☆☆☆
Ang mga Pagsulondan para sa mga Nazareo
1 Ang Ginoo nagmando kay Moises,
2 sa paghatag sang masunod nga mga pagsulondan sa mga tawo sang Israel. Ang bisan sin-o nga lalaki ukon babayi nga maghimo sang pinasahi nga panaad nga mangin-isa ka Nazareo kag maghalad sang iya kaugalingon sa Ginoo,
3 maglikaw sia sa bino kag makahulubog nga ilimnon. Indi sia mag-inom sang bisan ano nga sahi sang ilimnon nga nagikan sa ubas ukon magkaon sang ubas ukon pasas.
4 Samtang sia isa pa ka Nazareo, indi sia magkaon sang bisan ano nga nagikan sa balagon sang ubas, bisan gani ang binhi ukon panit sang ubas.
5 Samtang ginagamhan pa sia sang panaad sang pagka-Nazareo, indi niya pagpaguntingan ang iya buhok ukon magpamarbas. Dapat gid niya tumanon ang iya saad sa bug-os nga panahon nga nahalad sia sa GINOO kag patuboon niya ang iya buhok kag bungot.
6-7 Ang iya buhok amo ang tanda sang paghalad sang iya kaugalingon sa Dios, kag indi niya pagdagtaan ang iya kaugalingon paagi sa pagpalapit sa isa ka bangkay, bisan gani ang bangkay sang iya amay, iloy, utod nga lalaki, ukon utod nga babayi.
8 Samtang isa sia ka Nazareo, nahalad sia sa Ginoo.
9 Kon ang nahalad nga buhok sang isa ka Nazareo nadagtaan tungod kay yara gid sia sa luyo sang isa nga napatay sing hinali lang, kinahanglan maghulat sia sing pito ka adlaw kag dayon kiskisan niya ang iya buhok kag bungot; dayon manginmantinlo sia.
10 Sa ikawalo nga adlaw magadala sia sing duha ka pating ukon duha ka tukmo sa pari sa puwertahan pakadto sa Tolda sa Tilipunan.
11 Ang pari magahalad sang isa subong isa ka halad tungod sa sala kag ang isa subong isa ka halad nga sinunog, sa pagtuman sang buluhaton sa pagpaninlo para sa iya tungod sang iya pagtandog sa isa ka patay. Sa amo man nga adlaw ang tawo magahalad liwat sang iya buhok
12 kag sang iya panahon sa Ginoo subong isa ka Nazareo. Ang nagligad nga panahon wala sing pulos, tungod kay nadagtaan ang iya nahalad nga buhok. Subong isa ka dulot nga bayad, magadala sia sing kordero nga nagaedad sing isa ka tuig.
13 Kon ang isa ka Nazareo makatapos na sa iya panaad, himuon niya ang masunod nga tulumanon: Magakadto sia sa puwertahan pakadto sa Tolda nga Tilipunan
14 kag magahalad sia sa Ginoo sing tatlo ka bilog nga mga sapat nga wala sing depekto: isa ka kordero nga nagaedad sing isa ka tuig para sa halad nga sinunog, isa ka kordero nga nagaedad sing isa ka tuig para sa halad tungod sa sala, kag isa ka karnero nga lalaki para sa halad sa paghiambit.
15 Magahalad man sia sing isa ka alat nga tinapay nga naluto nga wala sing lebadora: madamol nga binilog sang tinapay nga nasamoan sing lana sang olivo, kag manipis nga mga tinapay nga nahiboan sing lana sang olivo, lakip ang kinahanglanon nga mga halad nga kalan-on kag ilimnon.
16 Ang pari magahalad sini sa Ginoo kag magadulot sang halad tungod sa sala kag sang halad nga sinunog.
17 lhalad niya sa Ginoo ang karnero nga lalaki subong isa ka halad sa paghiambit, lakip ang isa ka alat nga tinapay, kag magadulot sang mga halad nga kalan-on kag ilimnon.
18 Sa puwertahan pakadto sa Tolda nga Tilipunan ang Nazareo magakiskis sang iya buhok kag magalakat sia kag ibutang ini sa kalayo sa diin ginasunog ang halad sa paghiambit.
19 Dayon kon malaga na ang abaga sang karnero nga lalaki, ang pari magakuha sini kag ibutang sa kamot sang Nazareo, lakip ang isa ka bilog nga madamol nga kalan-onon, kag isa ka bilog nga tinapay nga manipis halin sa alat.
20 Dayon ang pari magadulot sini subong isa ka pinasahi nga halad sa Ginoo; balaan ini nga dulot para sa mga pari, wala labot sang dughan kag sang paa sang karnero nga lalaki nga suno sa kasugoan iya sang pari. Sa tapos sini, ang Nazareo sarang makainom sing bino.
21 Amo ini ang mga pagsulondan para sa mga Nazareo; pero kon ang isa ka Nazareo magsaad sing halad nga labaw pa sang sa ginakinahanglan sa iya ginsaad, sa iya gid tumanon ang suno sa iya panaad.
Ang Bendisyon sang mga Pari
22 Ang Ginoo nagsugo kay Moises
23 nga singganon si Aaron kag ang iya mga anak nga lalaki sa paggamit sang masunod nga mga pulong sa pagbendisyon sang mga tawo sang Israel:
24 Kabay ang Ginoo magbendisyon sa inyo kag magtatap sa inyo;
25 kabay ang Ginoo magmaluloy-on kag magmaalwan sa inyo;
26 kabay ang Ginoo magmaayo sa inyo kag maghatag sa inyo sing paghidait.
27 Kon gamiton nila ini nga bendisyon sa ila pagpangamuyo sa Ginoo para sa mga tawo sang Israel, bendisyonan niya sila.
No comments:
Post a Comment