Exodo 10

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang mga Apan

1 Ang Ginoo nagsiling kay Moises, "Kadtoi si Paraon. Ginpatig-a ko ang iya tagipusoon kag ang tagipusoon sang iya mga opisyales, agod nga mahimo ko ining mga milagro sa ila,

2 kag agod nga masugid mo sa imo mga kaanakan, kag sa imo mga kaapuhan kon ano ang pagbuang ko sa mga Egiptohanon sang paghimo ko sing mga milagro sa ila. Tanan kamo magakilala nga ako amo ang Ginoo."

3 Gani nagkadto si Moises kag si Aaron kay Paraon, kag nagsiling sa iya, "Amo ini ang ginasiling sang Ginoo, ang Dios sang mga Hebreo, ‘San-o pa bala ikaw magpaidalom sang imo kaugalingon sa akon? Tugoti ang akon mga tawo sa paglakat, agod makasimba sila sa akon.

4 Kon indi pa nimo pagpalakton ang akon mga tawo, ti buas magapadda ako sang mga apan sa imo pungsod.

5 Pun-on nila ang duta, sa bagay nga indi na ini makita. Pagakaunon nila ang tanan nga mga tanom, kag ang tanan nga nabilin nga wala malaglag sang ulan nga yelo.

6 Mapuno sing mga apan ang imo palasyo kag ang mga balay sang imo mga opisyales kag sang imo mga tawo. Sobra pa ini sang sa nakita sang inyo mga ginikanan kag mga katigulangan halin sang pag-abot nila sa sini nga duta.’” Dayon gintalikdan niya kag ginbayaan si Paraon.

7 Ang mga opisyales ni Paraon nagsiling sa iya, "San-o pa bala mag-untat ang paggamo sini nga tawo sa aton? Palakta na lang ina nga mga tawo, agod nga makasimba sila sa Ginoo nga ila Dios. Wala mo bala makita nga ang Egipto nalaglag na?"

8 Gani si Moises kag si Aaron ginpabalik liwat kay Paraon, kag si Paraon nagsiling sa ila, "Lakat kamo kag magsimba sa Ginoo nga inyo Dios, pero sin-o ang magalakat?"

9 Nagsabat si Moises, "Magalakat kami tanan, upod ang amon mga kabataan kag mga katigulangan. Magalakat kami upod ang amon mga anak nga Ialaki kag babayi, ang amon mga karnero kag mga kanding, kag ang amon mga baka, kay magahiwat kami sang piesta sa Ginoo.”

10 Si Paraon nagsiling sa ila, "Kabay nga ang Ginoo mag-upod sa inyo! Indi ako magtugot nga dalhon ninyo ang mga kababayin-an kag mga kabataan! Maathag nga nagatuyo kamo sa paggamo.

11 Gani ang mga lalaki lamang ang maglakat, kag magsimba sa Ginoo, kon amo ina ang luyag ninyo." Dayon ginpahalin sila sa atubangan ni Paraon.

12 Ang Ginoo nagsiling kay Moises, "Bayawa ang imo kamot sa duta sang Egipto agod mag-abot ang mga apan. Kaunon nila ang tanan nga tanom nga nagatubo, nga wala malaglag sang ulan nga yelo."

13 Gani ginbayaw ni Moises ang iya sungkod, kag ang Ginoo nagpahuyop sang salatan sa ibabaw sang duta sa bilog nga adlaw kag gab-i. Sang pagkaaga ang salatan nagdala sang mga apan.

14 Nagtugob ini kag nagpabilin sa bug-os nga duta sang Egipto. Amo ini ang labing madamo nga apan nga wala pa gid sing kaangay sini halin sang una, ukon may kaangay pa sini sa ulihi.

15 Gintugob nila ang duta sa bagay nga ang duta nagdulom lang sang apan. Ginkaon nila ang tanan nga nagatubo sa duta, kag ang tanan nga bunga sang mga kahoy, nga wala malaglag sang ulan nga yelo. Wala sing nabilin nga malagtom nga tanom ukon kahoy sa bug-os nga duta sang Egipto.

16 Sa gilayon ginpatawag ni Paraon si Moises kag si Aaron kag ginsingganan, "Nakasala ako batok sa Ginoo nga inyo Dios kag batok sa inyo.

17 Karon kon mahimo patawara ako sang akon sala sing makaisa na gid lang, kag magpangamuyo kamo sa Ginoo nga inyo Dios agod kuhaon niya ining makamamatay nga silot sa akon.”

18 Ginbayaan ni Moises si Paraon, kag nagpangamuyo sia sa Ginoo.

19 Ang Ginoo nagliso sa huyop sang hangin kag nagpahuyop sang mabaskog nga kanaway, kag nagdala ini sang mga apan sa Mapula nga Dagat. Wala sing nabilin nga apan sa Egipto.

20 Pero ang Ginoo nagpatig-a sang tagipusoon ni Paraon, kag wala sia magtugot sa mga lsraelinhon sa paglakat.

Ang Kadudolman

21 Ang Ginoo nagsiling kay Moises, "Bayawa ang imo kamot sa langit, agod ang mangitungito nga kadudolman maglikop sa bug-os nga duta sang Egipto."

22 Ginbayaw ni Moises ang iya kamot sa langit, kag may mangitungito nga kadudolman sa duta sang Egipto sa sulod sang tatlo ka adlaw.

23 Ang mga Egiptohanon indi makakita sa isa kag isa, kag wala sing bisan isa sa ila nga naghalin sa ila mga balay sa sulod sang tatlo ka adlaw. Pero may kasanag iya didto sa ginapuy-an sang mga Israelinhon.

24 Ginpatawag ni Paraon si Moises kag ginsingganan, "Lakat na kamo sa pagsimba sa Ginoo; bisan ang inyo mga kababayin-an kag mga kabataan makaupod sa inyo. Ibilin lang ninyo diri ang inyo mga karnero, mga kanding kag mga baka."

25 Nagsabat si Moises, "Kinahanglan hatagan mo kami sing mga sapat para sa mga halad kag sa mga halad nga sinunog nga idulot namon sa Ginoo nga amon Dios.

26 Kinahanglan dalhon man namon ang amon mga kahayupan kag wala sing bisan isa sa ila nga amon ibilin. Magapili kami sang mga sapat nga amon ihalad sa pagsimba sa Ginoo nga amon Dios. Sa wala pa kami makaabot didto, indi kami makahibalo kon ano ang amon ihalad sa pagsimba sa GINOO.”

27 Ang Ginoo nagpatig-a sang tagipusoon ni Paraon kag wala niya sila pagtugoti sa paglakat.

28 Nagsiling sia kay Moises, "Gwa to. Indi ka na magpakita sa akon liwat, kay kon makit-an ko pa ikaw, patyon ko ikaw."

29 Nagsabat si Moises, "Kon amo ina ang luyag mo, indi na ako magpakita liwat sa imo!"

Exodo 9 | Exodo 11