Numeros 25

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36

☆☆☆

Ang mga Tawo sang Israel sa Peor

1 Sang ang mga Israelinhon nagpahamtang sang ila kampamento sa kapatagan sang Acasia, ang mga lalaki nagpakighilawas sa mga babayi nga Moabnon nga yadto didto.

2 Ini nga mga babayi nag-agda sa ila sa mga piesta, sa diin ginasimba ang dios sang Moab. Ang mga Israelinhon nagkaon sang pagkaon kag nagsimba sa dios,

3 nga si Baal sang Peor. Ang Ginoo naakig sa ila,

4 kag nagsiling kay Moises, "Dalha ang tanan nga mga pangulo sang Israel, kag sa pagtuman sa akon, pamatya sila sa kasanag sang adlaw, agod indi na ako magkaakig sini nga mga tawo.”

5 Si Moises nagsiling sa mga opisyales, "Ang tagsatagsa sa inyo magpamatay sang tanan nga mga lalaki nga sa inyo tribo nga nagasimba kay Baal sang Peor."

6 Ang isa ka Israehlinhon nagkuha sing isa ka babayi nga Madianhon sa sulod sang iya tolda samtang nagatan-aw si Moises kag ang buos nga katilingban, sang sila nagalalaw sa puwertahan sang Tolda nga Tilipunan.

7 Sang makita ni Finees, nga anak ni Eleazar kag apo ni Aaron nga pari, nagtindog sia kag naghalin sa katilingban. Nagkuha sia sing bangkaw,

8 ginsunod niya ang lalaki kag babayi sa sulod sang Tolda, kag gintuhog niya sila nga duha sang bangkaw. Sa sini nga paagi nag-untat ang kamatay nga nagalaglag sang Israel,

9 pero ang mga tawo nga nagkalamatay na 24,000.

10 Ang Ginoo nagsiling kay Moises,

11 "Ginpaugdaw ni Finees ang akon kaakig sa mga tawo sang Israel. Indi sia magtugot sa pagsimba sa iban nga dios luwas sa akon, kag amo ini ang kabangdanan nga wala ko sila paglaglaga sa akon kaakig.

12 Gani singgana sia nga magahimo ako sing kasugtanan sa iya nga magapadayon sa tanan nga panahon nga palaabuton.

13 Sia kag ang iya mga kaliwat manginpermanente nga mga pari, kay wala sia magtugot sang bisan sin-o sa pag-agaw sang akon lugar, kag tungod sang iya ginhimo ginpatawad ang sala sang mga tawo.”

14 Ang ngalan sang Israelinhon nga ginpatay upod sa babayi nga Midianhon amo si Zimri nga anak ni Salu, pangulo sang isa ka panimalay sa tribo ni Simeon.

15 Ang ngalan sang babayi amo si Cozbi. Si Zur, nga iya amay pangulo sang isa ka grupo sang mga kabaranggayan sang Midianhon.

16 Ang Ginoo nagsugo kay Moises,

17 "Salakaya ang mga Midianhon kag laglaga sila,

18 tungod sang kalautan nga ila ginhimo sa inyo sang ginlimbongan nila kamo sa Peor, kag tungod kay Cozbi, nga ginpatay sa tion sang kamatay sa Peor. " 

Numeros 24 | Numeros 26