Joel 1

1  2  3

☆☆☆

Ang Pagpangasubo Tungod sang Pagkapiyerde sang mga Tanom

1 Amo ini ang ginsiling sang GINOO kay Joel, ang anak nga lalaki ni Petuel:
2 magpamati, kamo nga mga gulang na, kag subong man ang tanan nga mga pumoluyo sa Juda, magpamati. May nahanabo bala nga kaangay sini sa inyo panahon, ukon sa panahon sang inyo mga ginikanan?
3 Sugiri ang inyo mga kaanakan nahanungod sini, kag ila sugiran ang ila mga kaanakan, kag ini sila magasugid sini sa madason nga kaliwatan.
4 Ang iban nga mga tanom ginkaon sang dalagku nga mga apan. Dayon ang nagadulom nga mga lukso nag-urot gid sang nabilin nga mga tanom.
5 Pagbulogtaw kamo kag maghibi, kamo nga mga palahubog. Magtangis kamo, kamo nga mga palainom sang bino, kay ang mga ubas nga hilimuon nga bag-o nga bino nagkalapiyerde.
6 Isa ka panong sang mga apan nagsalakay sang aton duta, gamhanan sila kag indi maisipan, ang ila mga ngipon matalom kaangay sang mga ngipon sang leon.
7 Ginpamiyerde nila ang aton mga balagon sang ubas, kag ginpangkitkit nila ang aton mga kahoy nga higera. Ginkaon nila ang tanan nga mga panit sini, sa bagay nga nagputi ang mga sanga.
8 Magtangis, kamo nga mga tawo, subong sang isa ka dalaga nga nagapangalisod tungod sang pagkapatay sang iya palamanahon.
9 Wala na sing trigo ukon bino nga ihalad sa Templo, ang mga pari nga nagahalad sing mga dulot sa GINOO nagapangasubo.
10 Ang mga talamnan wala sing tanom, ang duta nagapangasubo: kay nalaglag ang mga trigo, nalaya ang mga ubas, kag nalayong ang mga kahoy nga olibo.

Ang duta nagapangasubo. (1:10)

11 Magkasubo, kamo nga mga mangungoma, magtangis, kamo nga nagatatap sang talamnan sang ubas, kay ang trigo, kag ang sebada, kag ang tanan nga mga patubas nagkalapiyerdi.
12 Nalaya ang mga balagon sang ubas, kag nalayong ang mga kahoy nga higera. Ang mga kahoy nga granada, mga palma, kag mga mansanas—ang tanan nga mga kahoy nalaya. Subong man nadulaan sing kalipay ang mga tawo.
13 Kamo nga mga pari nga nagadulot sing mga halad sa altar sang GINOO, magsuksok kamo sing mga bayu sa paglalaw kag maghibi, sulod kamo sa Templo kag magpabilin didto tubtob sa aga sa inyo mga bayu sa paglalaw. Wala sing trigo ukon bino nga ihalad sa balay sang inyo Dios.
14 Magmando kamo nga magpuasa, tawga ang katilingban sa pagsimba, tipuna ang mga pangulo kag ang tanan nga mga tawo sa Juda sa Templo sang GINOO nga inyo Dios, kag magpanawag kamo sa iya.
15 Madali na lang ang adlaw sang GINOO, magadala ini sang kalaglagan gikan sa Labing Makagagahom. Daw ano ka makakulogmat ina nga adlaw!
16 Nakita gid naton ang pagkapiyerde sang aton mga patubas. Wala sing kalipay sa Templo sang aton Dios.
17 Ang mga binhi nagkalamatay sa kigas nga duta. Wala sing patubas nga ibutang sa tambubo,  gani nagkalaguba ang mga tambubo nga wala sing unod.
18 Daw ano kagahod sang gutom nga mga karnero kag mga baka! Nagadalangdalang ang mga manara sang mga baka, kay wala sing halalban para sa ila. Nagaantos man ang panong sang mga karnero.
19 Nagapanawag ako sa imo, O GINOO, kay nagkalaya ang kahilamunan kag ang mga kakahuyan, nga daw ginsunog sang kalayo.
20 Bisan ang talunon nga mga sapat nagapanawag sa imo, kay namalhan ang mga sapa, kag nagkalaya ang mga kahilamunan nga daw gin-agyan sang kalayo.

Oseas 14 | Joel 2