Levitico 12

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27

☆☆☆

Ang Pagpaninlo sang mga Babayi sa Tapos Makabata

1 Ang Ginoo naghatag kay Moises sining masunod nga mga pagsulondan

2 para sa mga tawo sang Israel. Sa sulod sang pito ka adlaw ang isa ka babayi nga makabata sing isa ka lalaki mangindi-matinlo sia subong sang sa iya pamulanon.

3 Sa ikawalo nga adlaw, ang bata nga lalaki pagatulion.

4 Dayon kinahanglan pa ang 33 ka adlaw kag manginmatinlo sia sa nagapanggwa sa iya nga dugo; kinahanglan indi sia magtandog sang bisan ano nga butang nga balaan ukon magsulod sa balaan nga Tolda tubtob matapos ang iya pagpaninlo.

5 Sa sulod sang 14 ka adlaw ang babayi nga makabata sing babayi, mangindi-matinlo subong sang sa iya pamulanon. Dayon kinahanglan pa ang 66 ka adlaw kag manginmatinlo sia sa naga panggwa sa iya nga dugo.

6 Kon tapos na ang panahon sang iya pagpaninlo, bisan ang iya bata lalaki ukon babayi, magadala sia sa pari sa puwertahan sang Tolda sang Kasugtanan sing isa ka tuig nga cordero para sa halad nga sinunog kag isa ka tukmo ukon pating para sa halad tungod sa sala.

7 Ang pari magadulot sang iya halad sa Ginoo kag magahimo sang tulomanon sa pagkuha sang iya pagkadi-matinlo, kag manginmatinlo sia. Gani, amo ini ang pagahimuon sang isa ka babayi sa tapos sia makabata.

8 Kon ang babayi indi makasarang sa paghalad sang isa ka cordero, magadala sia sing duha ka pating ukon duha ka tukmo, ang isa para sa halad nga sinunog kag ang isa para sa halad tungod sa sala, kag ang pari magahimo sang tulomanon sa pagkuha sang iya pagkadi-matinlo, kag manginmatinlo sia. 

Levitico 11 | Levitico 13