☆☆☆
Ang Wala Mahibaloi nga Pagpatay sang Tawo
1 "Kon may isa ka tawo nga ginpatay nga nakita sa duta nga ginhatag sa imo sang Ginoo nga imo Dios, kag wala ka makahibalo kon sin-o ang mga nagpatay sa iya,
2 ang inyo mga pangulo kag mga hukom maggwa kag magtakos kon ano ang kalayuon sang duog nga napatyan pakadto sa tagsa ka malapit nga mga banwa.
3 Dayon ang mga pangulo sang banwa nga malapit sa duog sa diin makita ang bangkay magpili sang tinday nga baka nga wala pa gid matakdi sang gota.
4 Ila ini dalhon sa lugar nga malapit ang sapa nga wala gid mahubsi, kag ang duta wala pa gid maarado ukon matamni, kag didto lunggoon nila ang iya liog.
5 Ang mga pari nga Levinhon magkadto man didto, kay sila ang magahukom sang tagsa ka kaso sa inaway. Ang Ginoo nga inyo Dios nagpili sa ila sa pag-alagad sa iya kag sa paghatag sang bendisyon sa iya ngalan.
6 Dayon ang tanan nga mga pangulo halin sa mga banwa nga malapit sa duog sa diin nakit-an ang bangkay maghugas sang ila mga kamot sa ibabaw sang baka,
7 kag magsiling, 'Wala kami magpatay sang tawo kag wala man kami makahibalo kon sin-o ang naghimo sini.
8 Ginoo, patawara ang imo mga tawo nga mga Israelinhon, nga imo ginluwas Egipto. Patawara kami, kag indi kami pagpabangdi sa pagpatay sang tawo nga wala sing sala.'
9 Gani, paagi sa paghimo sang matarong nga ginapangayo sang Ginoo, indi kamo manabat tungod sang pagpatay.
Ang mga Bihag nga mga Babayi
10 "Kon ang Ginoo nga inyo Dios magpadaog sa inyo sa inaway kag may mga bihag kamo,
11 ayhan ang isa sa inyo makakita sa ila sang isa ka matahom nga babayi kag luyag niya pangasaw-on,
12 dalha sia sa inyo balay kag pakiskisan ang iya ulo, utda ang iya mga kuko,
13 kag pasuksoki sang lainlain nga mga bayu. Magpabilin sia sa imo puloy-an kag magalalaw sia para sa iya mga ginikanan sa sulod sang isa ka bulan. Pagkatapos sina, sarang mo sia mapangasawa.
14 Sa ulihi kon indi na ikaw sa iya, sarang mo sia mapalakat. Indi mo sia makabig nga isa ka ulipon kag ibaligya kay ginpilit mo sia sa pagpakighilawas sa imo.
Ang Panublion sang Panganay nga Anak nga Lalaki
15 "Kon ang isa ka tawo may duha ka asawa kag sila nga duha may anak nga lalaki sa iya, pero ang nahauna nga anak amo ang anak sang iya asawa nga biyabiya,
16 kon magpamat-od sia sa pagpartida sang iya mga pagkabutang sa iya mga kabataan indi sia magpakita nga ginapasulabi niya ang anak nga lalaki sang iya pinalangga nga asawa paagi sa paghatag sa iya sang parti sang nahauna nga anak.
17 Hatagan niya sing duha ka parti sang iya pagkabutang ang panganay niya nga anak, bisan indi sia anak sang pinalangga niya nga asawa. Ang tawo dapat magkilala sang iya panganay nga anak kag hatagan niya sia sang parti nga naigo sa iya.
Ang Indi Matinumanon nga Anak
18 "Kon ang isa ka tawo may anak nga matig-a sing ulo kag mabinatuon, nga indi magtuman sa iya mga ginikanan bisan nga silutan nila sia,
19 ang iya mga ginikanan magdala sa iya sa atubangan sang mga pangulo sang banwa sa diin sia nagapuyo, kag hukman nila sia.
20 Magasiling sila sa ila, 'Ang amon anak matig-a sing ulo kag mabinatuon kag wala nagatuman sa amon; palahubog sia kag gastador.'
21 Dayon ang mga pumoluyo sang siyudad magabato sa iya tubtob mapatay, kag ini nga kalautan makuha sa Israel. Ang tagsatagsa sa Israel nga makabati sini magaandam.
Ang mga Nagakalainlain nga mga Kasugoan
22 "Kon may isa ka tawo nga ginpatay tungod sang iya sala, kag ang iya bangkay nagakabit pa sa kahoy,
23 indi ini pag-ibilin didto sa sulod sang isa ka gab-i. Kinahanglan ilubong ini sa amo nga adlaw, kay ang bangkay nga nagakabit sa kahoy makangilil-ad sa Dios. Ilubong ang bangkay agod ini madagtaan ang duta nga ginhatag sa inyo sang GINOO nga inyo Dios.
No comments:
Post a Comment