☆☆☆
Levitico 14 | Levitico 16
Di-matinlo nga Nagapanggwa sa Lawas
1 Ang Ginoo naghatag kay Moises kag kay Aaron sang masunod nga mga pagsulondan,
2 para sa mga tawo sang Israel. Kon ang isa ka lalaki ginapanggwaan sa iya kinatawo, ang nagapanggwa di-matinlo,
3 bisan magapadayon ini sa pag-ilig ukon nag-untat na.
4 Ang katre nga iya pagalingkuran ukon pagahigdaan mangindi-matinlo.
5 Ang bisan sin-o nga makatandog sang iya higdaan
6 ukon makalingkod sa bisan ano nga ginlingkuran sang amo nga tawo kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.
7 Ang bisan sin-o nga makatandog sang tawo nga ginapanggwaan kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.
8 Kon ang tawo nga ginapanggwaan makadupla sa bisan sin-o nga tawo nga matinlo, ang amo nga tawo kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.
9 Ang bisan ano nga montora ukon pulongkoan nga ginalingkuran sang tawo nga ginapanggwaan di-matinlo.
10 Ang bisan sin-o nga makatandog sang bisan ano nga butang nga ginlingkuran sang amo nga tawo mangindi-matinlo tubtob sa gab-i. Ang bisan sin-o nga magdala sang bisan ano nga butang nga ginlingkuran sang amo nga tawo kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.
11 Kon ang isa ka tawo nga ginapanggwaan makatandog sa isa ka tawo sa wala pa sia makapanghinaw sang iya mga kamot, ang tawo nga natandog kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.
12 Ang bisan ano nga sulodlan nga duta nga matandog sang amo nga tawo kinahanglan buongon kag ang bisan ano nga sulodlan nga kahoy nga iya matandog kinahanglan hugasan.
13 Sa tapos mag-ayo ang tawo sa nagapanggwa sa iya, kinahanglan maghulat sia sing pito ka adlaw, kag dayon labhan niya ang iya mga bayu kag magpaligo sa tubig sa tuboran, kag manginmatinlo sia.
14 Sa ikawalo nga adlaw magadala sia sing duha ka bilog nga pating ukon duha ka tukmo sa puwertahan sang Tolda nga Tilipunan kag ihatag niya ini sa pari.
15 Ang pari magadulot sang isa sini subong isa ka halad tungod sa sala kag ang isa subong isa ka halad nga sinunog. Sa sini nga paagi himuon niya ang tulomanon sa pagpaninlo para sa amo nga tawo.
16 Kon ang isa ka tawo awasan sang iya binhi, paliguan niya ang iya bug-os nga lawas, kag magapabilin sia nga di-matinlo tubtob sa gab-i.
17 Ang bisan ano nga nahimo sa panapton ukon panit nga naawasan sang binhi, kinahanglan pagalabhan, kag magapabilin nga di-matinlo ini tubtob sa gab-i.
18 Sa tapos sang paghilawasay, ang lalaki kag ang babayi kinahanglan magpaligo, kag magapabilin sila nga di-matinlo tubtob sa gab-i.
19 Kon ang isa ka babayi yara ang iya pamulanon, magapabilin sia nga di-matinlo sa sulod sang pito ka adlaw. Ang bisan sin-o nga makatandog sa iya mangindi-matinlo tubtob sa gab-i.
20 Ang bisan ano nga iya ginalingkuran ukon ginahigdaan sa tion nga yara ang iya pamulanon mangindi-matinlo.
21-23 Ang bisan sin-o nga makatandog sang iya higdaan ukon sang bisan ano nga butang nga iya ginlingkuran kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.
24 Kon ang isa ka lalaki magpakighilawas sa iya sa tion nga yara ang iya pamulanon, nadagtaan ang amo nga lalaki sang iya pagkadi-matinlo kag magapabilin sia nga di-matinlo sa sulod sang pito ka adlaw, kag ang bisan ano nga higdaan nga iya ginahigdaan mangindi-matinlo.
25 Kon ang isa ka babayi ginapanggwaan sing dugo, sa sulod sang pila ka adlaw wala labot sang iya pamulanon, ukon ang pagpanggwa sang dugo sa iya nagapadayon pa bisan tapos na ang iya pamulanon, magapabilin sia nga di-matinlo tubtob nga may nagapanggwa pa nga dugo sa iya subong sang panahon sang iya pamulanon.
26 Ang bisan ano nga higdaan nga iya ginahigdaan kag ang bisan ano nga butang nga iya ginalingkuran mangindi-matinlo sa sina nga panahon.
27 Ang bisan sin-o nga makatandog sini mangindi-matinlo kag kinahanglan maglaba sang iya mga bayu kag magpaligo; kag magapabilin sia nga di-matinlo tubtob sa gab-i.
28 Sa tapos ang pagpanggwa sang dugo sa iya, magahulat sia sing pito ka adlaw, kag dayon manginmatinlo sia.
29 Sa ikawalo nga adlaw magadala sia sing duha ka bilog nga pating ukon duha ka tukmo sa pari sa puwertahan sang Tolda nga Tilipunan.
30 Ang pari magadulot sang isa sini subong isa ka dulot tungod sa sala kag ang isa subong halad nga sinunog, kag sa sini nga paagi himuon niya ang tulomanon sa pagpaninlo para sa iya.
31 Ginsingganan sang Ginoo si Moises sa pagpaandam sa mga tawo sang Israel nahanungod sang ila pagkadi-matinlo, agod nga indi nila madagtaan ang iya Tolda nga Tilipunan, nga yara sa tunga sang kampamento. Kon himuon nila ini mapatay sila.
32 Amo ini ang mga pagsulondan nahanungod sang tawo nga ginapanggwaan kag gin-awasan sang iya binhi,
33 sang babayi sa tion sang iya pamulanon, ukon sang tawo nga nakapakighilawas sa isa ka babayi nga di-matinlo.
No comments:
Post a Comment