☆☆☆
1 Ginsingganan niya si Balak. "Patindogi ako diri sing pito ka mga altar, kag dalhi ako sing pito ka bilog nga toro nga mga baka kag pito ka bilog nga mga kanding."
2 Ginhimo ni Balak ang ginsiling sa iya, kag sia kag si Balaam naghalad sing toro nga baka kag kanding sa tagsa ka altar.
3 Dayon ginsingganan ni Balaam si Balak, "Magtindog ka diri sa luyo sang imo halad nga sinunog, samtang malakat ako sa paghibalo kon bala ang Ginoo magapakigkita sa akon ukon indi. Sugiran ko ikaw sang bisan ano nga iya ipahayag sa akon." Gani nagtaklad sia nga isahanon pakadto sa putokputokan sang bakulod,
4 kag ang Dios nagsugata sa iya. Nagsiling si Balaam sa iya, "Nagpatindog ako sing pito ka mga altar kag naghalad sing isa ka toro nga baka kag isa ka kanding sa tagsa ka altar.”
5 Ang Ginoo nagsugo kay Balaam kon ano ang isiling kag ginpadala sia pabalik kay Balak sa pagsugid sang luyag ihambal sang Ginoo.
6 Gani nagbalik siya kag nakita niya si Balak nga nagatindog pa didto sa luyo sang iya halad nga sinunog, upod sa tanan nga mga pangulo sang Moab.
7 Si Balaam naghambal sang iya tagna: "Si Balak nga hari sang Moab nagdala sa akon halin sa Siria, halin sa nasidlangan nga mga kabukiran. Siling niya, 'Kari kag maghambal ka para sa akon, pakamalauta ang mga tawo sang Israel.'
8 Ano ang pagpakamalaut ko sang wala ginapakamalaut sang Dios, ukon ano bala ang pagkondenar ko sang wala ginkondenar sang Dios?
9 Halin sa mataas nga mga bato makita ko sila; matan-aw ko sila halin sa mga kabakuloran. Sila isa ka pungsod nga nagapuyo sing isahanon; nahibal-an nila nga bulahan sila sang sa iban nga mga pungsod.
10 Ang mga kaliwat sang Israel kaangay sang yab-ok—kadamo sa ila nga indi sarang maisip. But-a nga matapos ang akon mga inadlaw kaangay sang isa sang mga tawo sang Dios; but-a nga mapatay ako nga may kalinong kaangay sang isa ka tawo nga matarong.”
11 Dayon si Balak nagsiling kay Balaam, "Ano bala ining ginhimo mo sa akon? Gindala ko ikaw diri sa pagpakamalaut sang akon mga kaaway, pero ang imo lamang ginhimo amo ang pagbendisyon sa ila.”
12 Nagsabat sia, "Ang akon lamang mahambal amo ang ginasiling sang GINOO sa akon."
Ang Ikaduha nga Tagna ni Balaam
13 Dayon si Balak nagsiling kay Balaam, "Mag-upod ka sa akon sa isa pa ka duog sa diin makita mo ang bahin lamang sang mga Israelinhon. Halin didto pakamalauta sila para sa akon.”
14 Gindala niya si Balaam sa latagon sang Zofim sa putokputokan sang bukid sang Pisga. Nagpatindog sia didto sing pito ka mga altar kag naghalad sing isa ka toro nga baka kag isa ka kanding sa tagsa ka altar.
15 Ginsingganan ni Balaam si Balak, "Magtindog ka diri sa luyo sang imo halad nga sinunog, kag magakadto ako sa unhan sa pagpakigkita sa Dios."
16 Ang Ginoo nagpakigkita kay Balaam, ginsugo sia sang iya inughambal, kag ginpadala sia pabalik kay Balak sa paghambal sang iya mensahi.
17 Gani, nagbalik sia kag nakita niya si Balak nga nagatindog pa didto sa luyo sang iya halad nga sinunog, upod sa mga pangulo sang Moab. Nagpamangkot si Balak kon ano ang ginsiling sang Ginoo,
18 kag si Balaam naghambal sini nga tagna: "Kari ka, Balak, anak ni Zipor, kag magpamati ka sa akon ihambal.
19 Ang Dios indi kaangay sang mga tawo nga nagabutig; indi sia isa ka tawo nga nagabaylo sang iya hunahona. Kon ano ang iya ginasaad, iya ginatuman; ang iya ginahambal, iya ginahimo.
20 Ginsugo ako sa pagbendisyon, kag kon ang Dios nagabendisyon indi ako makabaliskad sini.
21 Makita ko nga ang palaabuton sang Israel indi magdala sa iya sing kalainan ukon kabudlayan. Ang GINOO nga ila Dios nagaupod sa ila; ginapakilala nila nga sia amo ang ila hari.
22 Ang Dios nagdala sa ila pa gwa sa Egipto; nagapakig-away sia tungod sa ila kaangay sang isa ka simaron nga baka.
23 Wala sing manugpakot ukon manugbabaylan, nga sarang magamit batok sa pungsod sang Israel. Karon ang mga tawo magasiling nahanungod sa Israel, ‘Tan-awa ninyo ang ginhimo sang Dios!'
24 Ang pungsod sang Israel kaangay sang isa ka leon nga makusog: Indi sia mag-untat tubtob makusnit niya kag matukob kag mainom ang dugo sang iya mga ginpamatay."
25 Dayon si Balak nagsiling kay Balaam, "Indi ka magpakamalaut sang mga tawo sang Israel, pero indi man sila pagbendisyoni!"
26 Nagsabat si Balaam, "Wala bala ako magsiling sa imo nga himuon ko ang tanan nga ginsugo sang Ginoo sa akon?"
Ang Ikatlo nga Tagna ni Balaam
27 Si Balak nagsiling, "Mag-upod ka sa akon, kag dalhon ko ikaw sa isa ka duog. Ayhan didto tugotan ka sang Dios sa pagpakamalaut sa ila para sa akon."
28 Gani, gindala niya si Balaam sa putokputokan sang bukid sang Peor, nga nagatamod sa desierto.
29 Ginsingganan sia ni Balaam, "Magpatindog ka diri sing pito ka altar para sa akon kag dalhi ako sing pito ka toro nga baka kag pito ka kanding."
30 Gintuman ni Balak ang ginsiling sa iya, kag naghalad sia sing isa ka toro nga baka kag isa ka kanding sa tagsa ka altar.
No comments:
Post a Comment