☆☆☆
Ang Pagkadi-matinumanon sang mga Tawo
1 “Pamati kamo, mga tawo sang Israel! Manugtabok na kamo sa suba sang Jordan kag inyo panag-iyahan ang duta sang mga kapungsoran nga daku kag gamhanan pa sang sa inyo. Ang ila mga siyudad dalagku nga ang ila mga pader palibot nagalambot sa langit.
2 Ang mga tawo mismo matag-as kag makusog; mga higante sila kag inyo nabatian ang sugid nga wala sing may makabato sa ila.
3 Pero karon makita gid ninyo nga ang Ginoo nga inyo Dios magauna sa inyo kaangay sang isa ka nagadabdab nga kalayo. Lutoson niya sila samtang nagaabanse kamo, agod matabog ninyo sila kag malaglag gilayon suno sa iya ginsaad.
4 "Sa tapos sila matabog sang Ginoo nga inyo Dios, indi kamo magsiling sa inyo kaugalingon nga gindala niya kamo diri sa pagpanag-iya sang duta kay takos kamo. Indi amo ina, ang Ginoo magatabog sini nga mga tawo kay malaut sila.
5 Indi tungod kay maayo kamo kag nagahimo sing matarong nga ang Ginoo naghatag sa inyo sang ila duta. Tabugon niya sila tungod kay malaut sila, kag tungod kay luyag niya tumanon ang iya ginsaad sa inyo mga katigulangan nga amo sanday Abraham, Isaac kag Jacob.
6 Dumdoma ninyo nga ang Ginoo wala nagahatag sa inyo sining mapatubason nga duta tungod kay takos kamo. Ang matuod nga batinggilan gid kamo nga mga tawo.
7 "Indi ninyo pagkalimti kon daw ano ang pagpaakig ninyo sa Ginoo nga inyo Dios didto sa desierto. Halin sa adlaw nga naggwa kamo sa Egipto tubtob sang inyo pag-abot diri, nagsupak kamo sa iya.
8 Bisan didto sa bukid sang Sinai ginpaakig ninyo ang Ginoo, sa bagay nga handa sia sa paglaglag sa inyo.
9 Nagtaklad ako sa bukid sa pagkuha sang malapadlapad nga bato nga nasulatan sang kasugtanan nga ginhimo sang GINOO sa inyo. Nagpabilin ako didto sing 40 ka adlaw kag gab-i, kag wala ako magkaon kag mag-inom sang bisan ano.
10 Dayon ang Ginoo naghatag sa akon sing duha ka malapadlapad nga bato. Sa sini ginsulat niya sang iya kaugalingon nga kamot ang iya ginhambal sa inyo gikan sa kalayo sadtong adlaw nga nagtipon kamo didto sa bukid.
11 Sa tapos sadtong 40 ka adlaw kag gab-i ang Ginoo naghatag sa akon sang duha ka malapadlapad nga bato nga nasulatan sang kasugtanan.
12 "Dayon ang Ginoo nagsiling sa akon, 'Dulhog ka gilayon sa bukid kay ang imo mga tawo nga gindala pa gwa sa Egipto naghimo sing mga kalautan. Kadali sa ila magbiya sa akon ginsugo sa ila kag naghimo sila sing diosdios para sa ila kaugalingon.'
13 "Ang Ginoo nagsiling man sa akon, ‘Nahibaluan ko kon daw ano ang pagkabatinggilan sini nga mga tawo.
14 Pabay-i lang ako. Laglagon ko sila agod wala na sing magadumdom sa ila. Dayon himuon ko ikaw nga amay sang pungsod nga daku kag gamhanan pa sa ila.'
15 "Gani nagbalik ako kag nagdulhog sa bukid nga nagadala sang duha ka malapadlapad nga bato nga nasulatan sang kasugtanan. Ang bukid nagadabadaba sa kalayo.
16 Nakita ko nga kadali sa inyo maglapas sang sugo nga ginhatag sa inyo sang Ginoo nga inyo Dios, kag nagpakasala kamo batok sa iya paagi sa paghimo sa inyo kaugalingon sang diosdios nga tinday nga baka nga nahimo sa bulawan.
17 Gani, didto sa atubangan ninyo ginpusdak ko ang malapadlapad nga bato kag nagkalabuka ini.
 |
| Sa atubangan ninyo ginpusdak ko ang malapadlapad nga bato kag nagkalabuka ini. (9:17) |
18 Gani sa liwat naghapa ako sa atubangan sang Ginoo kag wala ako magkaon kag mag-inom sa sulod sang 40 ka adlaw kag gab-i. Ginhimo ko ini kay nagpakasala kamo batok sa Ginoo kag nagpaakig sa iya.
19 Hinadlukan ako sa nagabalingaso nga kaakig sang Ginoo kay naakig sia nga handa sa pagpatay sa inyo, pero sa liwat ang GINOO nagpamati sa akon.
20 Ang Ginoo naakig man kay Aaron nga daw patyon niya sia, kag sa sadto nga tion nagpangamuyo man ako para kay Aaron.
21 Ginkuha ko yadtong malaut nga butang nga inyo ginhimo—ang baka nga bulawan—kag ginhaboy ko sa kalayo. Dayon gindugmok ko ini, ginbukbok kaangay sang yab-ok, kag ginsabwag ko ini sa sapa nga nagailig halin sa bukid.
22 "Ginpaakig man ninyo ang Ginoo nga inyo Dios sang didto kamo sa Tabera, Masa, kag Kibrot-hataava.
23 Sang ginpadala kamo niya halin sa Cades Barnea nga may mando sa pagpanag-iya sang duta nga iya ginahatag sa inyo, nagsupak kamo sa iya. Wala kamo magsalig ukon magtuman sa iya.
24 Halin sang makilala ko kamo nagsupak kamo sa Ginoo.
25 "Gani naghapa ako sa atubangan sang Ginoo sa sulod sang 40 ka adlaw kag gab-i kay nagpamat-od sia sa paglaglag sa inyo.
26 Kag nagpangamuyo ako, ‘Ginoong Dios, kon mahimo indi paglaglaga ang imo kaugalingon nga mga tawo, ang mga tawo nga imo ginluwas kag ginpagwa sa Egipto paagi sa imo daku nga kusog kag gahom.
27 Dumdoma ang imo mga alagad nga sanday Abraham, Isaac, kag Jacob kag indi pagsapaka ang pagkabatinggilan, ang pagkamalaut, kag ang sala sini nga mga tawo,
28 kay basi ang mga Egiptohanon magsiling nga indi ikaw makasarang sa pagdala sang imo mga tawo sa duta nga imo ginsaad sa ila. Ang mga Egiptohanon magasiling nga gindala mo ang imo mga tawo sa desierto agod pamatyon sila kay gindumtan mo sila.
29 Kon sa bagay, ini nga mga tawo imo ginpili nga mangin-imo kaugalingon, kag ginpagwa mo sa Egipto paagi sa imo daku nga gahom kag kusog.'
No comments:
Post a Comment