☆☆☆
Ang Paghanda sa Pag-agaw sang Canaan
1 Sang patay na si Moises nga alagad sang GINOO, nagsiling ang GINOO sa kabulig ni Moises nga si Josue nga anak ni Nun,
2 "Si Moises nga akon alagad patay na. Karon maghanda kamo, ikaw kag ang tanan nga mga tawo sang Israel, sa pagtabok sa Suba sang Jordan, kag sa pagsulod sa duta nga akon ginahatag sa inyo.
3 Subong sang ginsiling ko kay Moises, ginhatag ko sa inyo nga akon mga tawo ang tanan nga duta nga inyo paga-agyan.
4 Halin sa desierto sa nabagatnan ang inyo dulonan magalambot pakadto sa kabukiran sang Libano sa aminhan, halin sa daku nga suba sang Euprates sa sidlangan, kag ang tanan nga mga kadutaan sang mga Hethanon, tubtob sa Daku nga Dagat sa nakatundan.
5 Wala sing may makadaog sa imo samtang nagakabuhi pa ikaw. Magaupod ako sa imo subong sang akon pag-upod kay Moises, kag indi ko gid ikaw pagpabay-an.
6 Magpakalig-on ka kag magpakaisog, kay ikaw ang magapangulo sa sini nga mga tawo sa pagpanag-iya sining duta nga ginsaad ko nga ihatag sa ila mga ginikanan.
7 Pero magpakalig-on ka kag magpakaisog, kag magkabuhi ka suno sa bug-osa nga Kasugoan nga ginhatag sa imo sang akon alagad nga si Moises. Indi mo pagpatumbayaan ang bisan ano nga bahin sini, kag manginmadinalag-on ka bisan diin ka magkadto.
8 Indi mo gid pagkalimtan ang libro sang Kasugoan. Tun-i ini sa adlaw kag sa gab-i, kag magkabuhi ka suno sa tanan nga nasulat sa sini nga kasugoan. Dayon magama-inuswagon ka kag magamadinalag-on.
9 Dumdoma ang akon sugo, 'Magpakalig-on ka kag magpakaisog! Indi ka magkahadlok ukon magpakaluya, kay Ako, ang GINOO nga imo Dios, maga-upod sa imo bisan diin ikaw makadto.'"
10 Dayon si Josue nagmando sa mga pangulo sang mga tawo,
11 "Kadto kamo sa kampamento kag singgana ninyo ang mga tawo, 'Himusa ang inyo mga pagkabutang, kay sa sulod sang tatlo ka adlaw, magatabok kamo sa Suba sang Jordan sa pagpanag-iya sang duta nga ginahatag sang GINOO sa inyo.'"
12 Si Josue nagsiling sa mga tribo ni Ruben kag ni Gad, kag sa katunga sang tribo ni Manases,
13 "Dumdoma ninyo ang ginsiling sa inyo ni Moises nga alagad sang GINOO, 'Ang GINOO nga inyo Dios magahatag sini nga duta nga inyo pagapuy-an.'
14 Ang inyo mga asawa, mga kabataan, kag mga kasapatan magapabilin sa duta nga ginhatag sa inyo ni Moises diri sa sidlangan nga bahin sang Jordan, pero ang inyo mga hangaway magauna sa inyo mga kautoran nga mga Israelinhon sa pagtabok, nga handa sa pagbulig sa ila sa inaway.
15 Kon maangkon na nila ang duta nag ginhatag sa ila sang inyo Dios kag makapuyo na sila sa amo nga duta, dayon magabalik kamo kag magapuyo sa inyo kaugalingon nga duta nga ginhatag sa inyo ni Moises nga alagad sang GINOO, diri sa sidlangan nga bahin sang Jordan."
16 Nagsabat sila kay Josue, "Himuon namon ang tanan nga imo ginsiling sa amon, kag magakadto kami bisan diin mo ipadala.
17 Tumanon namon ikaw subong sang amon pagtuman kay Moises, kon ang GINOO nga imo Dios mag-upod lamang sa imo subong sang iya pag-upod kay Moises.
18 Ang bisan sin-o nga magsuay ukon indi magtuman sang bisan ano nga imo ginmando, pagapatyon. Magpakalig-on kag magpakaisog ka lang!"
No comments:
Post a Comment