☆☆☆
Ang Pagkagamhanan sang GINOO
1 "Higugmaa ang Ginoo nga inyo Dios kag tumana sa gihapon ang iya tanan nga mga kasugoan.
2 Karon, dumdoma ninyo ang inyo natun-an nahanungod sa Ginoo paagi sa inyo mga inagihan upod sa iya. Kamo gid ang nakaagi sini kag indi ang inyo mga kabataan. Nakita ninyo ang pagkadaku sang Ginoo, ang iya gahom, ang iya kusog,
3 kag ang iya ginhimo nga mga milagro. Nakita ninyo ang iya ginhimo sa hari sang Egipto, kag sa iya bug-os nga pungsod.
4 Nakita ninyo kon daw ano ang pagpamatay niya sa mga hangaway sang Egipto, upod ang ila mga kabayo kag mga karuwahi. Ginlumsan niya sila sa Mapula nga Dagat sang paglagas nila sa inyo.
5 Nahibal-an ninyo ang ginhimo sang Ginoo para sa inyo didto sa desierto sang wala pa kamo makaabot diri.
6 Dumdoma ninyo ang iya ginhimo kay Datan kag kay Abiram, ang mga anak nga lalaki ni Eliab gikan sa tribo ni Ruben. Nagatan-aw ang tanan sang magbuka ang duta kag ginlamon sila, upod ang ila mga panimalay, ang ila mga tolda kag ang tanan nila nga mga ulipon kag mga kasapatan.
7 Nakita gid ninyo yadtong dalagku nga mga butang nga ginhimo sang Ginoo.
Ang mga Kaayuhan sang Duta nga Ginsaad
8 "Tumana ninyo ang tanan nga ginsugo ko sa inyo karon nga adlaw. Dayon makatabok kamo kag makapanag-iya ang duta nga inyo sudlon sa labing madali.
9 Kag magakabuhi kamo sing malawig sa sadtong duta nga maayo kag mapatubason nga ginsaad sang Ginoo nga ihatag sa inyo mga katigulangan kag sa ila mga kaliwat.
10 Ang duta nga inyo panag-iyahan sa labing madali indi pareho sa duta sang Egipto sa diin kamo anay nagpuyo. Didto, sang pagtanom ninyo ginbudlayan gid kamo sa paghimo sang irigasyon sa inyo mga talamnan,
11 pero ang duta nga inyo madali na lang pagasudlon, isa ka duta nga may mga bukid kag mga kapatagan nga ginabunyagan sang ulan.
12 Ang Ginoo nga inyo Dios nagatatap sini nga duta kag nagabantay sini sa bug-os nga tuig.
13 "Gani, tumana ninyo ang mga sugo nga ginhatag ko sa inyo karon nga adlaw, higugmaa ang Ginoo nga inyo Dios, kag alagara sia sa bug-os ninyo nga tagipusoon kag kalag.
14 Kon himuon ninyo ini, magapadala sia sang ulan sa inyo duta sa nagakaigo nga tion, ang nahauna kag naulihi nga ulan, agod nga may trigo kamo, bino, lana sang olibo,
15 kag hilamon para sa inyo mga baka. Indi kamo mawad-an sang kalan-on nga inyo luyag.
16 Mag-andam kamo nga indi kamo pagpatalangon sa pagsimba sa iban nga mga dios sa baylo sang sa Ginoo.
17 Kon himuon ninyo ini, ang Ginoo magakaakig sa inyo. Indi niya pagpaulanon kag ang duta magakigas, sa bagay nga indi magtubo ang tanom. Dayon mapatay kamo sa maayo nga duta nga iya ginahatag sa inyo.
18 "Hupti sa inyo mga tagipusoon kag mga panghunahona ini nga mga sugo. Ihigot ini sa inyo mga butkon kag ibutang sa inyo mga agtang sa pagpahanumdom sa inyo.
19 Itudlo ini sa inyo mga kabataan. Ihambal ini kon yara kamo sa inyo balay kag kon sa iban nga lugar, sa inyo pagpahuway kag sa inyo pag-obra.
20 Isulat ini sa mga bakalan sang inyo balay kag sa inyo mga puwerta.
21 Dayon kamo kag ang inyo mga kabataan magakabuhi sing malawig sa duta nga ginsaad sang Ginoo nga inyo Dios sa inyo mga katigulangan. Magakabuhi kamo didto tubtob nga ang langit yara pa sa ibabaw sang duta.
22 "Tumana gid sing maayo ang tanan nga ginsugo ko sa inyo: Higugmaa ang Ginoo nga inyo Dios, tumana ang tanan nga iya ginasugo, kag magmatutom kamo sa iya.
23 Dayon tabugon niya ang tanan nga mga kapungsoran samtang nagaabanse kamo, kag panag-iyahan ninyo ang duta nga iya sang mga kapungsoran nga dalagku kag gamhanan pa sa inyo.
24 Ang tanan nga duta nga inyo pagatapakan mangin-inyo. Ang kasangkaron sang inyo kadutaan nagagikan sa desierto sa bagatnan pakadto sa bukid sang Libano sa aminhan, kag sa suba sang Eufrates sa sidlangan pakadto sa dagat sang Mediteraneo sa nakatundan.
25 Wala sing may makabato sa inyo. Bisan diin kamo makadto sadto nga duta, ang GINOO nga inyo Dios magapahadlok sang mga tawo sa inyo, suno sa iya ginsaad.
26 “Karon nga adlaw ginapapili ko kamo sang bendisyon ukon pagpakamalaut—
27 bendisyon kon tumanon ninyo ang mga sugo sang Ginoo nga inyo Dios nga ginahatag ko karon nga adlaw sa inyo;
28 pero pagpakamalaut kon indi ninyo pagtumanon ini nga mga sugo, kag kon magsimba kamo sa iban nga mga dios nga wala gid ninyo pagsimbaha sang una.
29 Kon ang Ginoo magdala sa inyo sa duta nga inyo pagapanag-iyahan, ihambal ninyo ini nga pagbendisyon gikan sa bukid sang Gerizim kag ang pagpakamalaut sa bukid sang Ebal.
30 (Ining duha ka mga bukid yara sa nakatundan sang suba sang Jordan sa kadutaan sang mga Canaanhon nga nagapuyo sa kapatagan sang Jordan. Yara sila nayon sa nakatundan, nga indi gid man malayo sa balaan nga kahoy malapit sa banwa sang Gilgal.)
31 Manugtabok na kamo sa suba sang Jordan kag magapanag-iya sang duta nga ginahatag sang Ginoo nga inyo Dios sa inyo. Kon makuha ninyo ini kag magpuyo didto,
32 tumana gid ninyo ang tanan nga mga kasugoan nga akon ginahatag sa inyo karon nga adlaw.
No comments:
Post a Comment