“Manunodlo, Handa Ako sa Pagsunod sa Imo bisan Diin Ka Makadto”

Liturhiya sang Pulong

(Lunes, Hulyo 2, 2018)

Ang Pagbasa gikan sa Libro ni:

Propeta Amos 2:6-10, 13-16

Ang Ginoo nagasiling, “Ang mga pumoluyo sang Israel nagpakasala sa liwat kag sa liwat. Sa pagkamatuod silutan ko gid sila, kay ginabaligya nila ang wala sala nga mga tawo nga wala makabayad sang ila mga utang, kag ginabaligya nila nga mangin-ulipon ang mga imol nga indi gani makabayad sang bili sang isa ka pares nga sandalyas. Ginatapak nila ang mga maluya kag makalulooy kag ginadaugdaog ang mga imol. Ang pamatan-on kag tigulang nga mga lalaki nagapakighilawas sa malain nga mga babayi sa templo, gani ginapasipalahan nila ang akon balaan nga ngalan. Sa tanan nga mga duog nga ila ginasimbahan nagahigda sila sa mga bayu nga ginprenda sa ila. Sa templo sang ila Dios nagainom sila sing bino nga ila ginkuha sa mga nakautang sa ila sing kuwarta. Pero bisan pa sini, ginpamatay ko tungod sa ila ang mga Amornon, mga tawo nga subong kataas sang kahoy nga sedro kag subong kabakod sang mul-awon. Ginlaglag ko sila sing bug-os. “Kamo nga akon mga tawo, ginpagwa ko sa Egipto, gintuytoyan sa desierto sa sulod sang 40 ka tuig, kag ginhatag ko ang duta sang mga Amornon nga mangin-inyo. Karon ipiton ko kamo bisan diin kamo, subong sang pag-ipit sang karo nga puno sing patubas. Bisan ang madasig magdalagan indi makapalagyo, ang makusog magaluya, kag ang mga soldado indi makaluwas sang ila kaugalingon nga kabuhi. Ang mga manugpana indi makabato, ang madasig magdalagan indi maluwas, kag ang mga tawo nga nagasakay sa kabayo indi makapalagyo sa pagluwas sang ila kabuhi. Bisan ang pinakamaisog nga soldado magapalagyo nga hublas sa sina nga adlaw.” Ang Ginoo naghambal sini.

Salmo sa Pagsabat:

Mga Salmo 50:16-17, 18-19, 20-21, 22-23

Pero nagasiling ang Dios sa malaut, “Ngaa bala ginapabutyag mo ang akon mga sugo? Ngaa bala nagahambal ka nahanungod sang akon kasugtanan? Indi ka magpatudlo sa akon, ginasikway mo ang akon mga sugo. Kon makita mo ang isa ka makawat, nagapakig-abyan ka sa iya, kag nagapakig-upod ka sa mga nagapanginbabayi kag nagapanginlalaki. “Handa ka sa tanan nga tion sa paghambal sing malain, maabtik ka magbinutig. Handa ka sa pagsumbong bisan pa sang imo mga utod, kag imo sila ginapangitaan sing sala. Ini tanan ginhimo mo, kag naghipos lang ako, gani nagpanghunahona ka nga kaangay ako sa imo. Pero karon sabdungon ko ikaw, kag ipaathag ini nga butang sa imo. “Pamatii ini, ikaw nga wala nagasapak sa akon, kay kon indi, laglagon ko ikaw; kag wala sing may makaluwas sa imo. Ang mga pagpasalamat amo ang halad nga nagapadungog sa akon, kag luwason ko gid ang tanan nga nagatuman sa akon.”

Aleluya:

Mga Salmo 95:8

Indi kamo magpakatig-a subong sang inyo mga katigulangan didto sa Meriba, subong sang didto sila sa desierto sa Masa.

Ang Pagbasa sang Santos nga Ebanghelyo suno kay:

San Mateo 8:18-22

Sang matalupangdan ni Jesus ang madamo nga mga tawo sa iya palibot, nagsugo sia sa iya mga gintuton-an sa pagtabok sa pihak sang linaw. May isa ka manunodlo sang Kasugoan nga nagpalapit sa iya didto nga nagasiling, “Manunodlo, handa ako sa pagsunod sa imo bisan diin ka makadto.” Si Jesus nagsabat sa iya, “Ang mga singgalong may mga buho, kag ang mga pispis may mga pugad, pero ang Anak sang Tawo wala gid sing hiligdaan kag palahuwayan.” Ang isa pa gid nga iya gintuton-an nagsiling, “Ginoo, mapauli anay ako sa paglubong sang akon amay.” Pero si Jesus nagsabat, “Sunod ka sa akon kag pabay-i ang mga patay sa paglubong sang ila mga patay.” 

Hulyo 1 | Hulyo 3