Panalabiton 1

1  2  3  4  5

☆☆☆

Ang mga Kalisod sang Jerusalem

1 Daw ano kamingaw sang Jerusalem, nga sang una puno sang mga tawo! Sang una ginapadunggan sang kalibutan, karon kaangay na sia sang isa ka balo nga babayi; ang labing bantog sa mga siyudad nahulog sa pagkaulipon.
2 Sa bug-os nga gab-i nagahibi sia; ang mga luha nagailig sa iya guya. Sa tanan nga naghigugma sa iya sang una wala sing isa nga nabilin sa paglipay sa iya, kag ang tanan batok na sa iya.

Sa bug-os nga gab-i nagahibi sia. (1:2)

3 Ang mga tawo sang Juda mga ulipon nga wala sing mahimo, gintabog palayo sa ila mga puloy-an. Nagpuyo sila sa iban nga mga duta, nga wala sing duog nga ila kaugalingon, nalibutan sang mga kaaway, nga wala sila palagyohan.
4 Karon wala sing isa nga nagakadto sa Templo kon balaan nga mga adlaw sa pagsimba. Ang mga bata nga babayi nga nagakanta didto nagaantos, kag ang mga pari nagaugayong. Ang mga puwerta sang siyudad wala sing tawo, kag ang Sion nagaugayong.
5 Ang iya mga kaaway nagmadinalag-on; ginagamhan niya sila. Ang GINOO nagpaantos sa iya, tungod sang tanan niya nga mga kasal-anan; bisan iya ang mga kabataan gindakop kag gindala palayo.
6 Ang pagkahalangdon sang Jerusalem nagligad na. Ang iya mga pangulo kaangay sang usa nga nagapalagyo sa mga mangangayam, nga indi makapahuway kag makakaon, kag daw wala na sila sing kusog.
7 Karon ang Jerusalem guba kag mamingaw, nadumdoman niya ang iya anay pagkahalangdon. Sang mahulog sia sa iya kaaway, wala sing isa nga nagbulig sa iya; ang iya mga kaaway nagkadlaw sa iya pagkapukan.
8 Ang iya kadungganan wala na; hublas sia kag ginpasipalahan. Nagaugayong sia, kag nagatabon sang iya guya sa kahuya. Ang Jerusalem naghigko sang iya kaugalingon sang madamo nga mga sala.
9 Ang iya pagkadimatinlo mahapos makit-an pero wala sia sing kabalaka sa iya madangatan. Tama gid ang iya pagkapukan; wala sing may makalipay sa iya. Nagdaog ang iya mga kaaway kag nagpangamuyo sia sa GINOO agod kaluoyan.
10 Ang mga kaaway nagkuha sang tanan niya nga mga manggad. Nakita niya sila nga nagsulod sa Templo sa diin ang GINOO nagdumili sa mga Gentil sa pagsulod.
11 Ang iya mga tawo nag-ugayong samtang nagapangita sila sang kalan-on; ginbaylo nila ang ang ila mga manggad sing pagkaon agod mabuhi sila. Ang siyudad nagsinggit, “Tan-awa ako, O GINOO, sa akon kalisdanan.”
12 Nagsinggit sia sa tagsatagsa nga nagaagi, “Tan-awa ako! Wala sing may kasakit kaangay sang akon kasakit. Ang kasakit nga ginhatag sang GINOO sa tion sang iya kaakig.
13 “Nagpadala sia sang kalayo gikan sa langit, kalayo nga nagdabdab sa sulod nakon. Nagbutang sia sang siod para sa akon kag nagdala sa akon sa duta; ginpatumbayaan niya ako, kag ginbayaan nga nagaantus sa wala sing langan.
14 Ginaisip niya ang tanan ko nga mga sala kag ginbugkos niya ini sing tingob; ginpakabit niya ini sa akon liog kag nagluya ako sa iya kabug-at. Gintugyan ako sang
 sa akon mga kaaway, kag wala ako sing mahimo batok sa ila.
15 “Ginkadlawan sang Ginoo ang akon gamhanan nga mga soldado. Ginpadala niya ang mga hangaway sa pagsalakay sa akon kag sa paglaglag sang akon pamatan-on nga mga lalaki. Ginligis niya ang akon pinakamaayo nga mga tawo kaangay sang mga ubas sa pulogaan sang ubas.
16 “Tungod sini ang akon mata napun-an sang mga luha. Wala sing makalipay sa akon; wala sing makahatag sa akon sing kaisog. Ang mga kaaway nagdaog sa amon; ang akon mga tawo wala sing nabilin.
17 “Ginbayaw ko ang akon kamot, pero wala sing isa nga magabulig sa akon ang GINOO nagtawag sang akon mga kaaway batok sa akon sa tanan ko nga palibot; ginkabig nila ako subong sang isa ka mahigko nga butang.
18 “Pero ang GINOO matarong, kay wala ako magtuman sa iya. Pamati kamo sa akon, tanan nga mga katawohan, tan-awa ako sa akon kasakit ang akon pamatan-on nga mga lalaki kag mga babayi gindala subong mga bihag.
19 “Nagpanawag ako sa akon mga kabulig pero indi sia magbulig sa akon ang mga pari kag ang mga pangulo napatay sa mga kalye sang siyudad nga nagapangita sang pagkaon agod indi sila mapatay.
20 “Tan-awa, O GINOO ang akon pag-antos, ang pag-antos sang akon kalag! Ang akon tagipusoon nabuka sa kalisud tungod sa akon mga sala. May pagpamatay sa mga kalye, kag sa sulod sang balay may kamatayon.
21 “Pamati sa akon mga pag-ugayong; wala sing isa nga magalipay sa akon. Ang akon mga kaaway nagkasadya nga nagdala ikaw sa akon sing kalalat-an. Paabuta ang adlaw nga imo ginsaad; paantusa ang akon mga kaaway subong sa akon.
22 “Hukmi sila sang tanan nila nga mga kalautan; siluti sila subong sang imo pagsilot sa akon sang akon mga sala. Nag-ugayong ako sa akon kalisdanan, kag ang akon tagipusoon daw napunaw.

Jeremias 52 | Panalabiton 2