Deuteronomio 1

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34

☆☆☆

Panguna

1 Sa sini nga libro nasulat ang mga ginhambal ni Moises sa mga tawo sang Israel sang didto sila sa sidlangan sang suba sang Jordan. Didto sila sa kapatagan sang Jordan malapit sa Suf. Ang mga banwa sa palibot nila amo ang Paran, Tofel, Laban, Hazerot kag Dizahab.

2 (Halin sa bukid sang Sinai tubtob sa Cades Barnea kon lakton nga nagaagi sa kabakuloran sang Edom nagalambot sa mga 11 ka adlaw.)

3 Sa nahauna nga adlaw sang ika-11 ka bulan sa ika-40 ka tuig sa tapos sila makahalin sa Egipto, ginsugiran ni Moises ang mga tawo sang tanan nga ginsugo sang GINOO sa iya nga ihambal sa ila.

4 Nahanabo ini sa tapos malutos sang GINOO si Haring Sihon nga Amornon nga naggahom sa banwa sang Hesbon, kag si Haring Og sang Basan nga naggahom sa mga banwa sang Astarot kag Edrei.

5 Samtang ang mga tawo didto sa sidlangan sang Jordan sa kadutaan sang Moab, ginsaysay ni Moises ang mga kasugoan kag mga pagtulon-an sang Dios. Si Moises nagsiling,

6 “Sang didto kita sa bukid sang Sinai ang GINOO nga aton Dios nagsiling sa aton, ‘Dugay na ang inyo pagtiner sa sini nga bukid.

7 Himusa ninyo ang inyo mga tolda kag maglakat pakadto sa kabakuloran sang mga Amornon, kag sa tanan nga mga duog sa diin nagapuyo ang ila mga kaingod—pakadto sa kapatagan sang Jordan, sa kabakuloran kag mga kapatagan, sa kadutaan sa bagatnan, kag sa Mediteraneo. Kadto kamo sa duta sang Canaan sa unhan sang bukid sang Libano tubtob sa dako nga suba sang Eufrates.

8 Tan-awa, yari ang duta nga ginsaad ko, ang GINOO, nga ihatag sa inyo mga katigulangan nga sanday Abraham, Isaac, kag Jacob kag sa ila mga kaliwat. Lakat kag panag-iyahi ini.”

Si Moises Nagpili sang mga Hukom
(Ex. 18:13-27)

9 Si Moises nagsiling, “Sa sadto nga tion ginsingganan ko kamo nga indi ako makasarang sa pagdumala sa inyo kon ako lang.

10 Ang GINOO nga inyo Dios nagpadamo sa inyo subong sang mga bituon sa langit.

11 Kabay ang GINOO, ang Dios sang inyo mga katigulangan magpadamo pa sa inyo sing linibo ka pilo, kag pauswagon kamo suno sa iya ginsaad.

12 Pero ano ang pagkasarang ko sang mabudlay nga katungdanan sa paghusay sang inyomga kaawayon kon ako lang?

13 Magpili kamo sing mga tawo gikan sa tagsa ka tribo nga maalam, mahinangpanon kag may ikasarang, kag himuon ko sila nga inyo mga pangulo.

14 Kag nagpasugot man kamo nga amo ini ang maayo nga himuon.

15 Gani ginkuha ko ang maalam kag may ikasarang nga mga pangulo nga inyo ginpili halin sa inyo mga tribo, kag ginhimo ko sila nga pangulo ninyo. Ang iban nagpangulo sang 1,000 ka mga tawo, ang iban sang 100, ang iban sang 50 kag ang iban sang napulo. Nagpili man ako sang iban nga mga opisyales sa bug-os nga tribo.

16 “Sa sadto nga tion ginsingganan ko ini nga mga opisyales, ‘Pamatii ninyo ang tagsa ka kaso nga gindala sang mga tawo tawo sa inyo. Hukmi ninyo sing husto ang tagsa ka kaso, bisan ini nahanungod sang inyo mga kasimanwa ukon sang mga dumoluong nga nagapuyo upod sa inyo.

17 Indi kamo magpasulabi sa inyo paghukom; hukmi ninyo sing palareho ang tagsatagsa bisan sin-o sia. Indi kamo magkahadlok sa bisan kay sin-o, kay ang inyo nga paghukom nagikan sa Dios. Kon may kaso nga tama kabudlay para sa inyo dalha ninyo ina sa akon, kag ako ang magahukom sina.’

18 Sa amo man nga tion gintudloan ko kamo sang iban pa gid nga pagahimuon ninyo.”

Ang mga Espiya Ginpadala sa Cades Barnea
(Num. 13:1-33)

19 Gintuman naton ang ginsugo sang GINOO nga aton Dios. Naghalin kita sa Bukid sang Sinai kag naglatas sa malapad sa kabakuloran sang mga Amornon. Sang makaabot kita sa Cades Barnea,

20 ginsingganan ko kamo, ‘Nakaabot na kamo sa kabakuloran sang mga Amornon, nga ginahatag sa aton sang GINOO nga aton Dios.

21 Tan-awa, yari ang duta nga ginahatag sa inyo ang GINOO nga Dios sang inyo mga katigulangan. Lakat kamo kag panag-iyahi ini. Indi kamo magkahadlok ukon magpakaluya.’

22 “Pero nagpalapit kamo sa akon kag nagsiling, ‘Magpadala kita anay sing mga tawo sa pag-usisa sang duta, agod masugiran nila kita sing maayo nga alagyan pakadto didto kag kon ano nga sahi sang mga siyudad ang aton pagakadtuan.’

23 “Daw maayo man yadto nga plano, gani nagpili ako sing 12 ka mga tawo, isa sa tagsa ka tribo.

24 Nagkadto sila sa kabakuloran tubtob sa kapatagan sang Escol kag gin-usisa nila ini.

25 Nagkuha sila sing mga prutas didto kag gindalhan nila kita, kag nagpanugid sila nga ang duta nga ginahatag sang GINOO nga aton Dios maayo gid nga duta.

26 “Pero nagsupak kamo sa sugo sang GINOO nga inyo Dios kag indi kamo magkadto didto.

27 Nagkumod kamo sa inyo kaugalingon kag nagsiling, ‘Ang GINOO nagadumot sa aton. Gani ginpagwa niya kita sa Egipto agod itugyan sa mga Amornon sa pagpamatay sa aton.

28 Ngaa bala magkadto kita didto? Nahadlok kita. Ang mga tawo nga ginpadala naton didto nagsugid nga ang mga pumoluyo didto mga makusog kag matag-as pa sang sa aton. Siling nila ang ila mga siyudad nalibutan sang mga pader nga nagalambot sa langit. Kag nakita nila ang mga higante didto.’

29 "Pero ginsingganan ko kamo, ‘Indi kamo magkahadlok sa sini nga mga tawo.

30 Ang GINOO nga inyo Dios magauna sa inyo kag magapakig-away sia para sa inyo subong sang nakita ninyo nga ginhimo niya sa Egipto

31 kag sa desierto. Nakita ninyo kon paano ang iya pagdala sa inyo tubtob sa sini nga duog, pareho sang isa ka amay nga nagakugos sang iya anak.'

32 Wala sapayan sang akon ginsiling, indi pa kamo magsalig sa GINOO

33 nga nagauna sa gihapon sa inyo sa pagpangita sing duog nga inyo himuan sang inyo kampamento. Gintuytoyan niya kamo paagi sa haligi nga kalayo kon gab-i kag sa haligi nga panganod kon adlaw sa pagtudlo sang inyo pagaagyan.

Ang GINOO Nagsilot sa Israel
(Num. 14:20-35)

34 “Ang GINOO nakabati sang inyo mga reklamo kag naakig sia. Nagsumpa sia,

35 ‘Wala sing isa sa inyo gikan sining malaot nga kaliwatan nga makasulod sa maayo nga duta nga akon ginsaad nga akon ihatag sa inyo mga katigulangan.

36 Si Caleb lamang nga anak ni Jefone amo ang makasulod sini. Wala sia magbiya sa akon kag ihatag ko sa iya kag sa iya mga kaliwatan ang duta nga iya ginkadtuan.'

37 Ang GINOO naakig man sa akon tungod sa inyo, kag nagsiling, 'Bisan gani ikaw, Moises, indi makasulod sa duta.

38 pero ang imo kabulig nga si Josue nga anak ni Nun, makasulod sa duta. Paisuga si Josue. Sia magapangulo sang Israel sa pagpanag-iya sang duta.’

39 “Dayon ang GINOO nagsiling sa aton tanan, ‘Ang inyo magamay nga mga kabataan, nga wala makahibalo sang maayo ukon malain amo ang makasulod sa duta--ang mga kabataan nga suno sa inyo pagabihagon sang mga kaaway. Ihatag ko ini sa ila kag sila ang magapanag-iya sini.

40 Pero kamo inyo, balik kamo sa desierto pakadto sa Mapula nga Dagat.’

Ang Pagkalutos sang Israel sa Horma
(Num. 14:39-45)

41 “Nagsabat kamo, ‘Moises nakasala kami batok sa GINOO. Pero karon magasalakay kami suno sa ginmando sa amon sang GINOO nga amon Dios.’ Dayon ang tagsatagsa sa inyo naghanda sa pagpakig-away kag naghunahuna nga mahapos lang ang pagsalakay sa mga kabakuloran.

42 “Pero ang GINOO nagsiling sa akon, ‘Paandami sila nga indi magsalakay kay indi ako mag-upod sa ila, kag ang ila mga kaaway magalutos sa ila.’

43 Ginsugiran ko kamo sang ginsiling sang GINOO, pero indi kamo magpati. Nagsupak kamo sa iya kag sa inyo pagkabugalon, nagtaklad kamo sa kabakuloran.

44 Dayon ang mga Amornon nga nagpuyo sa sadtong kabakuloran naggwa kaangay sang isa ka panong sang putyukan. Ginlagas nila kamo kag ginlutos sa Horma sa kabakuloran sang Edom.

45 Gani nagpanawag kamo sa GINOO sa pagpangayo sang bulig, pero wala sia nagpamati sa inyo ukon nagsapak sa inyo.

46 Amo ina nga nagtiner kamo sing madugay sa Cades.

Numeros 36 | Deuteronomio 2