Rut 2

1  2  3  4

☆☆☆

Si Rut sa Uma ni Boaz

1 Si Noemi may isa ka himata nga ginhingalanan kay Boaz. Isa sia ka manggaranon kag kinilala nga tawo nga katapu sang panimalay sang bana ni Noemi nga si Elimelec.

2 Si Rut nagsiling kay Noemi, “Tugoti ako sa pagkadto sa uma sa pagpanaghaw. Mangita ako sing tawo nga magatugot sa akon sa pagpanaghaw sang biya niya.” Si Noemi nagsabat, “Sigi, maglakat ka, anak ko.”

3 Gani si Rut nagkadto sa uma kag nagsunod sia sa agi sang mga mangangani. Ginpanaghaw niya ang mga uhay nga nabiyaan nila. Natabuan sadto nga nakakadto sia sa uma nga iya si Boaz, ang paryente ni Elimelec.

4 Sang ulihi, si Boaz nag-abot halin sa Bethlehem kag gintamyaw niya ang mga mangangani, “Ang GINOO magaupod sa inyo.” Nagsabat sila, “Ang GINOO magbendisyon sa imo!”

5 Dayon si Boaz nagpamangkot sa iya alagad nga iya ginpadumala sa mga mangangani, “Sin-o inang pamatan-on nga babayi?”

6 Ang iya alagad nagsabat, “Sia ang dumoluong nga babayi nga nag-upod kay Noemi halin sa Moab.

7 Naglisensya sia sa akon sa pagsunod sa mga mangangani sa pagpanaghaw. Aga pa sia nagsugod sa pagpanaghaw kag karon lang sia nag-untat sa pagpahuway sa payag.”

8 Dayon si Boaz nagsiling kay Rut, “Amo ini ang masiling ko sa imo, indi ka na magpanaghaw sa iban nga uma, kundi diri lang. Mag-obra ka diri upod sa mga babayi.

9 Bantayi sila kag tan-awa kon diin sila magaani kag mag-upod ka sa ila. Ginsingganan ko ang akon mga tinawo nga indi ka nila pag-anhon. Kon uhawon ka, kadto ka lang kag mag-inom sa mga banga nga ila ginasudlan sing tubig.”

10 Si Rut nagluhod nga ang iya nawong nagalambot tubtob sa duta, kag nagsiling kay Boaz, “Ngaa bala nga ginakabalak-an mo gid ako? Ngaa bala nga ginaayuhan mo gid ang isa ka dumoluong?”

11 Si Boaz nagsabat, “Ginsugiran ako sang tanan nga imo ginhimo sa imo ugangan nga babayi halin pa sang pagkapatay sang imo bana. Nakahibalo ako nga ginbayaan mo ang imo amay kag iloy kag ang imo pungsod kag magpuyo upod sa mga tawo nga wala gid nimo makilala sang una.

12 Kabay ang GINOO magbalos sa imo tungod sang imo ginhimo. Kabay nga makabaton ka sing bug-os nga balos gikan sa GINOO nga Dios sang Israel nga imo gindangpan!”

13 Si Rut nagsabat, “Sir, kaayo gid sa imo. Ginhatagan mo ako sing kaisog paagi sa imo paghambal sa akon sing malulo, bisan nga indi gani ako makatupong sa imo mga suloguon.”

14 Sang tion na sa pagkaon si Boaz nagsiling kay Rut, “Kari kag magkuha sing isa ka bilog nga tinapay, kag itusmaw ini sa bino.” Gani nagpungko sia upod sa mga mangangani, kag ginduholan sia ni Boaz sang sinanlag nga trigo. Nagkaon si Rut tubtob nabusog sia, kag may nabilin pa sang pagkaon.

15 Sang nakalakat na sia sa pagpanaghaw, si Boaz nagsiling sa mga mangangani, “Pabay-i ninyo sia nga magpanaghaw bisan sa mga tinumpi kag indi ninyo sia pagsawaya.

16 Bugnota ninyo ang iban nga mga uhay sa inupong kag ibilin ini agod nga pamuloton niya. Kag indi ninyo sia pagsabdunga.”

17 Gani nagpanaghaw si Rut sa uma tubtob sa hapon, kag sang malinas niya ini, mga tunga sa sako ang nasupot niya.

18 Gindala niya ang iya uyas sa banwa kag ginpakita niya ini sa iya ugangan. Ginhatag man niya kay Noemi ang nabilin nga pagkaon.

19 Si Noemi nagpamangkot sa iya, “Diin ka magpanaghaw kaina? Kay sin-o uma ikaw nagpanaghaw? Kabay nga ang Dios magbendisyon sang tawo nga nagkabalaka sa imo!” Gani si Rut nagsugid kay Noemi nga didto sia nagpanaghaw sa uma ni Boaz.

20 Si Noemi nagsiling sa iya, “Kabay nga ang GINOO nga nagatuman gid sang iya mga saad sa mga buhi kag mga minatay, magbendisyon sa iya.” Kag nagsiling pa gid sia, “Ina nga tawo suod naton nga himata, kag may katungdanan sia sa pag-atipan sa aton.”

21 Dayon si Rut nagsiling, “Luas sa iban nga mga butang, ginsingganan niya ako nga sigihon ko lang ang pagpanaghaw upod sa iya mga mangangani tubtob maubos ang alanyon.”

22 Si Noemi nagsiling kay Rut, “Huo, anak ko, basi himoan ka pa sing malain kon magkadto ka sa uma sang iban. Maayo pa nga mag-obra ka upod sa mga babayi sa uma ni Boaz.”

23 Gani si Rut nag-obra upod sa ila, kag nagpanaghaw sia tubtob natapos ang pag-ani sang trigo kag sebada. Kag nagpadayon sia sa pagpangabuhi upod sa iya ugangan.

Rut 1 | Rut 3