☆☆☆
Di-matinlo nga mga Tawo
1 Ang Ginoo nagsiling kay Moises,
2 "Mandoi ang mga tawo sang Israel sa pagpagwa sa kampamento sang tagsatagsa nga may makalalaton nga balatian sa panit ukon ginapanggwaan sa iya lawas, kag ang tagsatagsa nga nangindi-matinlo tungod sang iya pagtandog sa isa ka bangkay.
3 Pagwaa ang tanan nga di-matinlo nga mga tawo, agod nga indi nila madagtaan ang kampamento, sa diin nagapuyo ako upod sa akon mga tawo."
4 Ang mga Israelinhon nagtuman kag ginpagwa nila sila tanan sa kampamento.
Bayad tungod sang Nahimo nga mga Sala
5 Ang Ginoo naghatag kay Moises
6 sang masunod nga mga pagsulondan para sa mga tawo sang Israel. Ang bisan sin-o nga maglapas sa Ginoo kag maghimo sing sayop batok sa iban,
7 kinahanglan kilalahon kag isugid niya ang iya sala kag bayaran niya sing bug-os ang tawo nga nahimoan niya sing sayop, kag magadugang sia sing 20 porsiyento.
8 Pero kon ang tawo nga nahimuan sing sala patay na kag wala sing malapit nga himata nga sarang mabayaran, ihatag ini sa Ginoo para sa pari. Ini nga bayad wala labot sa karnero nga lalaki nga gingamit nga halad para sa iya pagpaninlo.
9 Ang tagsa man ka pinasahi nga dulot nga ginahalad sang mga Israelinhon sa Ginoo iya sang pari nga ila ginatugyanan sini.
10 Ang tagsa ka pari magakuha sang mga dulot nga ginatugyan sa iya.
Mga Palaligban sa mga Asawa nga Ginapangimunan sang mga Bana
11 Ang Ginoo nagsugo kay Moises
12-14 sa paghatag sa mga Israelinhon sang masunod nga mga pagsulondan. Kon ang isa ka lalaki magpangduhadoha nga ang iya asawa nagaluib sa iya, kag nagdagta sang iya kaugalingon paagi sa pagpakighilawas sa iban nga lalaki; pero wala man mapat-ud sang bana, tungod kay ginalikom man ini sang iya asawa; wala man sing makasaksi, kag wala sia madakpi sa akto; ukon abi ang bana nagpangduhadoha sa iya asawa, bisan ang iya asawa wala magluib sa iya;
15 sa bisan diin nga kahimtangan, ang lalaki magadala sang iya asawa sa pari. Magadala man sia sang kinahanglanon nga halad, duha ka libra nga arina nga sebada, pero indi niya ini pagbuboan sing lana nga olivo ukon butangan ini sing insyenso, tungod kay isa ini ka halad tungod sa pagpangimon, sa pagpagwa sang matuod.
16 Ang pari magadala sang babayi sa atubangan kag patindogon sia sa atubangan sang altar.
17 Buboan niya sing balaan nga tubig ang yahong nga nahimo sa lunang, kag magakuha sia sing duta nga yara sa may salog sang Tolda nga Tilipunan kag ibutang ini sa tubig.
18 Dayon bunghayon sang pari ang buhok sang babayi kag ibutang niya ang halad nga arina sa kamot sang babayi. Ang pari magauyat sang yahong nga may unod nga mapait nga tubig nga nagadala sang pagpakamalaut.
19 Dayon himuon sang pari nga magsugot ang babayi sa panumpa nga ihambal sang pari, "Kon wala ikaw makapakighilawas sa iban nga lalaki, indi ikaw mahalitan sang pagkamalaut nga ginadala sini nga tubig.
20 Pero kon nakapakighilawas ikaw sa iban nga lalaki,
21 kabay nga himuon sang Ginoo ang imo ngalan nga pagpakamalaut sa tunga sang imo kasimanwa. Kabay nga pakuposon ang imo kinatawo kag pahabukon ang imo tiyan.
22 Kabay ini nga tubig magsulod sa imo tiyan kag magapahabok sang imo tiyan kag magapakupos sang imo kinatawo. Ang babayi magasabat, "Nagasugot ako, kabay nga himuon ini sang Ginoo.”
23 Dayon isulat sang pari ini nga pagpakamalaut kag hugasan niya ang sinulat sa yahong nga may mapait nga tubig.
24 Sa wala pa niya mapainom ang babayi sang tubig, nga ayhan manginkabangdanan sang iya mapait nga kasakitan,
25 ang pari magakuha sang halad nga arina sa kamot sang babayi, uyatan niya ini agod ihalad sa Ginoo, kag ihalad ini sa altar.
26 Dayon magakuha sia sing isa ka hakop sini subong isa ka handumanan nga dulot kag sunogon ini sa altar. Sa katapusan ipainom niya ang tubig sa babayi.
27 Kon nakapakighilawas sia sa iban nga lalaki, ang tubig magahatag sa iya sing mapait nga kasakitan kag ang iya tiyan magahabok kag ang iya kinatawo magakupos. Ang iya ngalan mangin isa ka pagpakamalaut sa tunga sang iya mga kasimanwa.
28 Pero kon wala sia sing sala, indi sia mahalitan, kag sarang sia makaanak sing mga kabataan.
29-30 Amo ini ang kasugoan kon ang isa ka lalaki nagapangimon kag nagapangduhaduha nga ang iya asawa nagapakighilawas sa iban nga lalaki. Ang babayi pagapatindogon sa atubangan sang altar, kag ang pari magahimo sini nga tulumanon.
31 Ang bana manginhilway sa kalautan pero ang babayi, kon nakasala, kinahanglan mag-antos sang silot.
No comments:
Post a Comment