"Dali Masaylo Kita agod Makapahuwayhoway Kamo"

Liturhiya sang Pulong

(Domingo, Hulyo 22, 2018)

1. Ang Pagbasa gikan sa Libro ni:

Propeta Jeremias 23:1-6

Daw ano ka manginkakulogmat ang paghukom sang GINOO sa mga pangulo nga nagalaglag kag nagapaalaplaag sang iya mga tawo. Amo ini ang ginasiling sang Ginoo, ang Dios sang Israel nahanungod sa mga pangulo nga dapat kuntani mag-atipan sang iya mga tawo: “Wala ninyo gin-atipan ang akon mga tawo. Ginpaalaplaag kag gintabog ninyo sila. Karon silutan ko kamo tungod sang malaut nga mga butang nga inyo nahimo. Tipunon ko ang nabilin sang akon mga tawo gikan sa mga kapungsoran sa diin ginpaalaplaag ko sila, kag dalhon ko sila pabalik sa ila duta nga natawuhan. Magadamo ang ila mga kabataan kag magamuad sila. Padalhan ko sila sing mga pangulo nga magatatap sa ila. Ang akon mga tawo indi na magkahadlok ukon kugmaton, kag indi ko na sila pagsilutan liwat. Ako, ang GINOO, ang naghambal sini.” Ang GINOO nagasiling, “Magaabot gid ang tion nga magapili ako subong hari sang isa ka kaliwat ni David nga manginkaangay sa iya. Ini nga hari magadumala nga may kaalam kag magahimo sing matarong kag nagakaigo sa bug-os nga duta. Kon sia amo na ang hari, ang mga tawo sang Juda may kalig-onan, kag ang mga tawo sang  Israel magakabuhi sa paghidait. Pagatawgon nila ina nga hari nga ‘Ang GINOO matarong.’”

Salmo sa Pagsabat:

Mga Salmo 23:1-3, 3-4, 5, 6

Ang GINOO amo ang akon manugbantay; yara ang tanan nga ginakinahanglan ko. Iya ako ginapapahuway sa mga latagon nga may malagtom nga hilamon, kag iya ako ginatuytoyan sa mga linaw sang matin-aw nga tubig. Ginahatagan niya ako sing bag-o nga kusog. Ginatuytoyan niya ako sa husto nga dalan, suno sa iya ginsaad. Bisan pa nagaagi ako sa dalan nga tama kadulom, indi gid ako mahadlok, O GINOO, kay ikaw nagaupod sa akon! Ang imo baston kag ang imo sungkod nagaapin sa akon. Ginabutangan mo ako sa lamisa sing madamo nga pagkaon, sa diin makit-an ako sang tanan ko nga mga kaaway, ginhisuan mo sing lana ang akon ulo sa pag-abiabi sa akon, kag ginpaawas mo ang akon kupa. Sa pagkamatuod, ang imo kaayo kag gugma mangin-akon samtang nga nagakabuhi pa ako, kag ang imo balay mangin-akon puloy-an sa walay katubtoban.

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 2:13-18

Pero karon, sa paghiusa kay Cristo Jesus, kamo nga sadto anay nahilayo ginpapalapit na paagi sa kamatayon ni Cristo. Kay si Cristo gid ang naghatag sa aton sing paghidait, paagi sa pag-isa niya sang mga Judio kag mga Gentil. Paagi sa iya kaugalingon nga lawas ginrumpag niya ang pader nga nagaseparar kag nagapaaway sa ila. Ginwala niya ang Kasugoan sang mga Judio, lakip ang mga sugo kag mga pagsulondan sini, agod nga matuga niya gikan sa mga Judio kag mga Gentil ang isa ka bag-o nga tawo nga nahiusa sa iya kaugalingon, kag sa sini nga paagi natigayon ang paghidait. Paagi sa pagkamatay ni Cristo sa krus ginkuha niya ang mga pagdinumtanay. Paagi sa krus gintingob niya sa isa lamang ka lawas ang mga Judio kag mga Gentil, kag gindala niya sila pabalik sa Dios. Gani si Cristo nagkari kag nagwali sang Maayong Balita sang paghidait sa tanan: sa inyo nga mga Gentil, nga sadto anay malayo sa Dios, kag sa mga Judio, nga malapit sa iya. Paagi kay Cristo kita tanan, mga Judio kag mga Gentil, sarang makapalapit sa atubangan sang Amay sa isa ka Espiritu. 

Aleluya:

Juan 10:27

Ang akon mga karnero nagapamati sa akon tingog, siling sang Ginoo; kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Marcos 6:30-34

Ang mga apostoles nagbalik sa kay Jesus kag ginsugiran nila sia sang tanan nga ila nahimo kag napanudlo. Sa pagkadamo sang mga tawo ang nagapakadto pakari sa bagay nga si Jesus kag ang iya mga gintuton-an wala na gani sing tion bisan sa pagkaon. Gani nagsiling sia sa ila. “Dali masaylo kita sa isa ka duog nga kitahanon lang agod makapahuwayhoway kamo.” Gani nagsakay sila sa sakayan nga silahanon lang kag nagkadto sa isa ka naligwin nga duog. Pero madamo nga mga tawo ang nakakita sang ila paghalin kag nakahibalo dayon kon sin-o sila. Gani naggwa sila sa ila mga banwa kag nagdalagan pakadto sa ginapadulongan ni Jesus kag sang iya mga gintuton-an, kag una pa sila makaabot didto. Sang pagtakas ni Jesus, nakita niya ang masyado kadamo nga mga tawo kag nagbatyag sia sing kaluoy sa ila kay subong sila sang mga karnero nga wala sing manugbantay. Kag gintudloan niya sila sang madamo nga mga butang. 

Hulyo 21 | Hulyo 23