☆☆☆
Levitico 7 | Levitico 9
Ang Pag-orden kay Aaron kag sa Iya mga Anak nga Lalaki
(Ex. 29:1-37)
1 Ang Ginoo nagsiling kay Moises,
2 “Dalha si Aaron kag ang iya mga anak nga lalaki sa puwertahan sang Tolda nga Tilipunan kag dalha ang mga bayu sang mga pari, ang lana nga inughaplas, ang torite nga baka para sa halad tungod sa sala, ang duha ka karnero nga lalaki, kag ang isa ka alat nga tinapay nga wala sing lebadora.
3 Dayon tipuna didto ang bug-os nga katilingban.”
4 Gintuman ni Moises ang sugo sang Ginoo, kag sang matipon na ang katilingban,
5 ginsingganan niya sila, "Ang akon himuon karon amo ang ginsugo sang Ginoo.”
6 Gindala ni Moises si Aaron kag ang iya mga anak nga lalaki sa atubangan kag ginpapaninlo niya sila sa tubig.
7 Ginpasuksok niya kay Aaron ang bayu kag ang sutana kag ang wagkos sa iya hawak. Ginpasuksok niya sa iya ang balaan nga bestidora kag ginhugot ini paagi sa pagtakod sang hinabol sing maayo nga paha sa palibot sang iya hawak.
8 Gintakod niya kay Aaron ang hapin sa dughan kag ginbutang ang Urim kag Tumim sa sulod sini.
9 Ginpasuksok ni Moises sa iya ang turbante sa iya ulo, kag sa atubangan sini ginbutang niya ang medalya nga bulawan, ang balaan nga tanda sang pagtugyan, suno sa ginsugo sang Ginoo.
10 Dayon ginkuha ni Moises ang lana nga inughaplas kag ginwisikan niya ang Tolda nga Tilipunan kag ang tanan nga yara sa sini, kag sa sini nga paagi ginhalad niya ini tanan sa Ginoo.
11 Nagkuha sia sing lana kag ginwisikan niya sing makapito ang altar kag ang iya sini mga gamit kag ang batiya kag ang iya tulongtongan, agod mahalad ini sa Ginoo.
12 Gin-ordinan niya si Aaron paagi sa pagbubo sing lana nga inughaplas sa iya ulo.
13 Dayon gindala ni Moises ang mga anak nga lalaki ni Aaron sa atubangan kag ginpasuksokan niya sila sing bayu, ginwagkos ang ila mga hawak, kag gintakdan sing gora ang ila mga ulo, suno sa ginsugo sang Ginoo.
14 Dayon nagdala si Moises sing torite nga baka para ihalad tungod sa sala, kag si Aaron kag ang iya mga anak nga lalaki nagtungtong sang ila mga kamot sa ulo sini.
15 Gin-ihaw ini ni Moises kag nagkuha sia sing dugo, kag paagi sa iya tudlo ginhamlit ini sa mga sungaysongay sa mga pamusod sang altar, agod mahalad ini. Dayon gin-ula niya ang nabilin nga dugo sa sadsaran sang altar. Sa sini nga paagi ginhalad niya ini kag gintinluan.
16 Ginkuha ni Moises ang tanan nga sapay sa mga kasudlan, ang labing maayo nga bahin sang atay, ang mga batubato upod ang sapay nga yara sa ila, kag ginsunog ini tanan sa altar.
17 Ginkuha niya ang nabilin nga bahin sang torite nga baka lakip ang panit sini, ang karne, ang mga kasudlan, kag ginsunog ini sa gwa sang kampamento, suno sa ginsugo sang Ginoo.
18 Dayon nagdala si Moises sing karnero nga lalaki para sa halad nga sinunog, kag si Aaron kag ang iya mga anak nga lalaki nagtungtong sang ila mga kamot sa ulo sini.
19 Gin-ihaw ini ni Moises, kag ginwisik ang dugo sa apat ka kilid sang altar.
20-21 Ginlasa niya ang karnero nga lalaki, ginhugasan niya ang mga kasudlan kag ang pangulihi nga mga tiil sa tubig, ginsunog niya ang ulo, ang sapay, kag ang tanan nga nabilin nga bahin sang karnero nga lalaki sa altar, suno sa ginsugo sang Ginoo. Ining halad nga sinunog isa ka halad nga kalan-on paagi sa kalayo, kag ang iya baho mahamot sa Ginoo.
22 Dayon nagdala si Moises sang ikaduha nga karnero nga lalaki nga para sa pag-orden sang mga pari kag si Aaron kag ang iya mga anak nga lalaki nagtungtong sang ila mga kamot sa ulo sini.
23 Gin-ihaw ini ni Moises kag nagkuha sia sing dugo kag ginhamlit ini sa labit sang tuo nga dulonggan ni Aaron, sa kumalagko sang iya tuo nga kamot, kag sa kumalagko sang iya tuo nga tiil.
24 Dayon gindala niya ang mga anak nga lalaki ni Aaron sa atubangan kag ginhamlitan sing dugo ang mga labit sang ila tuo nga mga dulonggan, ang mga kumalagko sang ila tuo nga mga kamot, kag ang mga kumalagko sang ila tuo nga mga tiil. Dayon ginwisik ni Moises ang nabilin nga dugo sa apat ka kilid sang altar.
25 Ginkuha niya ang sapay, ang matambok nga ikog, ang tanan nga sapay nga nagatabon sa mga kasudlan, ang labing maayo nga bahin sang atay, ang mga batubato upod sa mga sapay nga yara sa ila, kag ang pangulihi nga tuo nga tiil.
26 Dayon nagkuha sia sing isa ka bilog nga tinapay halin sa alat nga nasudlan sang tinapay nga wala sing lebadora nga nahalad sa Ginoo, isa ka bilog nga tinapay nga naluto sa lana, kag isa ka manipis nga tinapay, kag ginbutang niya ini sa ibabaw sang sapay kag sang pangulihi nga tuo nga tiil.
27 Ginbutang niya ini tanan nga kalan-on sa mga kamot ni Aaron kag sang iya mga anak nga lalaki, kag ginhalad nila ini subong isa ka pinasahi nga dulot sa Ginoo.
28 Dayon ginkuha sa ila ni Moises ang kalan-on kag ginsunog ini sa altar, sa ibabaw sang halad nga sinunog, subong isa ka halad tungod sang pag-orden. Isa ini ka halad nga kalan-on paagi sa kalayo, kag ang iya baho mahamot sa Ginoo.
29 Dayon ginkuha ni Moises ang dughan kag ginhalad ini subong isa ka pinasahi nga dulot sa Ginoo. Amo ini ang bahin ni Moises sa karnero nga ginhalad tungod sa pag-orden. Ginhimo ni Moises ang suno gid sa ginsugo sang Ginoo.
30 Nagkuha si Moises sang bahin sang lana nga inughaplas kag sang dugo nga yara sa altar kag ginwisik ini kay Aaron kag sa iya mga anak nga lalaki kag sa ila mga bayu. Sa sini nga paagi ginpakabalaan niya sila kag ang ila mga bayu sa Ginoo.
31 Ginsingganan ni Moises si Aaron kag ang iya mga anak nga lalaki, "Dalha ang karne sa puwertahan sang Tolda nga Tilipunan, lagaa ini, kag kauna ini didto upod sa tinapay nga yara sa alat nga nasudlan sang mga halad tungod sang pag-orden, suno sa sugo sang Ginoo.
32 Sunoga ang karne ukon ang tinapay nga mabilin.
33 Indi ninyo pagbayaan ang puwerta sang Tolda sa sulod sang pito ka adlaw, tubtob matapos ang pag-orden sa inyo.
34 Ang Ginoo nagmando sa aton sa paghimo sining aton nahimo na karon nga adlaw sa pagkuha sang inyo mga sala.
35 Kinahanglan magpabilin kamo sa puwertahan sang Tolda sang Kasugtanan sa adlaw kag gab-i sa sulod sang pito ka adlaw, nga nagahimo sang ginsugo sang Ginoo. Kon indi kamo magtuman sini, magakalamatay kamo. Amo ini ang ginsugo sang Ginoo sa akon."
36 Gani si Aaron kag ang iya mga anak nga lalaki nagtuman sang tanan nga ginsugo sang Ginoo paagi kay Moises.
No comments:
Post a Comment