Esdras 1

1  2  3  4  5  6  7  8  9  10

☆☆☆

Si Haring Ciro Nagmando nga ang mga Judio Magbalik

1 Sa nahauna nga tuig nga si Ciro amo ang emperador sang Persia, ginbuot sang GINOO nga maghimo sia sang isa ka mando kag isulat ini agod nga basahon sing mabaskog bisan diin sa iya ginharian. Nahimo ini sa pagtuman sang ginsiling sang GINOO paagi kay Jeremias nga propeta.

2  "Amo ini ang mando ni Ciro nga emperador sang Persia. Ang GINOO, ang Dios sang Langit, naghimo sa akon nga pangulo sa bug-os nga kalibutan kag naghatag sa akon sing katungdanan sa pagpatindog sing templo para sa iya sa Jerusalem sa Juda.

3 Kabay ang Dios manginkaupod ninyo tanan nga iya mga tawo. Magkadto kamo sa Jerusalem sa pagpatindog liwat sang Templo sang GINOO, ang Dios sang Israel, ang Dios nga ginasimba sa Jerusalem.

4 Ang bisan sin-o sang iya mga tawo sa kabihagan nga nagakinahanglan sing bulig sa pagpauli, ang ila mga kaingod magahatag sa ila sining bulig. Maghatag sila sing pilak kag bulawan, mga pagkabutang kag mga kasapatan, kag subong man sang mga halad nga idulot sa Templo sang Dios sa Jerusalem."

5 Dayon ang mga pangulo sang mga kabaranggayan sang mga tribo ni Juda kag ni Benjamin, ang mga pari kag mga Levita, kag ang tagsatagsa nga ang ila tagipusoon gintandog sang GINOO, naghanda sa paglakat kag pagpatindog liwat sang Templo sa Jerusalem.

6 Ang tanan nila nga mga kaingod nagbulig sa ila paagi sa paghatag sing madamo nga mga butang: mga gamit nga pilak, bulawan, mga pagkabutang, mga kasapatan, mga butang nga malahalon, kag mga halad nga idulot sa Templo.

7 Si Ciro nga emperador naghatag sa ila sang mga yahong kag mga kupa nga ginkuha ni Haring Nabucodonosor sa Jerusalem kag ginbutang sa templo sang iya nga mga dios.

8 Ginhatag niya ini kay Mitridates, ang tulugyanan sang manggad sang hari, kag gin-isip ini para kay Sesbasar, ang gobernador sang Juda,

9-10 nga amo ang masunod:

mga yahong nga bulawan para sa mga halad – 30

mga yahong nga pilak para sa mga halad - 1,000

iban nga mga yahong – 29

magamay nga mga yahong nga bulawan – 30

magamay nga mga yahong nga pilak – 410

iban nga mga galamiton - 1,000

11 Tanan tanan, may 5,400 ka bulawan kag pilak nga mga yahong kag iban nga mga butang nga ginadala ni Sesbasar sang sia kag ang iban nga mga bihag nagkadto sa Jerusalem halin sa Babilonia.

2 Mga Cronica 36 | Esdras 2