☆☆☆
Ang Napulo ka mga Sugo
(Ex. 20:1-17)
1 Gintipon ni Moises ang tanan nga mga tawo sang Israel kag ginsingganan, "Mga tawo sang Israel, pamatii ninyo ang tanan nga mga kasugoan nga akon ihatag sa inyo karon nga adlaw. Tun-i ninyo kag tumanon gid.
2 Ang Ginoo nga aton Dios naghimo sing kasugtanan sa aton didto sa bukid sang Sinai.
 |
| "Ang Ginoo nga aton Dios naghimo sing kasugtanan." (5:2) |
3 Naghimo sia sing kasugtanan indi lamang sa aton mga katigulangan kundi sa aton man tanan nga nagakabuhi tubtob karon nga adlaw.
4 Ang Ginoo naghambal sa inyo sing tampad gikan sa kalayo didto sa bukid.
5 Sadto nga tion nagpatunga ako sa inyo kag sa Ginoo sa pagsugid sa inyo sang iya ginsiling kay nahadlok kamo sang kalayo kag indi kamo magtaklad sa bukid. "Ang GINOO nagsiling,
6 'Ako amo ang GINOO nga imo Dios nga nagpagwa sa imo sa Egipto, sa diin gin-ulipon ikaw.
7 “‘Indi ka magsimba sa iban nga dios kundi sa akon.
8 "‘Indi ka maghimo para sa imo kaugalingon sing mga larawan sang bisan ano nga butang nga yara sa langit, ukon sa duta, ukon sa tubig sa idalom sang duta.
9 Indi ka magluhod ukon magsimba sa atubangan sini, kay ako amo ang Ginoo nga imo Dios, maimon nga Dios. Silutan ko ang mga nagadumot sa akon kag ang ila mga kaliwat tubtob sa ikatlo kag ikap-at nga kaliwatan.
10 Pero ipakita ko ang akon paghigugma sa linibo nga mga kaliwatan nga nagahigugma sa akon kag nagatuman sang akon mga kasugoan.
11 "‘Indi mo paggamiton ang akon ngalan para sa malain nga mga tinutoyo, kay ako, ang Ginoo nga imo Dios magasilot sa kay bisan sin-o nga nagagamit sang akon ngalan sing indi husto.
12 "‘Bantayi ang Adlaw nga Inugpahuway, kag gamita ini para sa akon, subong nga ako, ang Ginoo nga imo Dios nagsugo sa imo.
13 Mag-obra ka sa sulod sang anom ka adlaw,
14 pero ang ikapito nga adlaw amo ang adlaw nga inugpahuway nga gamiton para sa akon. Sa sina nga adlaw wala sing may mag-obra—bisan ikaw, ang imo mga kabataan, ang imo mga suloguon, ang imo mga kahayupan, ukon ang mga dumoluong nga nagapuyo sa imo pungsod. Ang imo mga ulipon dapat magpahuway pareho sang sa imo.
15 Dumdoma nga ikaw nangin-ulipon man sa duta sang Egipto kag ako, ang Ginoo nga imo Dios nagluwas sa imo paagi sa akon daku nga gahom kag kusog. Gani ginasugo ko ikaw sa pagbantay sang adlaw nga inugpahuway.
16 “'Tahura ang imo amay kag iloy subong nga ako, ang GINOO nga imo Dios nagasugo sa imo, agod nga ang tanan manginmaayo para sa imo kag magakabuhi ka sing malawig sa duta nga akon ginahatag sa imo.
17 “‘Indi ka magpatay.
18 “‘Indi ka magpanginbabayi ukon magpanginlalaki.
19 “‘Indi ka magpangawat.
20 “‘Indi ka magsaksi sing binutig sa imo isigkatawo.
21 “‘Indi ka magkaibog sa asawa sang imo isigkatawo. Indi ka magkaibog sang iya balay, sang iya duta, sang iya mga ulipon, sang iya baka, sang iya asno, ukon sang bisan ano niya nga mga pagkabutang.'
22 "Ang Ginoo naghatag sini nga mga sugo sa tanan nga mga tawo nga nagtipon didto sa bukid. Amo lang ini ang iya ginhatag kag wala na sia sing gindugang sang paghambal niya sa daku nga tingog halin sa kalayo kag halin sa madamol nga panganod. Dayon ginsulat niya ang mga sugo sa duha ka malapadlapad nga bato kag ginhatag niya ini sa akon.
Hinadlukan ang mga Tawo
(Ex. 20:18-21)
23 "Sang nagadabadaba ang bug-os nga bukid, kag nabatian ninyo ang tingog halin sa kadudolman, ang inyo mga katigulangan kag mga pangulo sang inyo mga tribo nagkadto sa akon
24 kag nagsiling, 'Ang Ginoo nga aton Dios nagpakita sa aton sang iya gahom kag sang iya himaya, sang mabatian naton sia nga naghambal halin sa kalayo! Karon nga adlaw nakita naton nga sarang pa mabuhi ang isa ka tawo bisan mabatian niya ang Dios nga naghambal sa iya.
25 Pero ngaa nga ibutang naton liwat sa katalagman ang aton kabuhi? Ang makahaladlok nga kalayo magasunog sa aton. Mapatay kita, kon mabatian naton ang GINOO nga aton Dios kon sia maghambal liwat.
26 May yara bala nga nabuhi sa tapos niya mabatian ang buhi nga Dios nga naghambal sa kalayo?
27 Balik ka, Moises, kag pamatii ang tanan nga ginasiling sang GINOO nga aton Dios. Dayon balik ka diri sa amon, kag sugiri kami sang iya ginsiling sa imo. Mamati kami kag magatuman.'
28 "Sang mabatian ini sang Ginoo nagsiling sia sa akon, 'Nabatian ko ang ginsiling sang mga tawo kag husto sila.
29 Kabay nga amo ini pirme ang ila balatyagon! Kabay nga tahuron nila ako sa gihapon kag tumanon nila ang tanan ko nga mga sugo, agod ang tanan manginmaayo para sa ila kag sa ila mga kaliwatan sa wala sing katapusan.
30 Lakat ka, kag singgana sila nga magbalik sa ila mga tolda.
31 Pero ikaw, Moises, magpabilin ka diri upod sa akon kag ihatag ko sa imo ang tanan ko nga mga kasugoan kag mga sugo. Itudlo ini sa mga tawo agod tumanon nila ini sa duta nga akon ginahatag sa ila.'
32 "Pumoluyo sang Israel, tumana gid ninyo ang tanan nga ginsugo sa inyo sang Ginoo nga inyo Dios. Indi ninyo paglapasa ang bisan ano nga bahin sang iya mga kasugoan.
33 Tumana ninyo ini tanan agod ang tanan manginmaayo para sa inyo kag magapadayon kamo sa pagpuyo sa duta nga inyo pagapanag-iyahan.
No comments:
Post a Comment