☆☆☆
Ang Tuig sa Paghilway
1 "Sa katapusan sang tagsa ka ikapito nga tuig indi na pagpabayara ang nakautang sa inyo.
2 Amo ini ang dapat himuon. Ang tagsatagsa nga nakapahulam sang kuwarta sa iya kapareho nga Israelinhon indi na magpabayad sang iya utang. Indi na niya sia pagsukton kay ang Ginoo mismo nagsiling nga panason ang iya utang.
3 Sarang ninyo masukot ang utang sang mga dumoluong, pero indi ninyo dapat sukton ang mga utang sang kapareho ninyo nga mga Israelinhon.
4 "Ang Ginoo nga inyo Dios magapauswag sa inyo sa duta nga iya ginahatag sa inyo. Wala sing isa sang inyo mga tawo nga mangin-imol,
5 kon tumanon ninyo sia kag bantayan sing maayo ang tanan nga ginasugo ko sa inyo karon nga adlaw.
6 Ang Ginoo magapauswag sa inyo suno sa iya ginsaad. Magapahulam kamo sang kuwarta sa madamo nga mga pungsod, pero indi kamo kinahanglan maghulam sa ila. Pagagamhan ninyo ang madamo nga mga pungsod, pero wala sing pungsod nga magagahom sa inyo.
7 “Kon may kapareho kamo nga Israelinhon nga imol sa bisan diin nga banwa sa duta nga ginahatag sa inyo sang Ginoo nga inyo Dios, indi kamo magdinalok kundi buligi sia.
8 Magmaalwan kamo kag pahulama sia sang iya kinahanglan.
9 Indi sia pagbalibari sa pagpahulam sang bisan ano, tungod lamang kay malapit na lang ang tuig nga ang tanan nga utang panason. Indi ka maghupot sining malain nga hunahona. Kon indi kamo magpahulam, magapanawag sia sa Ginoo batok sa inyo, kag may salabton ka sini.
10 Maghatag kamo sa iya sing maalwan nga wala nagalangot ang inyo buot, kag ang Ginoo magapauswag sa inyo sa tanan nga inyo ginahimo.
11 May yara gid pirme nga mga Israelinhon nga imol kag nagakinahanglan sing bulig, gani ginamanduan ko kamo nga magmaalwan sa ila.
Ang Pagtratar sa mga Ulipon
(Ex. 21:1-11)
12 "Kon ang inyo kapareho nga Israelinhon lalaki ukon babayi, magbaligya sang iya kaugalingon subong isa ka ulipon, hilwayon ninyo sia sa tapos makaalagad sia sing anom ka tuig. Kon ang ikapito nga tuig mag-abot hilwayon mo sia.
13 Kon hilwayon ninyo sia, indi sia pagpalakta nga wala sing may ginahatag sa iya.
14 Hatagi sia sing maalwan gikan sa kabuganaan nga ginhatag sang Ginoo sa inyo—karnero, trigo, kag bino.
15 Dumdoma ninyo nga mga ulipon kamo anay sa Egipto, kag ang Ginoo nga inyo Dios naghilway sa inyo. Gani ginahatag ko sa inyo ini nga sugo karon nga adlaw.
16 "Pero kon ang imo ulipon magsiling nga indi sia maghalin kay palangga niya ikaw kag ang imo panimalay,
17 dayon dalha sia sa puwertahan sang imo balay kag didto tuhoga ang iya dulonggan kag sia mangin-ulipon nimo sa bug-os niya nga kabuhi. Amo man ini ang himuon mo sa imo ulipon nga babayi.
18 Indi maglangot ang imo buot sa imo paghilway sang imo ulipon. Kon sa bagay, nakaalagad sia sa imo sa sulod sang anom ka tuig nga katunga lang ang imo ginbayaran kon ipaanggid sa ginasuweldohan nga suloguon. Himoa ini kag ang GINOO nga imo Dios magabendisyon sa tanan mo nga pagahimuon.
Ang Panganay nga Baka kag Karnero
19 “Painon mo ang tanan nga panganay nga mga lalaki sang imo baka kag karnero para sa Ginoo nga imo Dios. Indi paggamita ini nga mga baka para sa obra kag indi pagguntingi ang karnero.
20 Tagsa ka tuig ikaw kag ang imo panimalay magakaon sini sa atubangan sang Ginoo sa isa ka duog nga ginasimbahan.
21 Pero kon may depekto ang sapat, piang ukon bulag, ukon bisan ano nga depekto, indi mo ini pag-ihalad sa Ginoo nga imo Dios.
22 Sarang mo makaon ini nga mga sapat sa imo balay. Tanan kamo, matinlo ukon indi matinlo sarang makakaon si subong sang pagkaon mo sang usa ukon gasela.
23 Indi pagkauna ang ila dugo, kundi iula nimo ini sa duta subong sang tubig.
No comments:
Post a Comment