Zacarias 1

1  2  3  4  5  6  7  8  9  10  11  12  13  14

☆☆☆

Gintawag sang Ginoo ang Iya mga Tawo sa Pagbalik sa Iya

1 Ang GINOO naghatag sini nga mensahi kay Zacarias nga propeta sa ikawalo nga bulan sang ikaduha nga tuig nga si Dario amo ang Emperador sang Persia. (Si Zacarias amo ang anak ni Berequias kag apo ni Iddo.)
2 Ang GINOO nga Makagagahom nagsiling kay Zacarias nga singganon ang mga tawo, “Ako, ang Ginoo, naakig gid sa inyo mga katigulangan.
3 Pero karon nagasiling ako sa inyo, ‘Balik kamo sa akon, kag ako magabalik sa inyo.
4 Indi kamo magpareho sang inyo mga katigulangan. Ang mga propeta sang una naghatag sa ila sang akon pulong, nga nagasiling sa ila nga indi na magkabuhi sing malaut ukon makasasala nga kabuhi. Pero indi sila magpamati ukon magtuman sa akon.
5 Ang inyo mga katigulangan kag yadto nga mga propeta patay na.
6 Paagi sa akon mga alagad nga propeta ginhatagan ko ang inyo mga katigulangan sing mga sugo kag mga paandam. Ginpatumbayaan nila ini kag nag-antos sila. Dayon naghinulsol sila kag nagkilala nga ako, ang GINOO nga Makagagahom, nagsilot sa ila suno sa ila pagginawi, kag suno sa akon ginpat-od nga himuon.’”

Ang Palanan-awon sang Propeta nahanungod sang mga Kabayo

7 Sa ikaduha nga tuig nga si Dario amo ang emperador, sa ika-24 nga adlaw sang ika-11 nga bulan nga amo ang bulan sang Sebat, ang Ginoo naghatag sa akon sing isa ka mensahi paagi sa isa ka palanan-awon sa kagab-ihon.
8 Nakita ko ang isa ka anghel sang Ginoo nga nagasakay sa isa ka pula nga kabayo. Nagdulog sia sa mga kahoy nga mirto sa kapatagan, kag sa likod niya may iban pa nga mga kabayo nga pula, puti kag kambang.
9 Ginpamangkot ko sia, “Sir, ano ang kahulogan sini nga mga kabayo?” Nagsabat sia, “Ipakita ko sa imo ang kahulogan sini.
10 Ang Ginoo nagpadala sini nga mga manugkabayo sa pag-usisa sang duta.”
11 Nagpanugid sila sa anghel, “Nagkadto kami sa bug-os nga kalibutan, kag nakita namon nga makalulooy ini kag nalutos.”
12 Dayon ang anghel nagsiling, “GINOO nga Makagagahom, nagkaakig ikaw sa Jerusalem kag sa mga siyudad sang Juda sa sulod sang 70 ka tuig na karon. San-o mo pa bala sila kaluoyan?”
13 Ang GINOO nagsabat sa anghel sang mga pulong nga makalilipay,
14 kag ang anghel nagsiling sa akon nga ibantala ko ining ginsiling sang GINOO nga Makagagahom, “May daku ako nga gugma kag kabalaka sa Jerusalem, ang akon balaan nga siyudad,
15 kag naakig gid ako sa mga pungsod nga may kalinong kag paghidait. Sang ginpunggan ko ang akon kaakig batok sa sini nga mga tawo, ini nga mga kapungsoran nagdugang sang pag-antos sang akon mga tawo.
16 Gani, nagbalik ako sa Jerusalem sa pagkaluoy sa siyudad. Ang akon Templo kag ang siyudad pagapatindugon liwat.
17 Ang anghel nagsiling man sa akon sa pagbantala sini, “Ang GINOO nga Makagagahom nagasiling nga ang iya mga siyudad magamainuswagon liwat, kag sa liwat iya lipayon ang Jerusalem, kag angkunon ang siyudad nga iya kaugalingon.”

Ang Palanan-awon nahanungod sang mga Sungay

18 Sa isa ka palanan-awon nakita ko ang apat ka mga sungay sang baka.
19 Ginpamangkot ko ang anghel kon ano ang kahulogan sini. Nagsabat sia, “Amo ini ang gamhanan nga mga pungsod sang kalibutan nga nagpaalaplaag sang mga tawo sang Juda, Israel, kag Jerusalem.”
20 Dayon ang GINOO nagpakita sa akon sang apat ka mga panday nga may mga martilyo.
21 Nagpamangkot ako, “Ano ang tuyo sini nga mga tawo sa ila pagkari?” Nagsabat sia, “Nagkari sila sa pagpahog kag sa pagdaog sang mga pungsod nga naglutos kag nagpaalaplaag sang mga tawo sang Juda.”

Hageo 2 | Zacarias 2