin sa kahapunanon sang ika-14 nga adlaw tubtob sa kahapunanon sang 21 nga adlaw sang nahauna nga bulan, dapat kamo magkaon sang tinapay nga wala sing lebadora.
19 Sa sulod sang pito ka adlaw wala sing lebadora nga makita sa inyo mga balay, kay ang magkaon sang tinapay nga may lebadora, tumandok man sia ukon dumoluong, pagaseparahon sia sa katilingban sang Israel.
20 Indi kamo dapat magkaon sang tinapay nga may lebadora, kundi magkaon kamo sang tinapay nga wala sing lebadora sa inyo mga balay.”
21 Ginpatawag ni Moises ang tanan nga pangulo sang Israel kag ginsingganan sila, "Lakat kamo kag magpili sang kordero ukon tinday nga kanding para sa inyo mga panimalay, kag ihawon ini para sa Pascua.
22 Magkuha kamo sang sanga sang isopo, itum-oy sa dugo nga yara sa batiya, kag ipalhit ang dugo sa mga bakalan sang puwerta kag sa ulohan sang puwertahan. Wala sing may maggwa sa inyo balay tubtob sa aga.
23 Kon mag-agi ang Ginoo sa bug-os nga Egipto sa pagpamatay sang mga Egiptohanon, makita niya ang dugo nga napalhit sa ulohan kag sa mga bakalan sang puwertahan, kag indi niya pagtugotan ang manuglaglag nga magsulod sa inyo balay sa pagpatay.
24 Tumana ninyo ini nga mga pagsulondan tuigtuig subong tulomanon ninyo kag sang inyo palaabuton nga mga kaanakan.
25 Kag sa inyo pagsulod sa duta nga ginsaad sang Ginoo nga ihatag sa inyo, dapat ninyo tumanon ini nga seremoniya.
26 Kon ang inyo mga kabataan mamangkot sa inyo, 'Ano ang kahulogan sini nga pagsulondan?'
27 Magsabat kamo, ‘Ini amo ang halad sang Pascua sa Ginoo, kay ginligaran niya ang mga balay sang mga Israelinhon sa Egipto sang pagpamatay niya sang mga Egiptohanon kag wala niya pag-anha ang amon mga puloy-an.' " Ang mga tawo nagluhod kag nagsimba.
28 Ang mga Israelinhon naglakat kag nagtuman. Ginhimo nila ang ginsugo sang Ginoo kay Moises kag kay Aaron.
Ang Pagpamatay sang mga Panganay
29 Sang tungang gab-i ang Ginoo nagpamatay sang tanan nga mga panganay nga lalaki sa Egipto, halin sa panganay nga lalaki ni Paraon, nga manunobli sang iya trono, tubtob sa panganay nga mga anak nga lalaki sang mga binilanggo didto sa bilangguan nga madulom; kag ang tanan nga mga panganay sang mga kahayupan ginpamatay man.
30 Si Paraon, ang tanan niya nga mga opisyales, kag ang tanan nga mga Egiptohanon nagbulogtaw sa sina nga gabi, kag may tudo nga paghinibi sa Egipto, kay wala gid sing balay nga wala mapatyi sang anak nga lalaki.
31 Sa amo gid nga gab-i, ginpatawag ni Paraon si Moises kag si Aaron kag ginsingganan, "Kamo kag ang mga Israelinhon magdalidali kag maghalin diri! Bayai ninyo ang akon mga tawo, kag maglakat sa pagsimba sa Ginoo suno sa ginpangayo ninyo.
32 Dalha ang inyo mga karnero, mga kanding, kag mga baka suno sa inyo ginpangayo kag maglakat kamo. Magpangamuyo kamo nga bendisyunan man ako.”
33 Ang mga Egiptohanon nag-apura sa mga tawo nga maglakat kag maghalin sa pungsod. Nagsiling sila, "Magakalamatay kami tanan kon indi kamo maghalin.”
34 Gani ang mga tawo naghimos sang ila linamas nga wala sing lebadora kag gin-uribay nila ang ila mga lamasan nga nabagtong sa ila mga bayu.
35 Gintuman sang mga Israelinhon ang ginsiling ni Moises, kag nagpangayo sila sing mga alahas nga pilak kag bulawan kag mga bayu sa mga Egiptohanon.
36 Ginhimo sang Ginoo nga ang mga Egiptohanon magtahod sa mga Israelinhon, kag ginhatag sa ila ang ila ginapangayo. Kag ginsigputan sang mga Israelinhon ang mga Egiptohanon.
Ang mga Israelinhon Naghalin sa Egipto
37 Ang mga Israelinhon naglakat halin sa Rameses pakadto sa Sucot. Ang kadamuon sang mga lalaki nga naglakat mga 600,000, wala labot ang mga babayi kag mga kabataan.
38 May madamo man nga iban nga mga tawo, madamo nga mga karnero, mga kanding, kag mga kabakahan man ang nag-upod sa ila.
39 Naghimo sila sing tinapay nga wala sing lebadora gikan sa linamas nga ila gindala halin sa Egipto. Wala ini sing lebadora, kay gintabog sila sing hinali halin sa Egipto, kag wala sila sing tion sa pag-aman sang ila kaugalingon nga mga kalan-on.
40 Ang mga Israelinhon nagpuyo sing 430 ka tuig sa Egipto.
41 Sa amo gid nga adlaw, sa katapusan sang 430 ka tuig, ang tanan nga mga hangaway sang Ginoo naggwa sa Egipto.
42 Amo ini ang gab-i nga ang Ginoo nagbantay sa ila agod makagwa sila sa Egipto. Amo man ini ang gab-i nga ginpain para sa Ginoo, sa tanan nga mga kaliwatan sang mga lsraelinhon nga ila dapat saulogon.
Mga Pagsulondan Nahanungod sa Pascua
43 Ang Ginoo nagsiling kay Moises kag kay Aaron, "Amo ini ang mga pagsulondan sa Pascua: Wala sing dumoluong nga magkaon sini,
44 pero ang tagsa ka ulipon nga ginbakal, makakaon sini, sa tapos sia matuli.
45 Wala sing dumoluong ukon sinuholan nga obrero nga makakaon sini.
46 Dapat ini kaunon sa isa ka balay; indi ninyo ini pagdal-on sa gwa sang balay kag indi ninyo pagbalion ang iya sini tul-an.
47 Ang bug-os nga katilingban sang Israel dapat magsaulog sini nga piesta.
48 Kon may dumoluong nga nagapuyo upod sa imo kag luyag magsaulog sini nga Pascua sang Ginoo, imo anay tulion ang tanan nga mga lalaki sa iya panimalay. Dayon makabuylog sia sa inyo sa piesta. Dapat sia kabigon subong tumandok nga Israelinhon. Pero wala sing di-tinuli nga makakaon sini.
49 Amo man ini ang pagsulondan sa tumandok nga Israelinhon kag sa dumoluong nga nagapuyo upod sa inyo."
50 Gintuman ini sang tanan nga mga Israelinhon, kag ginhimo nila ang ginsugo sang Ginoo kay Moises kag kay Aaron.
51 Sa amo gid nga adlaw ginpagwa sang Ginoo ang mga Israelinhon sa Egipto, nga padason ang ila mga hangaway.
No comments:
Post a Comment