☆☆☆
Ang Duog nga Ginatawag Tabera
1 Ang mga tawo nagsugod sa pagreklamo sa GINOO nahanungod sang ila mga kabudlayan. Sang mabatian sila sang Ginoo, naakig sia kag ginpadalhan niya sing kalayo ang mga tawo. Nagdabdab ini sa tunga nila kag nagsunog sang isa ka nahigad nga bahin sang kampamento.
2 Ang mga tawo nagpanawag kay Moises sa pagpangayo sing bulig; nagpangamuyo sia sa Ginoo kag nag-ugdaw ang kalayo.
3 Gani, ang duog gintawag nga Tabera, kay didto ang kalayo sang Ginoo nagdabdab sa tunga nila.
Si Moises Nagpili sang 70 ka mga Pangulo
4 Ang grupo sang mga dumoluong nga nagapanglakaton upod sa mga Israelinhon nahidlaw gid sa pagkaon sing karne, kag bisan gani ang mga Israelinhon nagsugod sa pagreklamo, "Kon may karne kontani kita!
5 Sa Egipto nagpagusto kita sing kaon sang tanan nga isda nga aton nauyonan, kag wala kita sing bayad. Dumdoma ninyo ang mga atimon, ang mga sandiya, ang mga bawang, ang mga sebuyas, kag ang mga ahos nga aton natilawan!
6 Pero karon nagniwang na kita. Wala na kita sing sarang kaunon, luwas lamang sining mana kada adlaw."
7 (Ang mana kaangay sang magagmay nga mga binhi, nga ang iya kolor krema.
8-9 Nagatupa ini sa kampamento kon gab-i, upod sa tun-og. Pagkaaga, ang mga tawo naglibot sa pagpamulot sini, ginabayo ukon ginagaling nila ini agod mabukbok, kag dayon lutuon nila ini nga mangin-manipis nga mga tinapay. Ang sabor sini pareho sang tinapay nga naluto sa lana sang olivo.)
10 Nabatian ni Moises ang mga reklamo sang mga tawo samtang nagatindog sila nga nagatipontipon sa mga puwertahan sang ila mga tolda. Nasub-an gid sia, tungod kay ang Ginoo naakig sa ila,
11 kag nagsiling sia sa Ginoo, "Ngaa bala ginhimo mo ining malain nga butang sa akon? Ngaa wala ka malipay sa akon? Ngaa bala nga ako ang manabat para sa sini nga mga tawo?
12 Indi ako ang nagtuga sa ila ukon nagpanganak sa ila! Ngaa nga magsiling ka nga kugoson ko sila kaangay sang mga lapsag pakadto sa duta nga imo ginsaad sa ila mga katigulangan?
13 Diin bala ako makuha sing tuman nga karne para sa sining tanan nga mga tawo? Nagapadayon sila sa pagreklamo nga nagapangayo sing karne.
14 Indi ko masarangan ang pagdumala sini tanan nga mga tawo sa akon kaugalingon; tama ini kabudlay para sa akon!
15 Kon amo ini ang imo himuon sa akon, maluoy ka, patya na lang ako, agod indi na ako mag-antos sang imo pagkapintas.”
16 Ang Ginoo nagsiling kay Moises, “Tipona ang 70 ka mga tawo nga ginatahod kag ginakilala nga mga pangulo sang mga tawo, dalha sila sa akon sa Tolda nga Tilipunan, kag singgana sila sa pagtindog didto sa luyo mo.
17 Magapanaog ako kag magahambal sa imo didto, kag kuhaon ang iban nga espiritu nga akon ginhatag sa imo kag ihatag ko sa ila. Dayon sarang sila makabulig sa imo sa pagdumala sini nga mga tawo, kag indi lang ikaw ang magpas-an sini tanan.
18 Gani, singgana ang mga tawo, 'Paninlo kamo sang inyo kaugalingon para buas, kay magakaon kamo sing karne. Ang Ginoo nakabati sang inyo pagreklamo kag pagsiling nga nagahandom kamo sing karne, kag nga maayo pa kamo sang didto kamo sa Egipto. Karon ang Ginoo magahatag sa inyo sing karne kag magakaon kamo sini.
19 Magakaon kamo sini indi lamang sa isa, ukon duha ka adlaw, ukon lima, ukon napulo, ukon baynte ka adlaw,
20 kundi sa sulod sang isa ka bulan, tubtob nga maggulowa ini sa inyo mga dulunggan, tubtob nga masum-oran kamo sini. Mahanabo ini tungod kay ginsikway ninyo ang Ginoo nga yari diri sa tunga ninyo kag nagreklamo kamo sa iya nga wala na lang tani kamo maghalin sa Egipto.'"
21 Si Moises nagsiling sa Ginoo, "Yari ako nagadumala sang 600,000 ka mga tawo, kag nagasiling ka nga hatagan mo sila sing tuman nga karne sa bug-os nga bulan?
22 May tuman bala nga mga baka kag mga karnero nga maihaw sa pagbusog sa ila? Tuman bala para sa ila ang tanan nga mga isda sa dagat?"
23 Ang Ginoo nagsabat, "May limiti bala ang akon gahom? Sa indi madugay makita mo ang akon ginsiling kon mahanabo ukon indi?”
24 Gani naggwa si Moises kag ginsugiran ang mga tawo sang ginsiling sang Ginoo. Gintipon niya ang 70 ka mga pangulo kag ginpahamtang sila sa palibot sang Tolda nga Tilipunan.
25 Dayon ang GINOO nagpanaog sa panganod kag naghambal sa iya. Ginkuha niya ang iban nga espiritu nga iya ginhatag kay Moises kag ginhatag sa 70 ka mga pangulo. Sang mag-abot sa ila ang espiritu, nagsinggit sila nga nagawalay, pero indi man lang madugay.
26 Ang duha sang 70 ka mga pangulo, si Eldad kag si Medad, nagpabilin sa kampamento kag wala maggwa pakadto sa Tolda. Didto sa kampamento nag-abot sa ila ang espiritu, kag nagsinggit sila nga nagawalay.
27 Ang isa ka pamatan-on nga lalaki nagdalagan sa pagsugid kay Moises sang ginhimo ni Eldad kag ni Medad.
28 Dayon si Josue nga anak ni Nun, nga nanginkabulig ni Moises halin sang pamatan-on pa sia naghambal kag nagsiling kay Moises, "Sir, pauntata sila!”
29 Si Moises nagsabat, "Nabalaka bala ikaw sa akon kaayohan? Luyag ko kontani nga ang GINOO maghatag sang iya espiritu sa tanan niya nga mga tawo kag pahambalon niya sila kaangay sa mga propeta."
30 Dayon si Moises kag ang 70 ka mga pangulo sang Israel nagbalik sa kampamento.
Ang Ginoo Nagpadala sing mga Pitaw
31 Sa hinali ang Ginoo nagpadala sing hangin nga may dala nga mga pitaw halin sa dagat, nga nagalupad sing tatlo ka tapak sa ibabaw sang duta. Naghugpa sila sa kampamento kag sa tanan nga palibot sini sing mga kinilometro sa bug-os nga palibot.
32 Gani ang mga tawo nagpangdakop sing mga pitaw sa bug-os nga adlaw, sa bug-os nga gab-i, kag sa bug-os nga adlaw nga madason. Wala sing isa nga nagtipon sing kulang sa 50 ka sako. Ginbulad nila ini sa palibot sang kampamento.
 |
| Ang mga tawo nagpangdakop sing mga pitaw. (11:32) |
33 Sa wala pa maurot ang karne, kag samtang madamo pa ang ila kalan-on, ang Ginoo naakig sa mga tawo kag ginpadalhan niya sila sing mga balatian.
34 Yadto nga duog gintawag nga “Lulobngan sang Pagkaibog,” tungod kay ginlubong nila ang mga tawo didto nga nagkaibog sang karne.
35 Gikan didto ang mga tawo naghalin pakadto sa Hazerot, sa diin naghimo sila sing kampamento.
No comments:
Post a Comment