☆☆☆
Levitico 4 | Levitico 6
Mga Kaso nga Ginakinahanglan ang mga Halad tungod sa Sala
1 Ang halad tungod sa sala ginakinahanglan sa masunod nga mga kaso. Kon ang isa ka tawo ginpatawag sa pagsaksi sa korte kag indi sia magsugid nahanungod sang iya nakita kag nabatian, may salabton sia tungod sini.
2 Kon ang bisan sin-o makatandog sing indi hungod sang bisan ano nga butang nga mahigko subong sang isa ka patay nga sapat, mangindi-matinlo sia kag nakalapas sa tion nga matalupangdan niya ang iya nahimo.
3 Kon ang bisan sin-o makatandog sing indi hungod sang bisan ano nga mahigko nga nagikan sa tawo, bisan ano man ini nga butang, nakalapas sia sa tion nga matalupangdan niya ang iya nahimo.
4 Kon ang bisan sin-o nga makasumpa sing indi hungod, bisan ano nga butang ang iya ginsumpaan, nakalapas sia sa tion nga matalupangdan niya ang iya nahimo.
5 Kon ang isa ka tawo nakalapas, kinahanglan magtuad sia sang iya sala
6 kag subong silot tungod sang iya sala, magdala sia sa Ginoo sang isa ka karnero ukon kanding nga babayi subong isa ka halad. Ang pari magadulot sang halad tungod sa sala sang tawo.
7 Kon ang isa ka tawo indi makasarang sa pagdulot sang isa ka karnero ukon kanding, magdala sia sa Ginoo subong bayad sang iya sala sing duha ka pating ukon duha ka tukmo, ang isa para sa halad tungod sa sala kag ang isa para sa halad nga sinunog.
8 Dalhon niya ini sa pari, nga magahalad sing una sang pispis subong halad tungod sa sala. Lubagon niya ang liog agod maluta ini, pero indi pag-utason
9 kag iwisik ang bahin sang dugo sini sa kilid sang altar. Ang nabilin nga dugo iya iula sa sadsaran sang altar. Amo ini ang halad sa pagkuha sang sala.
10 Dayon idulot niya ang ikaduha nga pispis subong isa ka halad nga sinunog, suno sa mga pagsulondan. Sa sini nga paagi ang pari magadulot sing halad para sa sala sang amo nga tawo, kag pagapatawaron sia.
11 Kon ang isa ka tawo indi makasarang magdulot sang duha ka pating ukon duha ka tukmo, magdala sia sing duha ka libra nga arina subong isa ka halad tungod sa sala. Indi niya ini pagbutangan sing lana sang olivo ukon insyenso, kay isa ini ka halad tungod sa sala, kag indi isa ka halad nga kalan-on.
12 Dalhon niya ini sa pari, nga magakuha sing isa ka hakop sini subong isa ka tanda nga ini tanan nahalad sa Ginoo, kag sunogon ini sa altar subong isa ka halad nga kalan-on. Isa ini ka halad sa pagkuha sang sala.
13 Sa sini nga paagi ang pari magadulot sing halad para sa sala sang amo nga tawo, kag pagapatawaron sia. Ang nabilin nga arina iya sang pari subong sang sa halad nga kalan-on.
Mga Halad tungod sang mga Balayran
14 Ang Ginoo naghatag sini nga mga sugo kay Moises.
15 Kon ang bisan sin-o makasala sing indi hungod paagi sa di-paghatag sang mga balayran nga balaan sa Ginoo, magadala sia subong iya halad nga bayad sa Ginoo sing isa ka karnero ukon kanding nga lalaki nga wala sing depekto. Pabilihan ini suno sa opisyal nga talaksan.
16 Dapat niya bayaran ang wala niya mahatag kag magadugang sia sa pagbayad sing 20 porsiyento. Ihatag niya ini sa pari, kag ang pari magadulot sang sapat subong isa ka halad para sa sala sang amo nga tawo, kag pagapatawaron sia.
17 Kon ang bisan sin-o makasala sing indi hungod paagi sa paglapas sang bisan ano nga sugo sang Ginoo, nakalapas sia kag dapat niya bayaran ang silot.
18 Kinahanglan magdala sia sa pari sing isa ka karnero ukon kanding nga lalaki nga wala sing depekto subong iya bayad nga halad. Pabilihan ini suno sa opisyal nga talaksan. Ang pari magadulot sing halad para sa sala sang amo nga tawo, kag pagapatawaron sia.
19 Isa ini ka bayad nga halad tungod sa sala nga iya nahimo batok sa Ginoo.
No comments:
Post a Comment