☆☆☆
Ang Kabalaka ni Nehemias para sa Jerusalem
1 Amo ini ang maragtas ni Nehemias nga anak ni Hakalias. Sa bulan sang Cislev sa ika-20 nga tuig nga si Artajerjes amo ang emperador, ako, si Nehemias yadto sa kapital nga siyudad sang Susa.
2 Si Hanani nga isa sang akon mga utod nga lalaki nag-abot didto upod sa iban nga mga tawo halin sa Juda, kag ginpamangkot ko sila nahanungod sang mga Judio nga nakabalik halin sa kabihagan kag nahanungod man sang Jerusalem.
3 Ginsugiran nila ako nga ang mga nabilin nga buhi kag nakabalik sa ila duta nagaantos, kag ang mga dumoluong nga nagapuyo malapit sa ila nagapakanubo sa ila. Ginsugiran man nila ako nga ang mga pader sang Jerusalem wala pa makaayo kag subong man ang mga puwerta guba gihapon halin sang pagkasunog sini.
4 Pagkabati ko sini, nagpungko ako kag naghibi. Sa sulod sang pila ka adlaw naglalaw ako kag wala magkaon. Nangamuyo ako sa Dios.
5 Siling ko, "O GINOONG Dios sang langit, gamhanan ikaw kag nagatahod kami sa imo. Matutom ka kag nagatuman sang imo kasugtanan sa ila nga nagahigugma sa imo kag nagahimo sang imo ginasugo.
6 Tamda ako, O GINOO, kag pamatii ang akon pangamuyo, samtang nagapangamuyo ako sa adlaw kag gab-i para sa imo mga alagad, ang mga tawo sang Israel. Nagatuad ako nga kami nga mga tawo sang Israel nakasala. Ang akon mga katigulangan kag ako nakasala.
7 Naghimo kami sing kalautan batok sa imo. Wala kami maghimo sang imo ginsugo. Wala namon gintuman ang kasugoan nga imo ginhatag sa amon paagi kay Moises nga imo alagad.
8 Dumdoma karon ang ginsiling mo kay Moises, 'Mga tawo sang Israel, kon indi kamo magmatutom sa akon, palaptahon ko kamo sa iban nga mga pungsod.
9 Pero kon magbalik kamo sa akon kag himuon ang ginasugo ko sa inyo, dalhon ko kamo pabalik sa duog nga akon ginpili nga ako pagasimbahon, bisan pa nga kamo nagalalapta tubtob sa ukbong sang duta.'
10 "O GINOO, mga alagad mo ini, imo kaugalingon nga mga tawo. Ginluwas mo sila paagi sa imo daku nga gahom kag kusog.
11 Pamatii karon ang akon pangamuyo kag ang pangamuyo sang iban mo nga mga alagad nga luyag magpadungog sa imo. Hatagi ako sing pagdaug karon nga adlaw, kag but-a nga ang hari magmaluloy-on sa akon." Sadto nga mga inadlaw, ako ang gintugyanan sa pagserbe sang bino sa lamisa sang hari.
No comments:
Post a Comment