"Indi Halad nga mga Sapat ang Akon Ginapangita - ang Pagkamaluloy-on"

Liturhiya sang Pulong

(Biyernes, Hulyo 6, 2018)

Ang Pagbasa gikan sa Libro ni:

Propeta Amos 8:4-6, 9-12

Pamatii ninyo ini, kamo nga nagatapak sang mga nawad-an, kag buot magpapas sang mga imol sa duta. Nagasiling kamo sa inyo kaugalingon, “San-o pa matapos ang  balaan nga mga adlaw, agod makapadalawat kita sang aton trigo. San-o pa matapos ang Adlaw nga Inugpahuway, agod mapadalawat naton ang aton trigo? Dayon mapasobrahan naton ang bili, gamitan naton sing indi husto nga sulokban, kag liwaton naton ang kiluhan sa pagdaya sa mga nagabakal. Kag sa bili sang isa ka pares nga sandalyas baklon naton ang imol nga mangin-ulipon. Ipadalawat naton ang alupinpin sa mahal nga bili.” Sa sina nga adlaw ang adlaw matunod sa udto, kag ang duta magadulom bisan adlaw. Ako, ang Ginoo, naghambal sini. Bayluhan ko ang inyo mga piesta sing mga paglalaw, kag bayluhan ko ang inyo masadya nga mga kalantahon sing mga panalambiton. Pabayuan ko kamo sing sako kag pakiskisan ko ang inyo mga ulo. Manginkaangay kamo sang mga ginikanan nga nagalalaw sa ila bugtong nga anak. Ina nga adlaw manginmapait tubtob sa katapusan. “Ang tion magaabot nga akon padalhan sing gutom ang duta. Ang mga tawo pagagutomon, pero indi sang kalan-on; pagauhawon, pero indi sang tubig. Pagagutomon sila sang pulong  sang Ginoo. Ako, ang Ginoo, naghambal sini. Ang mga tawo magaluya kag magadalangdalang halin sa aminhan pa bagatnan kag halin sa sidlangan pa nakatundan. Magpangita sila bisan diin sang pulong sang Ginoo, pero indi sila makakita sini.

Salmo sa Pagsabat:

Mga Salmo 119:2, 10, 20, 30, 40, 131

Bulahan sila nga nagasunod sang iya mga sugo, nga nagatuman sa iya sa bug-os nila nga tagipusoon. Sa bug-os ko nga tagipusoon nagtinguha ako sa pag-alagad sa imo, buligi ako nga indi magmalalison sa imo mga sugo! Ang akon dughan nagapin-ot sa daku nga handom, sa paghibalo sa tanan nga tion sang imo mga pagsulondan. Nagtapat ako nga magmasinulondon; gintuman ko ang imo mga pagsulondan.  Luyag ko magtuman sang imo mga sugo, tungod kay ikaw matarong, hatagi ako sing bag-o nga kabuhi! Nagahawathawat ang akon ginhawa, sa paghandom sang imo mga sugo.

Aleluya:

Mateo 11:28

Kari kamo sa akon, tanan kamo nga ginabudlayan kag ginabug-atan, kag papahuwayon ko kamo, siling sang Ginoo.

"Kari kamo sa akon, tanan kamo nga ginabudlayan . . ." (11:28)

Ang Pagbasa sang Santos nga Ebanghelyo suno kay:

San Mateo 9:9-13

Naghalin si Jesus sa sadto nga duog, kag sang nagalakat sia nakita niya ang isa ka manugsokot sang buhis nga ginahingalanan kay Mateo nga nagapungko sa iya opisina. Si Jesus nagsiling sa iya, “Sunod ka sa akon.” Nagtindog si Mateo kag nagsunod sa iya. Sang nagakaon si Jesus didto sa balay ni Mateo, madamo nga mga manugsokot sang buhis kag mga makasasala ang nag-upod sa iya kag sa iya mga gintuton-an sa pagkaon. May mga Fariseo nga nakakita sini kag nagpamangkot sila sa iya mga gintuton-an, “Ngaa bala ang inyo manunodlo nagakaon upod sa mga manugsokot sang buhis kag sa mga makasasala?” Si Jesus nakabati kag nagsabat sa ila, “Ang mga tawo nga wala sing balatian wala nagakinahanglan sing manugbolong, kundi ang mga masakiton lang. Lakat kamo kag usisaa ninyo kon ano ang kahulogan sini nga kasulatan: ‘Indi halad nga mga sapat ang akon ginapangita, kundi ang pagkamaluloy-on.’ Kay wala ako magkari sa pagtawag sang mga nagapakamatarong sang ila kaugalingon kundi sang mga makasasala.”

Hulyo 5 | Hulyo 7