Natingala gid si Jesus tungod kay Wala Sila sing Pagtuo

Liturhiya sang Pulong

(Domingo, Hulyo 8, 2018)

1. Ang Pagbasa gikan sa Libro ni:

Propeta Ezequiel 2:2-5

Samtang nagahambal sia, ang espiritu sang Dios nagsulod sa akon, kag nagpatindog sa akon, kag nabatian ko ang tingog nga nagpadayon sa pagsiling, “Tawo nga mamalatyon, ipadala ko ikaw sa mga tawo sang Israel, nga nagbato kag nagsumpong sa akon. Sa gihapon mabinatuon sila subong man sang ila mga katigulangan. Mga matig-a sila sing ulo kag wala sila nagatahod sa akon. Ipadala ko ikaw sa pagsugid sa ila kon ano ang ginasiling ko, ang Ginoo nga Gamhanan. Magpamati sila sa imo ukon indi, basta mahibaluan lang nila nga may isa ka propeta nga nagkadto sa ila. 

Salmo sa Pagsabat:

Mga Salmo 123:1-2, 2, 3-4

O GINOO, nagatangla ako sa imo, sa langit, sa diin ikaw nagagahom. Subong nga ang suloguon nagasalig sa iya amo, kag ang suloguon nga babayi sa iya ama, subong man nagapadayon kami sa pagsalig sa imo, O GINOO nga amon Dios, tubtob nga kaluoyan mo kami. Kaluoyi kami, O GINOO, kaluoyi kami; kay tama gid ang pagtamay sa amon. Dugay na ang pagyaguta sa amon sang mga manggaranon, kag ang pag-uligyat sang bugalon nga mga manugpigos!

2. Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 12:7-10

Pero agod indi ako magpabugal sing sobra tungod sang makatilingala nga mga butang nga akon nakita, ginhatagan ako sing masakit nga balatian, nga amo ang paagi ni Satanas sa pagsakit sa akon agod indi ako magpabugal. Katatlo gid ako magpangamuyo sa Ginoo nga kuhaon niya ini. Pero nagsabat sia, “Ang akon grasya amo ang kinahanglan mo, kay ang akon gahom mabatyagan mo sing labi kon ikaw maluya.” Gani labi ako ka malipayon sa pagpabugal sang bisan ano nga kaluyahon, agod nga akon mabatyagan ang gahom ni Cristo nga yari sa akon. Gani nagakalipay ako sa mga kaluyahon, sa mga pasipala, sa mga kabudlayan, sa mga paghingabot, sa mga kapiutan tungod kay Cristo. Kay kon maluya ako, ti mabakod ako. 

Aleluya:

Lucas 4:18

Ang Espiritu sang Ginoo yari sa akon, kay ginpadala niya ako sa paghilway sang mga ginapigos.

Ang Pagbasa sang Santos nga Ebanghelyo suno kay:

San Marcos 6:1-6

Naghalin si Jesus sa sadto nga duog upod sa iya mga gintuton-an kag nagkadto sa iya banwa. Sang Adlaw nga Inugpahuway nagpanudlo sia sa sinagoga. May madamo nga mga tawo didto, kag sang pagkabati nila sa iya natingala gid sila kag nagpamangkot, “Diin bala niya kinuha ini tanan? Ano bala ini nga kaalam ang ginhatag sa iya? Paano ang paghimo niya sining mga milagro? Indi bala ini sia ang panday nga anak ni Maria kag utod nanday Santiago, Jose, Judas kag Simon? Indi bala nga ang iya mga utod nga babayi tagadiri?” Gani nahisa sila sa iya. Si Jesus nagsiling sa ila, “Ang isa ka propeta ginatahod bisan diin luas lang sa iya kaugalingon nga banwa kag sa iya mga himata kag panimalay.” Wala sia didto makahimo sang mga milagro luas lang sa pag-ayo sang pila ka mga masakiton paagi sa pagtandog sa ila. Natingala gid sia tungod kay wala sila sing pagtuo. 

Hulyo 7 | Hulyo 9