Exodo 39

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40

☆☆☆

Ang Paghimo sang mga Bayu para sa mga Pari

(Ex. 28:1-14)

1 Naghimo sila sing malahalon nga mga bayu nga asol, granate kag pula nga delana para sa pag-alagad sang mga pari sa santuaryo. Naghimo sila sang balaan nga mga bayu para kay Aaron, suno sa ginsugo sang Ginoo kay Moises.

2 Naghimo sia sang bestidora nga bulawan, delana nga asol, granate, kag pula kag sang mapino nga nagakunotkunot nga lino.

3 Ginpapa nila ang bulawan sa pinanid nga manipis, gingihaygihay nila ini nga daw mga hilo kag ginsamay sa delana nga asol, granate, kag pula, kag sa mapino nga lino nga nabordahan.

4 Naghimo sila sing mga terante nga naangot sa naibabaw nga bahin sang bestidora.

5 Ang paha nga hinabol sing matahom unay sa sini, kag pareho gid sini ang pag-obra nga nahimo sa bulawan, delana nga asol, granate kag pula kag mapino nga nagakunotkunot nga lino, suno sa ginsugo sang Ginoo kay Moises.

6 Naghimo sila sing malahalon nga mga bato nga kornalina, kag gintakod sa mga balayan nga bulawan. Ginsinsil ini pareho sang pagsinsil sang selyo nga may ngalan sang mga anak nga lalaki ni Israel.

7 Gintakod niya ini sa mga terante sang epod, subong mga malahalon nga mga bato sa pagdumdom sang mga anak nga lalaki ni Israel, suno sa ginsugo sang Ginoo kay Moises.

Ang Paghimo sang Piktoral 

(Ex. 28:15-30)

8 Ginhimo niya ang piktoral, nga nabordahan sing matahom subong sang epod. Ginhimo nila ini sa bulawan, delana nga asol, granate, kag pula, kag mapino nga nagakunotkunot nga lino.

9 Ginhimo nila ini nga kwadrado kag ginpilo sing doble, siyam ka pulgada ang kalabaon, kag siyam ka pulgada ang kasangkaron.

10 Gintakdan nila ini sing apat ka kubay sang malahalon nga mga bato: sa nahauna nga kubay rubi, topasio, kag karbunklo,

11 sa ikaduha nga kubay esmeralda, sapiro, kag diamante,

12 sa ikatlo nga kubay, hasinto, agate kag ametista

13 kag sa ikaapat nga kubay, berilo, kornalina, kag jaspe. Gintakod ini sa mga balayan nga bulawan.

14 May dose ka malahalon nga mga bato, nga nasulatan sang mga ngalan sang mga anak nga lalaki ni Israel. Ginsinsil ini pareho sang mga selyo nga ang kada isa may ngalan sang isa sang 12 ka tribo.

15 Naghimo sila sing kulintas nga puraw nga bulawan nga linubid para sa piktoral.

16 Naghimo sila sing duha ka mga balayan nga bulawan kag duha ka singsing nga bulawan, kag gintakod nila ang duha ka singsing sa duha ka pamusod nga naibabaw sang piktoral.

17 Gintakod nila ang duha ka linubid nga bulawan sa duha ka mga singsing,

18 kag gintakod ang duha man ka punta sang linubid nga bulawan sa duha ka mga balayan, kag sa sini nga paagi ginatakod ini sa atubangan nga terante sang epod.

19 Naghimo sila sing duha ka singsing nga bulawan kag gintakod ini sa idalom nga pamusod sang piktoral sa sulod nayon nga sidsid sang epod.

20 Naghimo pa gid sila sing duha ka singsing nga bulawan kag gintakod ini sa idalom nga bahin sa atubangan sang duha ka terante sang epod, malapit sa sidsid kag sa ibabaw sang matahom kag hinabol nga paha sang epod.

21 Gintabid nila sang asol nga lubid ang mga singsing sang piktoral kag ang mga singsing sang epod, agod nga ang piktoral mahamtang sa ibabaw sang paha kag indi mapalos, suno sa ginsugo sang Ginoo kay Moises.

Ang Paghimo sang lban nga mga Bayu para sa mga Pari

(Ex. 28:31-43)

22 Naghimo man sia sing alba nga hinabol nga nagalabaw sa puro nga delana nga asol.

23 Ang liab sang alba subong sang liab sang kamesita. Ang palibot sang liab naapurohan sing hinabol, agod nga indi ini magisi.

24 Sa iya sini naidalom nga sidsid ginhimuan nila sing daw granada nga delana nga asol, granate, kag pula, kag mapino nga nagakunotkunot nga lino.

25 Naghimo sila sing mga kampanilya nga puraw nga bulawan, kag ginpanakod ini sing bal-utbal-ot sa mga granada sa palibot sa naidalom nga sidsid.

26 May kubay sang mga kampanilya kag sang mga granada sa palibot sang naidalom nga sidsid sang alba, nga gingamit sa pag-alagad subong nga pari, suno sa ginsugo sang Ginoo kay Moises.

27 Naghimo man sila sing mga tunika sa nahabol nga mapino nga lino para kay Aaron kag sa iya mga anak nga mga lalaki,

28 sang turban nga mapino nga lino, kag sang mga gora nga mapino nga lino, sang mga karsonsilyo nga mapino nga lino kag nagakunotkunot,

29 sang singgulo nga mapino nga lino nga nagakunotkunot, kag delana nga asol, granate, kag pula, nga nabordahan, suno sa ginsugo sang Ginoo kay Moises.

30 Naghimo sila sing adorno nga puraw nga bulawan, balaan nga tanda sang paghalad kag ila ginsinsilan sang masunod nga mga pulong "Nahalad sa Ginoo," pareho sang pagsinsil sang selyo.

31 Ginhigot nila ini sa ibabaw sang turban, sa lubid nga asol suno sa ginsugo sang Ginoo kay Moises.

Ang Pagtapos sang Obra

(Ex. 35:10-19)

32 Ang tanan nga obra sa puloy-an sang Tolda nga Tilipunan natapos. Ang mga Israelinhon naghimo sang tanan suno sa ginsugo sang Ginoo kay Moises.

33 Gindala nila kay Moises ang Tilipunan, ang Tolda, kag ang tanan niya nga mga kasangkapan, ang iya mga kaw-it, ang iya mga dingding nga tapi, ang iya mga baral, ang iya mga haligi kag ang iya mga sadsaran,

34 ang taklap nga panit sang mga karnero nga ginlugom sa pula, ang sampaw sa taklap nga maayo nga panit, ang kurtina nga nagalipon,

35 ang kaban nga nasudlan sang malapadlapad nga bato sang kasugtanan, ang iya mga yayungan, kag ang takop,

36 ang lamisa kag ang tanan sini nga kasangkapan, ang tinapay nga nahalad sa Dios,

37 ang kandilerohan nga puraw nga bulawan, ang iya mga suga, ang mga suga nga napahamtang sing idas, kag ang tanan sini nga mga kasangkapan, ang lana para sa mga suga,

38 ang altar nga bulawan, ang lana nga inughaplas, ang mahamot nga insyenso, ang kurtina sa puwertahan sang tolda,

39 ang altar nga saway kag ang iya parilyahan nga saway, ang iya mga yayungan, kag ang tanan niya nga mga kasangkapan, ang labador kag ang iya tulongtongan,

40 ang mga kurtina nga ginabungbong, ang mga haligi, mga sadsaran, ang kurtina sa puwertahan sang bungbong, ang iya mga banting, ang mga palpal sang Tolda, kag ang tanan nga mga kasangkapan sa pag-alagad sa Tolda nga Tilipunan,

41 ang mga bayu nga malahalon para sa pag-alagad subong mga pari sa santuaryo, ang balaan nga mga bayu para kay Aaron nga pari, kag ang mga bayu para sa iya mga anak nga lalaki kon mag-alagad sila subong mga pari.

42 Ang mga Israelinhon naghimo sang tanan nga bulohaton suno sa ginsugo sang Ginoo kay Moises.

43 Gin-usisa ni Moises ang tanan nga mga butang nga ila ginhimo, kag iya nakita nga ginhimo nila ini tanan suno sa ginsugo sang Ginoo. Gani ginbendisyunan sila ni Moises.

Exodo 38 | Exodo 40