Abdias 1

1

☆☆☆

1 Ang tagna ni Abdias. Amo ini ang ginsiling sang Ginoo nga Gamhanan nahanungod sa pungsod sang Edom.

Ang Ginoo Magsilot sang Edom

Ginpadala sang GINOO ang iya manugbalita sa mga kapungsoran, kag nabatian namon ang iya ginsiling: “Dali kamo! Awayon naton ang Edom!”
2 Nagsiling ang GINOO sa pungsod sang Edom, padiutayon ko ikaw, kag ang tanan magatamay sa imo.
3 Ang imo bugal naglimbong sa imo. Nagapuyo ka sa trinsera sa bato, ang imo puloy-an yara sa putokputokan sang mga kabukiran, gani nagasiling ka sa imo kaugalingon, ‘Sin-o gid bala ang makapukan sa akon?’
4 Pero bisan ipahamtang mo ang imo puloy-an subong kataas sang pugad sang agila, nga daw didto na sa mga kabituonan, akon ikaw gihapon butongon paidalom.” Siling sang GINOO.
5 “Kon mag-abot ang mga makawat sa kagab-ihon, ila lamang ginakuha ang ila naluyagan. Kon ang mga tawo magpamupo sing ubas, may ginabilin sila. Pero ginasigputan gid ikaw sang imo mga kaaway.
6 O Esau, nasapwan nila ang imo mga manggad, kag ginkuha nila ini tanan.
7 Ginlimbungan ka sang mga nagadampig sa imo, gintabog nila ikaw gikan sa imo pungsod. Ang mga tawo nga anang nagpakighidait sa imo nagdaog karon sa imo. Yadtong mga abyan nga nagkaon upod sa imo, nagbutang sing siod sa pagdakop sa imo, kag naghambal nahanungod sa imo, ‘Diin na bala ang kaabtik niya sang una?’”
8 Ang GINOO nagasiling, “Sa adlaw nga silutan ko ang Edom, laglagon ko ang ila maabtik nga mga lalaki kag dulaon ko ang kaalam gikan sa Bukid ni Esau.
9 Ang mga hangaway sang Teman magakurog sa kahadlok, kag ang tagsa ka hangaway sa Bukid ni Esau pagapamatyon.”

Ang mga Kabangdanan sa Pagsilot sa Edom

10 “Tungod kay imo ginkawatan kag ginpamatay ang mga kaliwat ni Jacob nga imo mga utod, laglagon ikaw kag pakahuy-an sa walay katapusan.
11 Yara ikaw nga nagatan-aw sadto nga adlaw sang ginguba sang dumoluong nga mga kaaway ang ila mga puwerta. Subong ikaw kalain sadtong mga dumoluong nga naghakot sang manggad sang Jerusalem kag nagpartida sini sa ila kaugalingon.
12 Indi ka kuntani magkalipay sa malain nga dinangatan sang imo mga utod sa Juda. Wala ka kuntani magkasadya sa adlaw sang paglaglag sa ila. Wala ka kuntani magkadlaw sa mga kalisdanan nila.

Wala ka kuntani magkasadya. (1:12)

13 Wala ka kuntani magsulod sa siyudad sang akon mga tawo sa pagkasadya sa ila pag-antos kag sa pag-agaw sang ila mga manggad sa adlaw sang paglaglag sa ila.
14 Wala ka kuntani magtindog sa ginsang-an sang mga dalan sa pagdakop sang mga nagtinguha sa pagpalagyo. Wala mo kuntani sila pag-itugyan sa kaaway sa adlaw sang ila kalisdanan.”

Ang Paghukom sa mga Kapungsoran

15 “Madali na lang ang adlaw sa diin ako, ang Ginoo, magahukom sang tanan nga mga kapungsoran, O Edom, ang ginhimo mo pagahimuon man sa imo. Kon ano ang ginhatag mo, amo man ang pagabatunon mo.
16 Ang akon mga tawo nakainom sa kupa sang mapait nga silot sa akon balaan nga bukid. Kag ang tanan nga mga kapungsoran sa palibot magainom sa kupa sang labi pa kalain nga silot, magainom sila sing madamo gid kag mawala.”

Ang Pagdaog sang Israel

17 “Pero sa Bukid sang Sion, may mga tawo nga makapalagyo, kag ini nga duog manginbalaan. Ang mga tawo ni Jacob magapanag-iya sang duta nga ila gid man palanublion.
18 Ang mga tawo ni Jacob kag ni Jose manginkaangay sang kalayo, pagalaglagon nila ang mga tawo ni Esau, subong sang pag-upos sang kalayo sang dagami. Wala sing may mabilin sang kaliwat ni Esau. Ako ang GINOO, nagsiling sini.”
19 “Ang mga Israelinhon sang Negeb magapanag-iya sang bukid ni Esau, ang yara sa kunsaran sang mga bukid sa Judea magaagaw sang duta sang mga Filistinhon. Ang mga Israelinhon magapanag-iya sang kadutaan ni Efraim kag sang Samaria, kag ang mga tawo ni Benjamin magaagaw sang Galaad.
20 Ang mga hangaway nga binihag gikan sa aminhan nga ginharian sang Israel magaagaw sang kadutaan sang Fenisia tubtob sa Sarepta sa aminhan. Ang mga bihag halin sa Jerusalem nga yara sa Separad magaagaw sang mga kabanwahanan sang Negeb.
21 Ang madinalag-on nga mga lalaki sang Jerusalem magaatake sa Edom kag magagahom sa iya. Kag ang GINOO manginhari.”

Amos 9 | Jonas 1