☆☆☆
ANG MGA INAGIHAN NI DANIEL KAG SANG IYA MGA ABYAN
(1:1-6:28)
Ang mga Pamatan-on nga Israelinhon sa Palasyo ni Nabucodonosor
1 Sa ikatlo nga tuig sang paghari ni Joiaquim sa Juda, si Nabucodonosor nga hari sang Babilonia naggubat sang Jerusalem kag nagkibon sang siyudad.2 Gintugyan sang Ginoo kay Nabucodonosor si Haring Joiaquim, kag ang iban nga mga manggad sang templo ginpanguha ni Nabucodonosor. Gindala niya sa templo sang iya mga dios sa Babilonia ang iya mga bihag, kag ginbutang niya sa talaguan sang manggad sang templo ang iya napang-agaw nga mga manggad.
3 Ang hari nagmando kay Aspenaz, ang pangulo nga opisyal, sa pagpili gikan sa mga bihag nga Israelinhon sang pila ka pamatan-on nga lalaki nga nagikan sa harianon kag dungganon nga mga panimalay.
4 Kinahanglan ini sila mga guwapo, maalam, nahanas sing maayo, maabtik sing ulo kag wala sing depekto sa lawas, agod nga manginbagay sila sa pag-alagad sa palasyo sang hari. Si Aspenaz amo ang magatudlo sa ila sa pagbasa kag pagsulat sang linggwahe sang mga taga-Babilonia.
5 Ang hari nagmando man nga kada adlaw pagahatagan sila sang pagkaon kag bino nga pareho sang ginahatag sa mga katapo sang palasyo sang hari. Sa tapos ang tatlo ka tuig nga paghanas pagadalhon sila sa atubangan sang hari.
6 Sa mga ginpili nalakip sanday Daniel, Hananias, Misael, kag Azarias nga lunsay taga-Judea.
7 Ang pangulo nga opisyal naghatag sa ila sing bag-o nga mga ngalan nga amo ang masunod: Beltesasar, Sadrac, Mesac kag Abednego.
8 Si Daniel nagtapat nga indi gid sia magpadagta sang iya kaugalingon paagi sa kalan-on kag bino sang hari. Ginpangabay niya si Aspenaz, ang pangulo nga opisyal, sa pagbulig sa iya,
9 kag ginbuot sang Dios nga si Aspenaz nagmaayo kay Daniel.
10 Pero si Aspenaz nahadlok sa hari, gani ginsingganan niya si Daniel, “Ang hari nagpamat-od kon ano ang inyo pagakaunon kag pagaimnon, kag kon indi kamo magpareho kaayo sing lawas sa iban nga mga pamatan-on, basi ipapatay niya ako.”
11 Gani si Daniel nagkadto sa gwardya nga ginbutang ni Aspenaz nga magatatap sa iya kag sa tatlo niya ka kaupdanan kag nagsiling,
12 “Abi, tilawi kami sa sulod sang napulo ka adlaw nga pakan-on lang sing utan kag paimnon sing tubig.
13 Dayon ipaanggid kami sa mga pamatan-on nga nagakaon sang kalan-on sang hari kag tan-awon mo kon sin-o ang maayo sa amon, kag ikaw na ang mahibalo kon ano ang imo himuon sa amon.”
14 Nagsugot sia nga tilawan sila sa sulod sang napulo ka adlaw.
15 Sang matapos ang napulo ka adlaw labing maayo pa ang ila lawas kag mabakod sila sang sa tanan nga nagkaon sang kalan-on sang hari.
16 Gani halin sadto ginpadayon sang gwardya ang pagpakaon sa ila sang utan sa baylo sang kalan-on sang hari.
17 Ang Dios naghatag sa apat ka pamatan-on sing ihibalo kag kaalam sa mga balasahon kag pilosopiya. Wala labot sini ginhatagan niya si Daniel sing kaalam sa pagsaysay sang mga palanan-awon kag mga damgo.
18 Sa tapos ang tatlo ka tuig nga ginpat-od sang hari, gindala ni Aspenaz ang tanan nga mga pamatan-on nga lalaki kay Nabucodonosor.
19 Ang hari nagpakighambal sa ila tanan, kay iya nakita nga sanday Daniel, Hananias, Misael, kag Azarias labing maayo pa sa ila tanan. Gani nanginkatapo sila sang mga nagaalagad sa hari.
20 Karon bisan ano ang ipamangkot sang hari, ukon bisan ano nga palaligban ang iya ipahayag, iya nasapwan nga ining apat ka pamatan-on maalam pa sing napulo ka pilo sang sa mga manughimalad ukon madyikero sa bug-os niya nga ginharian.
21 Si Daniel nagpadayon sa pag-alagad sa palasyo sang hari tubtob si Ciro nga hari sang Persia nag-agaw sang Babilonia.
No comments:
Post a Comment