☆☆☆
Ginbaton Liwat ni Moises ang mga Sugo
(Ex. 34:1-10)
1 "Dayon ang Ginoo nagsiling sa akon, 'Basbas ka sang duha ka malapadlapad nga bato kaangay sang nahauna, kag himo ka sang kaban nga kahoy nga imo butangan sini. Taklad ka sa bukid
2 kag isulat ko sa sining malapadlapad nga mga bato ang akon ginsulat sa malapadlapad nga mga bato nga imo ginbuka. Dayon isulod mo ini sa kaban.'
3 "Gani naghimo ako sing kaban nga akasya kag nagbasbas ako sang duha ka malapadlapad nga bato kaangay sang nahauna kag gindala ko ini sa ibabaw sang bukid.
4 Dayon ang Ginoo nagsulat sa sining malapadlapad nga mga bato sang amo man nga mga pulong nga iya ginsulat sa nahauna, ang Napulo ka Sugo nga ginhatag niya sa inyo sang maghambal sia gikan sa kalayo sadtong adlaw nga nagtipon kamo sa bukid. Ang GINOO naghatag sa akon sining malapadlapad nga mga bato,
5 kag nagbalik ako kag nagdulhog sa bukid. Dayon ginbutang ko ini sa kaban nga akon ginhimo, suno sa sang Ginoo, kag halin sadto didto ini."
6 (Ang mga Israelinhon nagbiya sang mga bubon nga iya sang mga pumoluyo sang Jaacan kag nagkadto sila sa Mosera. Si Aaron napatay kag ginlubong didto, kag ang iya anak nga si Eleazar nagbulos sa iya subong pari.
7 Halin didto nagkadto sila sa Gudgoda kag dayon sa Jotbata, ang duta nga may madamo sing tubig.
8 Didto sa bukid, ang Ginoo nagpili sang mga tawo gikan sa tribo ni Levi nga magadala sang Kaban sang Kasugtanan, sa pag-alagad sa iya subong mga pari kag sa pagbendisyon sa iya ngalan. Kag ginahimo nila ini tubtob karon nga adlaw.
9 Tungod sini, ang tribo ni Levi wala ginhatagi sang duta pareho sang iban nga mga tribo. Ang ila nabaton amo ang pagkapari suno sang ginsaad sang Ginoo nga inyo Dios.)
10 "Nagpabilin ako sa bukid sa sulod sang 40 ka adlaw kag gab-i, subong sang akon ginhimo sang una. Ang Ginoo nagpamati sa akon liwat kag wala niya kamo paglaglaga.
11 Dayon nagsiling sia nga ako mangin-inyo pangulo, agod makalakat kamo kag makapanag-iya sang duta nga iya ginsaad sa inyo mga katigulangan.
Ang Ginapangayo sang Dios
12 "Karon, mga tawo sang Israel, magpamati kamo sang ginapangayo sa inyo sang Ginoo nga inyo Dios: Magtahod kamo sa Ginoo kag tumana ninyo ang iya tanan ginasugo. Higugmaa kag alagara ninyo sia sa bug-os ninyo nga tagipusoon kag kalag,
13 kag tumana ang tanan niya nga mga kasugoan. Ginahatag ko ini sa inyo karon nga adlaw para sa inyo kaayuhan.
14 Bisan ang pinakamataas nga langit iya sang Ginoo. Ang duta kag ang tanan nga yara sa sini iya man.
15 Pero ang paghigugma sang Ginoo sa inyo mga katigulangan daku gid sa bagay nga ginpili niya kamo sa baylo sang iban nga mga tawo. Kamo pinili gihapon tubtob karon nga adlaw.
16 Gani, sugod karon tumana ninyo ang Ginoo kag indi magpakatig-a.
17 Ang Ginoo nga inyo Dios gamhanan sa tanan nga mga dios kag sa tanan nga mga gumalahom. Daku sia kag gamhanan, kag dapat sia pagakahadlukan. Wala sia sing ginapasulabi kag indi mahamhaman.
18 Ginatatap niya sing nagakaigo ang mga ilo kag ang mga balo, ginahigugma niya ang mga dumoluong nga nagapuyo upod sa aton mga kasimanwa kag ginahatagan niya sila sing pagkaon kag mga bayu.
19 Gani, higugmaa ninyo ang mga dumoluong, kay kamo mga dumoluong man anay sa Egipto.
20 Tahura ninyo ang Ginoo nga inyo Dios kag sia lang ang simbaha. Magmatutom kamo sa iya kag magsaad kamo sa iya lamang ngalan.
21 Dayawa ninyo sia, kay sia amo ang inyo Dios kag nakita sang inyo kaugalingon nga mga mata ang daku kag makatilingala nga mga butang nga iya ginhimo para sa inyo.
22 Sang pagkadto sang inyo mga katigulangan sa Egipto, 70 lamang sila ka bilog. Pero karon ang GINOO nga inyo Dios nagpadamo sa inyo subong sang mga bituon sa langit.
No comments:
Post a Comment