"Indi mga Halad nga Sapat ang Luyag ko kundi ang Pagkaluoy"

Liturhiya sang Pulong

(Biyernes, Hulyo 20, 2018)

Ang Pagbasa gikan sa Libro ni:

Propeta Isaias 38:1-6, 21-22, 7-8

Sa sadto man nga tion, si Haring Ezequias nagmasakit kag diutayan lang mapatay. Ang propeta nga si Isaias nga anak ni Amoz nagduaw sa iya kag ginsingganan sia, “Ang GINOO nagasiling nga ipahamtang mo sing nagakaigo ang tanan nga mga butang kay indi na ikaw mag-ayo. Maghanda ka kay ikaw mapatay.” Si Ezequias nag-atubang sa dingding kag nagpangamuyo: “Dumdoma, O Ginoo, nga nag-alagad ako sa imo sing matutom kag mainunongon, kag nagtinguha gid ako sa paghimo sang imo luyag nga himuon ko.” Kag nagsugod sia sa paghibi sing tudo gid. Dayon ang GINOO nagsugo kay Isaias sa pagbalik kay Ezequias kag singganon sia, “Ako, ang GINOONG Dios sang inyo amay nga si David, nakabati sang imo pangamuyo kag nakakita sang imo mga luha; palawigon ko sing 15 pa ka tuig ang imo kabuhi. Luwason ko ikaw kag ini nga siyudad sang Jerusalem gikan sa hari sang Asiria, kag padayunon ko ang pag-apin sa siyudad. Si Isaias nagsiling sa hari nga hampulan niya ang iya hubag sang panit sang higos, agod nga mag-ayo sia. Dayon si Haring Ezequias nagpamangkot, “Ano bala ang tanda sa pagpamatuod nga sarang na ako makakadto sa Templo?” Si Isaias nagsabat, “Ang Ginoo magahatag sa imo sang isa ka tanda sa pagpamatuod nga tumanon niya ang iya saad. Sa orasan nga ginpatindog ni Haring Acaz, ang Ginoo magapabalik sang landong sing napulo ka gutlo.” Kag ang landong nagbalik sa orasan sing napulo ka gutlo.

Kalantahon sa Pagsabat:

Propeta Isaias 38:10, 11, 12, 16

Naghunahona ako nga samtang nagahingurosgan pa ako magakadto ako sa kalibutan sang mga patay nga indi na maglawig ang akon kabuhi. Naghunahona ako nga sa sining kalibutan sang mga buhi indi ko makita liwat ang GINOO, ukon ang bisan sin-o nga buhi. Ang akon kabuhi gin-utod kag natapos, kaangay sang tolda nga ginguba, kaangay sang panapton nga gin-utod sa iya tiral. Naghunahona ako nga ang Dios nagatapos na sang akon kabuhi. O Ginoo, magakabuhi ako tungod sa imo tungod sa imo lamang; ayuha ako, kag tugoti nga magkabuhi.

Aleluya:

Juan 10:27

Ang akon mga karnero nagapamati sa akon tingog, siling sang Ginoo; kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Mateo 12:1-8

Isa sadto ka tion sa Adlaw nga Inugpahuway, si Jesus nag-agi sa tunga sang kaumhan sang trigo. Ginutom ang iya mga gintuton-an, gani nagpangutol sila sang mga uhay kag ginkaon. Sang makita ini sang mga Fariseo nagsiling sila kay Jesus, “Tan-awa bala, ang ginhimo sang imo mga gintuton-an batok sa Kasugoan sa Adlaw nga Inugpahuway!” Si Jesus nagsabat, “Wala gid bala ninyo mabasahi ang ginhimo ni David sang sia kag ang iya mga kaupdanan ginutom? Nagsulod sia sa balay sang Dios, kag ginkaon niya upod sang iya mga tinawo ang tinapay nga nahalad sa Dios, bisan pa batok sa Kasugoan para sa ila ang pagkaon sadto nga tinapay. Kay yadto nga tinapay para lamang sa mga pari. Kag wala man bala ninyo mabasahi sa Kasugoan ni Moises nga sa Adlaw nga Inugpahuway, ang mga pari sa templo nagalapas sang Kasugoan sa tagsa ka Adlaw nga Inugpahuway, pero wala man sila makasala? Nagasiling ako sa inyo, may yari diri nga daku pa sa templo. Kon inyo lamang nahibaluan kon ano ang kahulogan sini nga kasulatan, ‘Indi mga halad nga sapat ang luyag ko, kundi ang pagkaluoy,’ wala ninyo kuntani paghukmi ang mga wala sing sala. Kay ang Anak sang Tawo amo ang Ginoo sang Adlaw nga Inugpahuway.”

Hulyo 19 | Hulyo 21