Jeremias 1

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52

☆☆☆

1 Ini nga libro nagasugid nahanungod sa ginsiling ni Jeremias. Anak sia ni Helcias nga isa sang mga pari sang banwa sang Anatot sa kadutaan ni Benjamin.

2 Ang GINOO naghambal kay Jeremias sang ika-13 nga tuig nga si Josias, anak ni Haring Amon, amo ang hari sang Juda,

3 kag naghambal sia liwat sa iya sang si Joaquim, anak ni Josias, amo ang hari. Sa tapos sini, ang GINOO naghambal sa iya sing madamo nga beses, tubtob nga ang mga tawo sang Jerusalem ginbihag sa ikalima nga bulan sang ika-11 nga tuig nga si Sedequias, anak ni Josias, amo ang hari.

Ang Pagtawag kay Jeremias

4 Ang GINOO nagsiling sa akon,

5 "Sa wala pa nakon ikaw mahatagi sing kabuhi ginpili ko ikaw, kag sa wala pa ikaw matawo, ginpain ko na ikaw nga manginpropeta sang mga kapungsoran."

6 Nagsabat ako, "O GINOONG Dios, pamatan-on pa ako kag indi ako makahibalo maghambal."

7 Pero ang GINOO nagsiling sa akon, "Indi ka magsiling nga pamatan-on pa ikaw, kundi kadto ka sa mga tawo nga luyag ko ipadala ikaw, kag isugid sa ila ang tanan nga ginsugo ko sa imo.

8 Indi ka magkahadlok sa ila, kay yari ako sa pag-apin sa imo. Ako, ang GINOO, naghambal sini."

9 Dayon gin-untay sang GINOO ang iya kamot, gintandog ang akon mga bibig, kag nagsiling sa akon, "Pamati, ginahatag ko sa imo ang mga pulong nga imo dapat ihambal.

10 Karon nga adlaw, ginahatag ko sa imo ang gahom sa mga kapungsoran kag mga ginharian, sa paggabot kag sa pagtumba, sa pagguba kag sa pagpukan, sa pagpatindog kag sa pagtanom."

Ang Duha ka Palanan-awon

11 Ang GINOO nagpamangkot sa akon, "Jeremias, ano ang nakita mo?" Nagsabat ako, "Isa ka sanga sang kahoy nga almendro."

12 Ang GINOO nagsiling, "Husto ikaw kag ginabantayan ko nga mapamatud-an ang akon ginasiling."

13 Dayon ang GINOO naghambal liwat sa akon, kag nagpamangkot sia, "Ano pa ang nakita mo?" Nagsabat ako, "Nakita ko sa aminhan ang isa ka kolon nga nagaindakal, kag daw maula pakadto diri."

14 Nagsiling sia sa akon, "Ang kalaglagan magaindakal halin sa aminhan sa tanan nga nagapuyo sa sining duta,

15 kay ginatawag ko ang tanan nga mga kapungsoran sa aminhan sa pagkari. Ang ila mga hari magakari kag magapahamtang sang ila mga trono sa mga puwerta sang Jerusalem kag sa palibot sang iya mga pader, kag subong man sa palibot sang iban nga mga siyudad sang Juda.

16 Silutan ko ang akon mga tawo kay nagpakasala sila; nagbiya sila sa akon, nagdulot sing mga halad sa iban nga mga dios, kag naghimo sang mga diosdios kag ginsimba sila.

17 Magpakaisog ka! Lakat ka, kag isugid sa ila ang tanan nga akon ginsugo sa imo nga isiling. Karon, indi ka magkahadlok sa ila, kay kon indi, pahadlukon ko pa gid ikaw sa ila atubangan.

18-19 Pamati ka, Jeremias! Ang tagsatagsa nga nagapuyo sa sining duta--ang mga hari sang Juda, ang mga opisyales, ang mga pari, kag ang mga tawo--magapamatok sa imo. Pero karon nga adlaw, ihatag ko sa imo ang ikasarang sa pagbato sa ila. Manginkaangay ikaw sang isa ka siyudad nga napamakuran sing maayo, sang isa ka haligi nga salsalon, kag sang isa ka pader nga saway. Indi sila makadaog sa imo, kay yari ako sa pag-apin sa imo. Ako, ang GINOO, naghambal sini."

Isaias 66 | Jeremias 2