☆☆☆
Ang Israel Naglutos sa kay Haring Og
(Num. 21:31-35)
1 "Dayon nagpadulong kita pakadto sa duta sang Basan kag si Haring Og naggwa upod sa iya mga tinawo sa pagpakig-away sa aton malapit sa banwa sang Edrei.
2 Pero ang Ginoo nagsiling sa akon, 'Indi ka magkahadlok sa iya. Itugyan ko sia sa imo, ang iya mga tinawo, kag ang iya tanan nga kadutaan. Himuon mo sa iya ang imo ginhimo sa kay Sihon ang hari sang Amornon nga naggahom sa Hesbon.'
3 “Gani, ang Ginoo nagtugyan man kay Haring Og kag sang iya mga tinawo sa aton gahom kag ginpamatay naton sila tanan.
4 Gin-agaw man naton ang tanan niya nga mga banwa—wala sing isa nga wala naton maagaw. Ang kadamuon sang mga banwa nga aton gin-agaw 60 tanan—ang bug-os nga sakop sang Argob sa diin naggahom si Haring Og sang Basan.
5 Ini tanan nga mga banwa nalibutan sing mataas nga mga pader, may mga puwerta nga napintalan, kag may mga kabaryuhanan man nga wala sing pader.
6 Ginguba naton ang tanan nga mga banwa, kag ginpamatay ang mga lalaki, mga babayi, kag mga kabataan subong sang aton ginhimo sa mga kabanwahanan nga sakop ni Sihon nga hari sang Hesbon.
7 Ginkuha naton ang mga kahayupan kag gin-ati ang mga banwa.
8 "Sa sadto nga tion gin-agaw naton gikan sa duha ka mga hari nga Amornon ang duta sa sidlangan sang Jordan, halin sa suba sang Arnon tubtob sa bukid sang Hermon.
9 (Ang mga Sidonhon nagtawag sang bukid sang Hermon nga Sirion, kag ang mga Amornon nagatawag sini nga Senir.)
10 Gin-agaw naton ang tanan nga kadutaan ni Og nga hari sang Basan: ang mga siyudad sa kapatagan, ang bug-os nga sakop sang Galaad kag Basan tubtob sa sidlangan sa mga banwa sang Salca kag Edrei."
11 (Si Haring Og amo lamang ang nabilin sa mga Refaim. Ang iya lungon nahimo sa bato, nga ang kasangkaron anom ka tapak kag ang kalabaon mga 14 ka tapak suno sa kinaandan nga talaksan. Makita pa ini karon sa Raba nga siyudad sang mga Amonhon.)
Ang mga Tribo nga Nagpuyo sa Sidlangan sang Jordan
(Num. 32:1-42)
12 "Sang panag-iyahan naton ang duta, ginhatag ko sa mga tribo ni Ruben kag ni Gad ang duta halin sa banwa sang Aroer malapit sa suba sang Arnon kag ang bahin sang kabakuloran sang Galaad lakip ang iya mga banwa.
13 Sa katunga nga tribo ni Manases ginhatag ko ang nabilin sang Galaad, kag ang bug-os nga Basan, sa diin naghari si Og, nga amo ang ginsakpan sang Argob." (Ang bug-os nga Basan ginatawag anay nga Refaim.
14 Si Jair nga gikan sa tribo ni Manases, nagkuha sang bug-os nga kadutaan sang Argob nga amo ang Basan, tubtob sa dulonan sang Gesur kag Maacat. Ginhingalanan niya ang mga kabaryuhanan sa iya kaugalingon nga ngalan, kag tubtob karon ginatawag ini nga mga siyudad sang tolda sang Jair.)
15 "Ginhatag ko ang Galaad sa mga kabaranggayan ni Maquir nga gikan sa tribo ni Manases.
16 Sa mga tribo ni Ruben kag ni Gad ginhatag ko ang kadutaan halin sa Galaad tubtob sa suba sang Arnon. Ang tungatonga sang suba amo ang ila dulonan sa bagatnan kag ang dulonan sa aminhan amo ang suba sang Jaboc, nga ang bahin sini amo ang dulonan sang mga Amonhon.
17 Sa nakatundan ang ila kadutaan nagalambot tubtob sa suba sang Jordan. Nagasugod ini sa Linaw sang Galilea sa aminhan pakadto sa Patay nga Dagat sa bagatnan, pakadto sa kunsran sang bukid sang Pisga sa sidlangan.
18 “Sa sadto man nga tion ginsingganan ko sila, 'Ang Ginoo nga aton Dios naghatag sa inyo sini nga duta sa sidlangan sang Jordan nga mangin-inyo kaugalingon. Gani ihanda ang inyo mga hangaway kag patabuka sila sa suba sang Jordan nga nagauna sa iban nga mga tribo sang Israel sa pagbulig sa ila sa pag-agaw sang duta.
19 Ibilin lang diri sa mga banwa ang inyo mga asawa, mga kabataan, kag mga kahayupan kay nahibaluan ko nga madamo ang inyo mga kahayupan.
20 Buligi ninyo ang inyo kapareho nga mga Israelinhon tubtob mapanag-iyahan nila ang duta nga ginahatag sang Ginoo sa ila sa nakatundan sang Jordan, kag ang Ginoo nagpapuyo sa ila didto sing malinong, subong sang iya ginhimo sa inyo. Dayon ang tagsatagsa sa inyo magabalik sa duta nga ginhatag ko sa inyo.'
21 "Dayon ginsingganan ko si Josue, ‘Nakita mo ang tanan nga ginhimo sang Ginoo nga imo Dios sa duha ka hari nga si Sihon kag si Og kag himuon man niya ini sa iban nga ang ila duta inyo agawon.
22 Indi ka magkahadlok sa ila, kay ang Ginoo nga imo Dios magapakig-away para sa imo.'
Si Moises wala Pagtugoti sa Pagsulod sa Canaan
23 "Sa sadto nga tion nagpangamuyo ako sing hanuot,
24 ‘O Ginoo nga Dios, nahibaluan ko nga ikaw nagasugod pa lang sa pagpakita sa akon sang dalagku kag makatilingala nga mga butang nga imo pagahimuon. Wala sing dios sa langit ukon sa duta nga sarang makahimo sang dalagku nga mga butang nga imo ginhimo!
25 O Ginoo, tugoti ako sa pagtabok sa suba sang Jordan, agod makita ko ang maayo nga duta, ang matahom nga kabakuloran kag ang bukid sang Libano.'
26 "Pero ang Ginoo naakig sa akon tungod sa inyo kag indi sia magpamati. Sa baylo nagsiling sia, 'Husto na ina! Indi na paghambala liwat!
27 Taklad ka sa putokputokan sang bukid sang Pisga kag lantaw ka sa aminhan, sa bagatnan, sa sidlangan kag sa katundan. Tan-awa sing maayo ang imo makita kay indi ikaw makatabok sa Jordan.
28 Tudloi si Josue kon ano ang iya himuon. Pabakura sia kag palig-ona, kay sia amo ang magapangulo sang mga tawo sa pagtabok agod panag-iyahan ang duta nga imo nakita.'
29 "Gani nagpabilin kita sa kapatagan sa atubang sang banwa sang Bet-peor.”
No comments:
Post a Comment