☆☆☆
Ang mga Tinuig sa Desierto
1 "Sang ulihi nagbalik kita sa desierto, pakadto sa Mapula nga Dagat, suno sa ginsugo sang Ginoo. Kag naglibutlibot kita sa kabakuloran sang Edom sing malawig nga mga inadlaw.
2 "Dayon ang Ginoo nagsiling sa akon,
3 nga madugay na ang aton paglibutlibot sa mga kabakuloran kag dapat kita magpadayon sa aminhan.
4 Ginsingganan niya ako nga amo ini ang isiling sa inyo, 'Manugsulod na kamo sa kabakuloran sang Edom, ang kadutaan sang inyo mga himata, ang mga kaliwat ni Esau. Magakahadlok sila sa inyo, pero indi kamo
5 magpakig-away sa ila kay indi ko kamo paghatagan sang ila duta bisan isa lang ka tapak, Ginhatag ko ang Edom sa mga kaliwat ni Esau.
6 Sarang kamo makabakal sing kalan-on kag tubig sa ila.'
7 "Dumdoma nga ang Ginoo nga inyo Dios nagbendisyon sa tanan nga butang nga inyo ginhimo. Gintatap niya kamo samtang nagapanglugayawan kamo sa sining malapad nga desierto. Nag-upod sia sa inyo sa sulod sang 40 ka tuig, kag ginhatagan niya kamo sang tanan nga kinahanglan ninyo.
8 "Gani nagpadayon kita sa paglakat kag naghalin kita sa mga banwa sang Elat kag Eziongeber pakadto sa Patay nga Dagat padulong sa Moab.
9 “Kag ang Ginoo nagsiling sa akon, 'Indi pag-anha ang mga pumoluyo sang Moab, ang mga kaliwat ni Lot, ukon magpakig-away sa ila. Ginhatag ko sa ila ang siyudad sang Ar kag indi ko pag-ibutang sa imo ang bisan ano nga bahin sang ila duta.'"
10 (Ang gamhanan nga kaliwat sang mga higante nga ginatawag Emim nagaestar anay didto sa Ar. Pareho sila katag-as sang mga Anakim, isa man ka kaliwat sang mga higante.
11 Kaangay sang mga Anakim, ginatawag man sila nga mga Refaim, pero ang mga Moabnon nagatawag man sa ila nga Emim.
12 Ang mga Horhanon nagapuyo anay sa Edom, pero ang mga kaliwat ni Esau nagtabog kag nagpapas sa ila. Dayon ang mga kaliwat ni Esau amo ang nagpuyo didto, subong nga ang mga Israelinhon sang ulihi nagtabog man sang ila mga kaaway gikan sa duta nga ginhatag sang Ginoo sa ila.)
13 "Dayon nagtabok kita sa suba sang Zered suno sa mando sang Ginoo sa aton.
14 Halin sang aton paghalin sa Cades Barnea tubtob sang aton pagtabok sa Zered mga 38 na ka tuig. Ang tanan nga mga hangaway sadto nga kaliwatan nagkalamatay, suno sa ginsiling sang Ginoo.
15 Ang Ginoo nagsumpong sa ila tubtob nga nagkalamatay sila tanan.
16 "Sang magkalamatay ang tanan nga mga hangaway,
17 ang Ginoo nagsiling sa akon,
18 'Karon nga adlaw maagi ka sa kadutaan sang Moab paagi sa Ar.
19 Dayon malapit na lang ikaw sa duta sang mga Amonhon, ang mga kaliwat ni Lot. Indi sila pag-anha ukon magpakig-away sa ila, kay indi ko pag-ihatag ang bisan ano nga bahin sang ila duta.’”
20 (Ini nga kadutaan ginatawag man nga duta sang Refaim, nga nagpuyo anay didto. Ang mga Amonhon nagtawag sa ila nga Zamzumim.
21 Pareho sila katag-as sang mga Anakim. Madamo kag gamhanan sila nga mga kaliwatan. Pero ang Ginoo nagpapas sa ila, gani ang mga Amonhon nag-agaw sang ila duta kag nagpuyo didto.
22 Amo man ini ang ginhimo sang GINOO sa mga Edomnon, ang mga kaliwat ni Esau nga nagpuyo sa kabakuloran sang Edom. Ginpapas niya ang mga Horhanon, gani ang mga Edomnon nag-agaw sang ila duta kag nagpuyo didto tubtob karon.
23 Ang mga pumoluyo sa isla sang Creta nagpapas sang mga Avim, nga nagpuyo sa mga kabaryuhanan tubtob sa bagatnan sa Gaza, kag nag-agaw sang ila duta kag nagpuyo didto.)
24 "Ang Ginoo nagsiling, 'Karon lakat kamo kag magtabok sa suba sang Arnon. Ginatugyan ko sa inyo gahom si Sihon nga Amornon nga hari sang Hesbon lakip ang iya duta. Salakaya sia kag agawa ang iya duta.
25 Sugod karon nga adlaw pahadlukon ko ang tanan nga mga tawo bisan diin. Ang tanan magakurog sa kahadlok kon mitlangon ang inyo ngalan.’"
Ang Israel Naglutos kay Haring Sihon
(Num. 21:21-30)
26 Dayon gikan sa desierto sang Quedemot nagpadala ako sang mga mensahero kay Sihon nga hari sang Hesbon nga may mensahi sang paghidait nga nagasiling:
27 ‘Kon mahimo paagiha kami sa imo duta. Maderetso lang kami kag indi na magpanghapithapit.
28 Bayaran namon ang kalan-on nga amon makaon kag ang tubig nga amon mainom. Maagi lang kami sa imo duta,
29 tubtob makatabok kami sa suba sang Jordan pakadto sa duta nga ginahatag sa amon sang Ginoo nga amon Dios. Ang mga kaliwat ni Esau nga nagapuyo sa Edom, kag ang mga Moabnon nga nagapuyo sa Ar, nagtugot sa amon sa pag-agi sa ila duta.’
30 “Pero si Haring Sihon indi magtugot sa aton sa pag-agi sa iya duta. Ang Ginoo nga inyo Dios nagpatig-a sang iya tagipusoon kag indi niya kita pagpaagyon, agod aton sia malutos kag maagaw ang duta nga aton karon ginapanag-iyahan.
31 "Dayon ang GINOO nagsiling sa akon, 'Tan-awa, ginatugyan ko si Haring Sihon kag ang iya duta sa imo. Kuhaa ini kag panag-iyahi.'
32 Si Sihon kag ang iya bug-os nga hangaway naggwa sa pagpakig-away sa aton malapit sa banwa sang Jahaz,
33 pero ang Ginoo nga aton Dios nagtugyan sa iya sa aton gahom kag ginpatay naton sia, ang iya mga anak nga lalaki kag ang tanan niya nga mga tinawo.
34 Gin-agaw man naton ang tagsa ka banwa kag ginpamatay ang tagsa ka lalaki, babayi kag mga kabataan. Wala gid kita sang ginbilin nga buhi.
35 Ginkuha naton ang mga kahayupan kag gin-ati ang mga banwa,
36 Ang Ginoo nga aton Dios nagtugot sa aton sa pag-agaw sang mga banwa halin sa Aroer sa higad sang suba sa Arnon tubtob sa alagyan pakadto sa Galaad lakip ang banwa nga malapit sa suba mismo. Wala sing banwa nga may mataas nga pader para sa aton.
37 Pero wala kita magpalapit sa kadutaan sang mga Amonhon, ukon sa pangpang sang suba sang Jaboc, ukon sa mga banwa sang kabakuloran, ukon sa bisan diin nga duog nga ginmando sang Ginoo nga aton Dios nga indi pagkadtuan.
No comments:
Post a Comment