Habacuc 1

1  2  3

☆☆☆

1 Amo ini ang mensahi nga ginpahayag sang GINOO kay Habacuc nga propeta.

Si Habacuc Nagreklamo sang Nagakatabo nga Indi Matarong

2 O GINOO, daw ano pa kadugay ang akon pagpanawag sa pagpangayo sing bulig kag mamati ka, kag magluwas sa amon gikan sa palugos?
3 Ngaa ginapakita mo ako sini nga kagamo kag kalautan? Ang kalaglagan kag panglugos yara sa palibot ko, kag may inaway kag binaisay bisan diin.
4 Ang kasugoan maluya kag wala pulos, kag ang katarungan wala ginahimo. Ang mga malaut nagalikop sa mga matarong, kag ang katarungan ginapatiko.

Ang Sabat sang Ginoo

5 Dayon ang Ginoo nagsiling sa iya mga tawo, “Padayona ang pagbantay sang mga pungsod sa palibot ninyo, kag matingala kamo sang inyo makita. May himuon ako nga indi kamo magpati kon makabati kamo nahanungod sini.
6 Himuon ko nga maggamhanan ang mga taga-Babilonia, inang mapintas kag wala nagapahimuyong nga mga tawo. Magakadto sila sa iban nga bahin sang kalibutan sa pag-agaw sang iban nga mga duta.
7 Nagdala sila sing kahadlok kag kakugmat kag sa ila bugal sila na ang kasugoan.
8 “Ang ila mga kabayo madasig pa sa mga leopardo, mapintas pa sa gutom nga mga lobo. Ang ila mga soldado nga nagasakay sa kabayo nagaabot halin sa malayo nga mga kadutaan, ang ila mga kabayo daw wala nagadapat sa duta. Daw mga agila sila nga nagasulip sa pagdagit sang ila kalan-on.
9 “Ang ila mga soldado nagaabanse sa pagpangagaw sa palugos, kag ang tagsatagsa nahadlok samtang nagapadulong sila. Ang ila nadakpan pareho kadamo sang balas.
10 Ginayubitan nila ang mga hari kag ginakadlawan ang mataas nga mga opisyales. Wala sing pamakod nga makasagang sa ila. Nagatumpok sila sing duta sa pamakod kag ginaagaw nila ini.
11 Dayon nagasalakay sila kaangay sang hangin kag wala na, ining mga tawo nga ang ila gahom amo ang ila dios.”

Si Habacuc Nagreklamo Liwat sa Ginoo

12 GINOO, halin sa ginsugoran Dios ikaw. Dios ko ikaw, balaan kag walay katubtoban. GINOO, Dios ko kag nagaapin sa akon, ginpili mo ang mga taga-Babilonia kag ginpabakod mo sila agod masilutan nila kami.
13 Pero makabatas ka man sa pagtan-aw sining mapintas kag malaut nga mga tawo? Ang imo mga mata balaan nga indi makatulok sa malaut, kag indi ikaw makaagwanta sa pagtan-aw sang mga tawo nga nagahimo sing sayop. Gani, ngaa nagahipos ka samtang ginalaglag nila ang mga tawo nga matarong pa sa ila?

Makabatas ka man sa pagtan-aw sining mapintas kag malaut nga mga tawo? (1:13)

14 Makabatas ka man bala magkabig sa mga tawo kaangay sang isda ukon kaangay sang mga sapatsapat nga wala sing may nagadumala sa ila?
15 Ang mga taga-Babilonia nagadakop sang mga tawo paagi sa taga nga daw mga isda lang sila. Ginasihod nila sila kag nagasinggit sila sa kalipay tungod sang ila nga nadakpan!
16 Ginasimba nila kag ginadulotan sing mga halad ang ila mga sihod, tungod kay ang ila mga sihod nagahatag sa ila sang labing maayo nga mga butang.
17 Gamiton bala nila ang ila mga espada sa walay katubtoban, kag magpadayon sing pangguba sang mga pungsod sa wala sing kaluoy?

Nahum 3 | Habacuc 2