"Magpakabakod Ka, ang Imo Pagtuo Nag-ayo sa Imo"

Liturhiya sang Pulong

(Lunes, Hulyo 9, 2018)

Ang Pagbasa gikan sa Libro ni:

Propeta Oseas 2:16, 17-18, 21-22

Kag sa liwat pagatawgon niya ako nga iya bana, kag indi na niya ako pagatawgon nga iya Baal. Indi ko na gid sia pagpamitlangon sang ngalan ni Baal. Dayon magahimo ako sing kasugtanan sa tanan nga mga sapat nga talunon kag mga pispis, agod indi nila pag-anhon ang akon mga tawo. Pagakuhaon ko gikan sa duta ang tanan nga mga hinganiban, para sa inaway—tanan nga mga espada kag mga pana—kag ang akon mga tawo magakabuhi sa paghidait kag hilway sa katalagman. Sa sadto nga tion sabton ko ang mga pangamuyo sang akon mga tawo nga Jezreel. Magapadala ako sing ulan sa duta, kag ang duta magapatubas sing trigo, kag ubas, kag mga olivo.

Salmo sa Pagsabat:

Mga Salmo 145:2-3, 4-5, 6-7, 8-9

Sa tagsa ka adlaw magapasalamat ako sa imo; dayawon ko ikaw sa wala sing katubtoban. Ang GINOO gamhanan, kag dapat gid dayawon sing labi, ang iya pagkagamhanan indi mahangpan. Ang imo ginhimo pagadayawon halin sa isa ka kaliwatan pakadto sa isa; ibantala nila ang imo gamhanan nga mga buhat. Ang mga tawo magahambal sang imo himaya kag pagkahalangdon, kag magpamalandong ako sa imo makatilingala nga mga binuhatan. Ang mga tawo magahambal sang imo gamhanan nga mga buhat, kag ako magabantala sang imo pagkagamhanan. Magasugid kag magakanta sila nahanungod sang imo kaayo. Ang GINOO mahigugmaon kag maluloy-on, indi madali mangakig kag puno sang mapinadayunon nga paghigugma. Maayo sia sa tanan kag maluloy-on sa tanan nga iya ginhimo.

Aleluya:

2 Timoteo 1:10

Ang aton Manlulowas nga si Cristo Jesus gindula ang gahom sang kamatayon kag paagi sa Maayong Balita iya ginpahayag ang kabuhi nga wala sing katapusan.

Ang Pagbasa sang Santos nga Ebanghelyo suno kay:

San Mateo 9:18-26

Sang si Jesus nagahambal sini sa ila, may isa ka pangulo nga Judio nga nagpalapit sa iya, nagluhod sa iya atubangan kag nagsiling, “Ang akon anak nga babayi bag-o gid lang mapatay, pero kadtoi kag tanduga kag mabuhi sia.” Gani si Jesus nagtindog kag nagsunod sa iya, kag nag-upod man ang iya mga gintuton-an. May isa ka babayi nga nagaantos tungod sang pagpanggwa sang dugo sa sulod sang dose ka tuig nga nagpalapit sa likod nayon ni Jesus kag gintandog ang sidsid sang iya kunop. Ang babayi nagsiling sa iya kaugalingon, “Kon matandog ko lang ang iya kunop magaayo ako.” 

“Kon matandog ko lang ang iya kunop . . .” (9:21)

Nagliso si Jesus kag nakita niya ang babayi kag nagsiling, “Anak magpakabakod ka! Ang imo pagtuo nag-ayo sa imo.” Sa gilayon nag-ayo sia. Dayon nagsulod si Jesus sa balay sang pangulo nga Judio. Sang makita niya ang mga musikero para sa lubong kag ang mga tawo nga nagaginahod, nagsiling sia, “Gwa kamo anay! Ang dalagita indi patay, kundi nagakatulog lang!” Kag nagkadlaw sila sa pagyaguta sa iya. Sang nakagwa ang mga tawo, si Jesus nagsulod sa kuwarto sang dalagita kag gin-uyatan niya sia sa kamot, kag nagbangon sia. Ang balita nahanungod sini naglapnag sa sadto nga lugar.

Hulyo 8 | Hulyo 10